༄༅། །ཇ་བཤད།

རྩོམ་སྒྲིག་པ། དབང་ཆེན།ཡོང་ཁུངས།ངེད་དྲ་བ། སྤེལ་དུས། 01-13


     

          གཡས་གསེར་སྐྱེམས་ནང་ལ་ཇ་སྣ་ཡོད། །ཇ་འདི་ཡི་འབྱུང་ཁུངས་བཤད་པ་ན། །ཤར་རྒྱ་ནག་བཀྲ་ཤིས་རི་བོ་ནས། །ཚོང་དཔོན་ནོར་བུ་བཟང་པོ་གཅིག །ལག་དོ་ཀརྨ་བཀྲ་ཤིས་གཉིས། །རྒྱབ་དྲེལ་མི་ཉག་འཚེར་མོ་གསུམ། །རྒྱ་ནག་པོའི་ཇ་གཡང་འབེབས་པའི་དུས། །ཉིན་རེའི་ཉིན་གྱི་ཤོག་དཀར་ཇ། །སྲིབ་རིའི་སྲིབ་ཀྱི་ཤོག་ནག་ཇ། །ཉིན་སྲིབ་བར་གྱི་ཤོག་དམར་ཇ། །ཇ་རབ་ཇ་ཡི་བླ་མ་དང༌། །རྒྱ་ཇ་མེ་ཏོག་གཡང་འཛིན་གཅིག །ཏིལ་འབྲུ་ཇ་ཡི་དཔོན་པོ་གཉིས། །ཅན་ཤིང་ཇ་ཡི་དཔའ་བོ་གསུམ། །འབྲུ་དང་ཇ་ཡི་མ་བྱན་བཞི། །ལྷ་ཇ་ཇ་ཡི་གཡོག་མོ་ལྔ། །ཀོང་རྩི་ཇ་ཡི་གཡོག་དང་དྲུག །རྫ་ཆུ་བསིལ་མ་དེ་དང་བདུན། །འབྲི་མར་སེར་པོ་དེ་དང་བརྒྱད། །བྱང་ཚྭ་དཀར་ཡག་དེ་དང་དགུ། །དགུ་སེར་ཇ་ཡི་དགུ་དཀྲུག་བརྒྱབ། །ཇ་ཐེངས་གསུམ་བཞེས་དང་དབུ་འཕང་མཐོ། །དབང་པོ་གསལ་ཞིང་རིག་པ་རྣོ། །ལྷ་བླ་མས་གསོལ་ན་ཆོས་སྒོ་ཡངས། །གོང་དཔོན་པོས་གསོལ་ན་ཁྲིམས་སྒོ་ཡངས། །མ་སྲུ་མོས་གསོལ་ན་གནས་སྒོ་ཡངས། །བུ་ཚ་བོས་གསོལ་ན་དགྲ་མགོ་ནོན། །སྨན་བུ་མོས་གསོལ་ན་བག་འགྲོ་བྱེད། །ཆུང་བྱིས་པས་གསོལ་ན་རྩེད་ར་རྒྱས། །གཉེན་ཕོ་མོ་རྣམས་ཀྱིས་རེ་རེ་མཆོད། །རྟགས་དང་རྟེན་འབྲེལ་འགྲིག་ལེ་ཡིན། །ལས་དང་སྨོན་ལམ་བཟང་ལེ་ཡིན། །


རྩོམ་ཡིག་རྗེས་མ།
༄༅། །བོད་སྤྱིའི་ཆས་གོས།

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1