སྤྱི་ཟླ9པའི་ཚེས27ཉིན་གྱི་སྔ་དྲོར། རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གཟེངས་བསྟོད་ཚོགས་ཆེན་པེ་ཅིན་དུ་འཚོགས་ཤིང་། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་ཚོགས་ཆེན་ལ་ཕེབས་པར་མ་ཟད་གསུང་བཤད་གལ་ཆེན་གནང་། ལི་ཁེ་ཆང་གིས་ཚོགས་ཆེན་གཙོ་སྐྱོང་གནང་བ་དང་། ཝང་དབྱང་དང་། ཝང་ཧུའུ་ཉིང་། ཀྲའོ་ལེ་ཅི། ཧན་ཀྲེང་བཅས་ཚོགས་ཆེན་ལ་ཞུགས།
ཚོགས་ཆེན་ཐོག་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་བཟང་ཚོགས་པ་དང་དཔེ་བཟང་མི་སྒེར་བཅས་ལ་གཟེངས་བསྟོད་གནང་བ་དང་། དེ་ལས་དཔེ་བཟང་ཚོགས་པ་665དང་། དཔེ་བཟང་མི་སྒེར་812ལ་གཟེངས་བསྟོད་གནང་བ་རེད། སྤྲོ་སྣང་ལྡན་པའི་རོལ་དབྱངས་ཁྲོད་ཞི་ཅིན་ཕིང་སོགས་ཀྱིས་གཟེངས་བསྟོད་ཐོབ་པའི་དཔེ་བཟང་ཚོགས་པ་དང་དཔེ་བཟང་མི་སྒེར་གྱི་འཐུས་མིར་བྱ་དགའ་གནང་བ་རེད།
ཀྲུང་གོ་སྦྲག་སྲིད་ཚོགས་པ་སྤྱི་གཉེར་ཁང་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་དཀར་མཛེས་རྫོང་ཡན་ལག་སྤྱི་གཉེར་ཁང་གི་ཐག་རིང་སྦྲག་སྐྱེལ་གྱི་རླངས་འཁོར་གྱི་ཁ་ལོ་པ་འཆི་མེད་རྡོ་རྗེ་ལ་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་བཟང་མི་སྒེར་གྱི་མཚན་སྙན་ཐོབ་པ་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་དངོས་ཀྱིས་འཆི་མེད་རྡོ་རྗེ་ལ་བྱ་དགའ་གནང་བ་རེད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་དངོས་ཀྱིས་འཆི་མེད་རྡོ་རྗེ་ལ་བྱ་དགའ་གནང་རྗེས། འཆི་མེད་རྡོ་རྗེའི་ངོ་ལ་འཛུམ་གྱིས་ཁེངས་ནས། སྤྱི་ཁྱབ་ཧྲུའུ་ཅི་ཡིས་ངའི་ལག་ལ་འཇུས་ནས། བྱམས་བརྩེའི་ངང་ང་ལ་ལུས་པོ་ལ་བདག་ཡག་པོ་བྱོས་གསུངས་བྱུང་། ང་རང་སྤྲོ་བས་ཁེངས་ནས་ཅི་ཞུ་དགོས་ཀྱང་མ་ཤེས་ལ། སྤྱི་ཁྱབ་ཧྲུའུ་ཅི་ལ་ང་དང་བོད་རིགས་མི་དམངས་ལ་ཐུགས་ཁུར་ཚད་མེད་གནང་བར་ཐུགས་རྗེ་ཆེ་ཞུས་པ་ཡིན་ཞེས་ལབས་བྱུང་།
