དང་པོ་དབྱིབས་ནི། ཁ་ཊྭཱཾ་ག་ནི། ཡུ་བ་དཀར་པོའི་མར་སྣེར་རྡོ་རྗེ་རྩེ་ལྔ་བ་ཕྱེད་པའམ་རྩེ་གཅིག་པ་སྟེ་མར་སྣེའི་རྡོར་ཕྱེད་རྩེ་ལྔ་བའི་རྭ་དབུས་མ་རིང་པོ་ཅན་དང་། ཡར་སྣེར་སྣ་ཚོགས་རྡོ་རྗེ་དང་དེའི་སྟེང་དུ་བདུད་རྩིའི་བུམ་པ་དང་། དེའི་སྟེང་དུ་མི་མགོ་རློན་པ་ནག་པོ་དང་། རྙིད་པ་དམར་པོ་དང་། སྐམ་པ་དཀར་པོ་སྟེ་ཐོད་སྐམ་དང་གསུམ་པོ་རིམ་པར་བརྩེགས་པ་དང་། དེའི་སྟེང་དུ་རྡོ་རྗེ་ཁ་ཊྭཱཾ་ག་ཡིན་ན་དེ་ལ་རྩེ་མོ་རྡོ་རྗེ་རྩེ་ལྔ་པ་ཅན་དང་། རྩེ་གསུམ་ཡིན་ན་དེའི་སྟེང་དུ་ལྕགས་ལས་བྱས་པའི་རྩེ་གསུམ་དབུས་མ་ཅུང་རིང་བ་ལ་གཡས་གཡོན་དུ་ཨ་ལོང་གསུམ་གསུམ་དྲུག་ཡོད་པ། བུམ་པའི་རྩ་བར་དྲིལ་གཡེར་དང་བ་དན་དང་། དར་དཔྱངས་སྣ་ཚོགས་པ་བཏགས་པ་དེ་ནི་ཁ་ཊྭཱཾ་གའི་དབྱིབས་སོ། །
གཉིས་པ་ཚད་ནི། མར་སྣེའི་རྡོར་ཕྱེད་ལ་སོར་ལྔ་དང་། བར་གྱི་དབྱུག་པ་ལ་ཁྲུ་གསུམ། སྣ་ཚོགས་རྡོ་རྗེ་ལ་སོར་གཉིས། བུམ་པ་ལ་སོར་བཞི། མི་མགོ་གསུམ་པོ་རེ་རེ་ལ་སོར་བཞི་བཞི་སྟེ་བཅུ་གཉིས། རྩེ་གསུམ་གྱི་དབུས་མ་ལ་མཐོ་གང་དང་གཡས་གཡོན་ཟུང་ལ་མཛུབ་གང་དགོས་ཤིང་། སྤྱིའི་རིང་ཚད་ལ་འདོམ་གང་ལྷག་དང་། ཐུང་ཚད་ལ་སོར་བཅུ་གཉིས་པར་གསུངས་པས་ཐུང་ཚད་ལ་བུམ་ཞལ་སོགས་ལ་རིག་པས་གཞལ་ཏེ་ཚད་གཏན་ལ་འབེབས་པར་བྱ་བ་ཡིན།
གསུམ་པ་དགོས་ཆེད་ནི། ཁ་ཊྭཱཾ་ག་དེ་ཤེས་རབ་ཡུམ་གྱི་ཚུལ་དུ་ལུལ་ས་བསྟེན་པས་ཐབས་ཤེས་ཀྱི་དོན་དང་བདེ་ཆེན་ལྷན་ཅིག་སྐྱེས་པའི་དོན་མི་བརྗེད་པར་དྲན་པ་དང་། རྣལ་འབྱོར་བའི་སྐུ་ལ་གཟི་བྱིན་བསྐྱེད་པ་དང་། སྔགས་ཀྱི་དམ་ཚིག་ཚང་བ་དང་། མཁའ་འགྲོ་དབང་དུ་འདུ་བ་དང་། འཇིགས་མེད་ཧེ་རུ་ཀའི་རྣལ་འབྱོར་དུ་གོ་བར་ནུས་པ་དེ་ནི་དགོས་པའོ། །
