༄༅།།གཉེན་འཐོར་བའི་སྐབས་སུ་བདག་དབང་ཆུང་ངུའི་ཁང་པ་ཇི་ལྟར་བགོ་དགོས་སམ།

རྩོམ་སྒྲིག་པ།ཚེ་དཔལ། ཡོང་ཁུངས།མཚོ་སྔོན་ཏང་གི་འཚོ་བ། སྤེལ་དུས། 06-08


བློ་མཐུན་རྩོམ་སྒྲིག་པ་ལགས།

        ང་དང་ངའི་ཁྱོ་ག་གཉིས་བཟའ་ཚང་བསྒྲིགས་ནས་ལོ་གཅིག་མ་གཏོགས་འགོར་མེད། ད་ལྟ་ཁོར་ཕྱི་རུ་ཟུར་བསྟེན་ཆུང་མ་ཡོད་པར་མ་ཟད་རྒྱན་སྐུགས་རྒྱུར་ཡང་དགའ་བས། ང་རང་ཁོ་དང་གཉེན་འཐོར་རྩིས་ཡོད།  ངེད་གཉིས་གཉེན་སྒྲིག་སྐབས་ཀྱི་ཁང་པ་ནི་གླས་ཁང་ཡིན་ལ། ཁོར་གྲོང་ཁྱེར་མཐའ་འཁོར་དུ་ཁང་པ་ཞིག་ཡོད་པ་དེ་བཤིག་སྤོ་བྱས་རྗེས་ཡང་བསྐྱར་སྡོད་ཁང་གསར་བ་ལས་རྒྱུར་སྒུག་ཡོད། སྡོད་ཁང་དེ་མི་གཞན་ལ་གླས་འདུག་པ་དང་ང་རང་དེའི་ནང་དུ་སོང་མྱོང་།   གླ་མཁན་གྱིས་ཁོ་རང་ངོ་ཤེས་པར་མ་ཟད་ཁོ་ཁང་བདག་ཡིན་པར་བཤད། དེའི་རྐྱེན་གྱིས་ང་ཡང་ཁང་པ་དེའི་ཁང་བདག་ནི་ཁོ་རང་ཡིན་པར་ཡིད་ཆེས་ཡོད། སྡོད་ཁང་དེ་ནི་ཁོས་སྔོན་ཆད་ཉོས་པ་ཡིན་མོད། འོན་ཀྱང་གཉེན་མ་བསྒྲིགས་པའི་སྔོན་ལ་ཁོས་ངའི་ཁེ་དབང་འགན་སྲུང་བྱེད་ཆེད། ཆེད་དུ་གཉེན་མ་བསྒྲིགས་པའི་སྔོན་གྱི་རྒྱུ་ནོར་ཐད་ཀྱི་གྲོས་འཆམ་ཡི་གེ་ཞིག་བྲིས་ནས། སྡོད་ཁང་དེའི་བདག་དབང་ཕྱེད་ཀ་ང་ལ་དབང་རྒྱུ་བྱས་ཡོད། ཡིན་ན་ཡང་ད་ལྟ་ངས་སྡོད་ཁང་དེ་ནི་བདག་དབང་ཆུང་ངུའི་སྡོད་ཁང་ཞིག་ཡིན་པ་ཚོར། ཁོས་སྡོད་ཁང་དེ་དངོས་གནས་ཉོས་ཡོད་མོད། འོན་ཀྱང་བདག་དབང་ཡི་གེ་མེད་པ་རེད། འདིར་འདྲི་རྒྱུ་ནི། གལ་ཏེ་ང་ཚོ་གཉེན་འཐོར་ན་སྡོད་ཁང་དེ་ཇི་ལྟར་བགོ་དགོས་སམ།

ཀློག་པ་པོ་ལྷ་མོ་སྐྱིད་ནས།

བློ་མཐུན་ལྷ་མོ་སྐྱིད་ལགས།

        གལ་ཏེ་ཁྱོད་དང་ཁྱོད་ཀྱི་ཁྱོ་ག་གཉིས་ཀྱིས་བྲིས་པའི་གྲོས་འཆམ་ཡི་གེ་དེ་ནི་ཁྱོད་གཉིས་ཀྱི་འདོད་བློ་ངོ་མ་ཡིན་ན། ནུས་པ་ལྡན་ཁོ་ཐག་རེད།

        ཁྱོད་ལ་སྡོད་ཁང་དེའི་བདག་དབང་གི་ཕྱེད་ཀ་ཡོད་མོད། འོན་ཀྱང་སྡོད་ཁང་དེ་ནི་བདག་དབང་ཐོ་འགོད་བྱས་མེད་པའི་དབང་གིས། བཅའ་ཁྲིམས་སྟེང་ནས་བཤད་ན་ཐོ་འགོད་བྱེད་ཐབས་མེད་པའི་བདག་དབང་ཆུང་ངུའི་ཁང་པ་རེད། དེའི་རྐྱེན་གྱིས་སྡོད་ཁང་དེ་བཅའ་ཁྲིམས་ལྟར་བགོ་ཐབས་མེད་མོད། འོན་ཀྱང་དོན་དངོས་ཀྱི་འགྲོ་རིམ་ལྟར། གཉེན་འཐོར་སྐབས་ཁྱོད་ཀྱིས་རིན་ཐང་སྒོར་མོར་བཀུག་ནས་སྟེར་དགོས་པའི་རེ་བ་བཏོན་ཆོག་གོ།


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1