པྲ་སྒྲུང་པ་ཞིག་དང་གླིང་གེ་སར་གྱི་རྗེས་ཤུལ་འཚོལ་ཞིབ་ཚན་ཆུང་རྨ་མཐའ་མར་བསྐྱོད་པ་ཞེས་པའི་པར་དེབ་དང་དངོས་བྲིས་གློག་བརྙན། སྤྱི་ལོ་༢༠༡༧་ལོར་པར་བསྐྲུན་བྱེད་རྒྱུ་རེད། འདི་ནི་གླིང་གེ་སར་གྱི་ཤུལ་བཞག་རིག་གནས་ལ་དགའ་ཞེན་དང་དུང་བ་ཡོད་པའི་བོད་མི་ཡོངས། རྒྱལ་ཁབ་ཕྱི་ནང་ཀུན་གྱི་སྤུན་ཟླ་མི་རིགས་གཞན་པའི་གེ་སར་རིག་གནས་ལ་རྒྱས་ལོན་བྱེད་འདོད་པ་རྣམས་ལ་དཔྱད་གཞིའི་རྒྱུ་ཆ་ཙམ་ཡིན་པ་དང་ནང་དོན་གཙོ་བོ་ཚན་པ་དྲུག་ལ་དབྱེ་ཡོད།
གཅིག གྲུབ་པའི་དབང་ཕྱུག་ཆེན་པོ་གེ་སར་སྐྱེ་བུ་དོན་འགྲུབ་ཁོང་དང་འཁོར་དཔའ་བརྟུལ་གྲུབ་ཆེན་བརྒྱད་ཅུའི་ངོ་མཚར་བའི་གྲུབ་པའི་རྟགས་མཚན་ས་རྡོ་རི་བྲག་ལ་བཞག་ནས་བོད་ཕྱི་རབས་པའི་དད་རྟེན་དུ་གྱུར་ཡོད་པའི་སྐོར།
གཉིས། གྲུབ་མཐའ་རིས་མེད་ཀྱི་སྐྱེས་ཆེན་དམ་པ་དུ་མའི་དགོངས་གཏེར་དང་ཉམས་སྣང་ལས་གླིང་གེ་སར་གྱི་ཤུལ་རྗེས་ངོས་བཟུང་བའི་གནས་ཆེན་དུ་མ།
གསུམ། རིགས་མི་འདྲ་བའི་གེ་སར་སྒྲུང་པ་རྣམས་ཀྱི་བཤད་པའི་སྒྲུང་གི་ནང་དུ་ལོ་རྒྱུས་ཀྱི་ས་བོན་བྱས་ཆོག་པ་གཞིར་བཟུང་སྟེ། སྐབས་དེའི་ཧོར་གླིང་གཉིས་ཀྱི་དམག་འཁྲུག་གི་འགྲོས་དང་ད་ལྟའི་སའི་ཆགས་དབྱིབས་ལ་དཔྱད་ནས་རྗེས་ཤུལ་འཚོལ་ཞིབ་བྱས་པ།
བཞི། ལོ་ངོ་སྟོང་གཅིག་ནས་ད་བར་དུ་བོད་མི་རིགས་ཀྱི་ངག་ནས་ངག་དུ་བརྒྱུད་དེ་མ་ཉམས་པའི་གླིང་གེ་སར་དང་འབྲེལ་བའི་སྒྲུང་གཏམ་ངོ་མཚར་ཅན་ཁག་གཅིག
ལྔ། གླིང་གེ་སར་ཞེས་རླབས་ཆེན་གྱི་མི་བུ་འཇོན་ཐང་ཅན་ཁོང་གི་སྐུ་གཟུགས་དང་ཡོ་བྱད་རྣམས་རང་བྱུང་ཁམས་ཆེན་མོའི་ས་རྡོ་རི་བྲག་ལ་འདྲ་བ་རྒྱུ་མཚན་གྱི་ཐོགས་པ་དེ་རྣམས་ནི་ལོ་རྒྱུས་ཀྱི་བདེན་དཔང་དུ་བཞག་ཆོག་པ།
དྲུག གླིང་གེ་སར་ཁོང་གི་ཕྱི་ནང་གསང་གསུམ་གྱི་མཛད་པ་ཐུན་མོང་དང་ཐུན་མོང་མ་ཡིན་པའི་གསང་བ་ཟབ་མོ་དེ་སྣང་གསལ་པྲ་ཡི་མེ་ལོང་ལ་བརྟེན་ནས་གསང་བ་བརྟོལ་བ།
མཚོ་སྔོན་ཞིང་ཆེན་གེ་སར་སྒྲུང་ཞིབ་འཇུག་རྟེན་གཞིའི་གཙོ་སྒྲུབ་མཛད་པ་དང་མགོ་ལོག་གེ་སར་སྒྲུང་བའི་ཁྱིམ་གཞིས་ཟི་ལིང་ཡན་ལག་ས་ཚུགས་གཉིས་ཀྱིས་བསྒྲུབས་པའི་རྨ་མཐའ་མའི་དངོས་བྲིས་གློག་བརྙན་དང་པར་དེབ་ཀྱིས་སྔོན་བརྡ་འདིས་བོད་ཡུལ་སྟོད་སྨད་བར་གསུམ་གྱི་གླིང་གེ་སར་རིག་གནས་ཞིབ་འཇུག་ལ་དགའ་གུས་མོས་གསུམ་ཡོད་མཁན་ཚོའི་བློ་གྲོས་ཀྱི་མཁའ་དབྱིངས་ལ་སྔོན་མེད་ཀྱི་འདྲི་རྟགས་གསར་བ་ཞིག་དང་། བློ་ཐབས་གསར་བ་ཞིག་གི་སྒོ་ཡངས་པོར་འབྱེད་ཐུབ་པའི་སྨོན་འདུན་བཅས་།
