ཡུནརིང་བགྲོད་པའི་རྐང་ལམ་ཕྲ་མོ་རྡོག་པའི་འོག་ཏུ་འཇའ་ལྟར་ཡལ། །
ལྷག་སྐྱོབ་སློག་པ་ལྷན་པའི་སྐར་ཆེན་རྨི་ལམ་བཞིན་དུ་ལུས་དང་བྲལ། །
དུས་ཀྱི་རྒུད་པའི་མུན་པའི་འཇིག་རྟེན་ན་བུན་བཞིན་དུ་མཁའ་ལ་དེངས། །
བདེ་སྐྱིད་འཚོ་བའི་འོད་ཆེན་འཕྲོ་བས་སེམས་ཀྱི་མུན་པ་མཐའ་ནས་སངས། །
དཔའ་ངར་ལྡན་པས་ཤ་ཁྲག་དྲོན་མོའི་ཞུམ་མེད་སྲོག་གིས་ལེགས་སྐྱེས་ཕུལ། །
སྙིང་སྟོབས་དྲག་རྩལ་རླབས་ལྟར་ཕྱུར་བས་ཕས་རྒོལ་སྡང་དགྲའི་གཤེད་མར་བྱས། །
བདེ་སྡུག་ཁུར་པོ་ཕྲག་ཏུ་བཞེས་ནས་མཐའ་བསྲུངས་དཔའ་བོའི་གདོང་ལེན་པ། །
བཀའ་དྲིན་གཞལ་མེད་གསར་རྗེའི་དམར་དམག་ནམ་ཡང་བརྗེད་མེད་ཡིད་ལ་འཁོར། །
ལོ་བརྒྱར་འཁོར་བགྲོད་དུས་ཀྱི་ཡོ་ལང་དགའ་ལྡན་ལྷ་ཡི་ཁང་བཟང་ནས། །
བདེ་སྐྱིད་འཚོ་བ་དྲོན་མོའི་སྐྱེལ་བའི་རྫོགས་ལྡན་གསར་པའི་འཇིག་རྟེན་འདིར། །
སྟོབས་ཀྱིས་འཁོར་བསྒྱུར་ཞི་ཅི་ཕིང་ཞེས་འཛམ་གླིང་ས་ཡི་དཀྱིལ་འཁོར་དུ། །
དཔལ་མཛངས་བརྟུལ་ཕོད་སྙན་པའི་རོལ་མོ་སྲིད་པ་གསུམ་ན་ལྷང་ངེར་གྲགས། །
བོད་སྐྱོང་དབུལ་སྐྱོར་བདེ་སྐྱིད་འཚོ་བའི་དགའ་བདེའི་ལམ་ཆེན་གསར་པ་བསྐྲུན། །
ཀུན་དགའི་ལེགས་སྐྱེས་དངུལ་ལོ་གསར་པའི་ལོངས་སྤྱོད་འཛད་མེད་གཏེར་དུ་བསྙིལ། །
རྒྱལ་གཅེས་སྙིང་དབུས་པདྨའི་འདབ་བརྒྱ་ཡང་ཡང་བཞད་པའི་མཆོད་སྡོང་ཆེར། །
ཕུན་ཚོགས་མཛེས་པའི་བདེ་ལེགས་དཔལ་དུ་ཕྱོགས་དུས་ཀུན་ཏུ་ཤིས་པ་བསྩོལ། །
དཔྱིད་གསར་སྒེག་མོའི་དུང་བའི་མེ་ཏོག་འཛིན་མའི་བཞིན་གྱི་དཔལ་དུ་བཞད། །
ནམ་མཁའི་ལྷ་མོའི་ཆུ་འཛིན་ཕྲེང་བས་མཛའ་བའི་གསང་གཏམ་རོལ་མོ་དཀྲོལ། །
ཁུ་བྱུག་སྔོན་མོའི་ཆགས་པའི་ཟོལ་གྱིས་སྙན་འཇེབ་མགྲིན་པའི་རྒྱུད་མང་སྒྲེང་། །
རི་ཀླུང་ཀུན་ཏུ་དགའ་བའི་མདངས་ལྡན་འདབ་བརྒྱའི་མེ་ཏོག་ཕྱོགས་ཀུན་གཏོར།།
