པ་སངས་སྒྲོལ་དཀར།
ཆུ་འཛིན་དབང་པོ་དགུང་སྔོན་དབྱིངས་སུ་ལྡིང་། །
བཅུད་ལྡན་སྦྲང་ཆར་འཛིན་མའི་ཁྱོན་དུ་ཁྱབ། །
ཐུང་ཐུང་དུས་རབས་གཅིག་གི་མཛད་འཕྲིན་གྱིས། །
འཛམ་གླིང་སྐྱེ་འགྲོའི་ཡིད་དབང་ཅི་དགར་འཕྲོག །
མཚར་མཚར་རླབས་ཆེན་རྒྱལ་ཁའི་གསར་གཏོད་དང་། །
མང་མང་བྱ་བཞག་དབྱར་མཚོ་རྒྱས་མཐོང་ཚེ། །
ལྷུག་ལྷུག་ངག་གི་སྒོ་བར་ལེགས་ཕྱེ་ནས། །
ཡང་ཡང་བསྟོད་གླུ་མི་འཆོར་རང་དབང་ཅི། །
ལང་ལོང་དུས་ཀྱི་འགྱུར་བའི་རླབས་ཕྲེང་ཁྲོད། །
མག་མོག་བགྲོད་པ་མི་བདེའི་སྐབས་སྲིད་ཀྱང་། །
འ་འུར་ཀུན་སེམས་གཅིག་མཐུན་སྐྱ་རེངས་ཀྱིས། །
གསལ་གསལ་རེ་བའི་འོད་སྣང་ཚུར་ལ་བསུས། །
ཟབ་ཟབ་ཚན་རྩལ་འཕྲུལ་གྱི་རྒྱ་མཚོ་ཡི། །
མཐའ་མཐའི་གནས་ལ་དཔྱོད་པའི་གཟིངས་པོ་ཆེས། །
མྱུར་མྱུར་རླབས་ཀྱི་ཕྲེང་བ་བཅད་ཙ་ན། །
རབ་རིབ་གསང་བའི་གནད་ཀུན་ལྷུག་གེར་གྲོལ། །
མཛེས་པའི་སློབ་གླིང་ཀུན་འདུས་ར་བ་རུ། །
མཆོར་སྒེག་ལང་ཚོས་སྙེམས་པའི་སློབ་བུའི་ཚོགས། །
མཁྱེན་བརྩེ་ནུས་པའི་དགེ་ཚོགས་བཤེས་གཉེན་དྲུང་། །
འཆད་རྩོད་རྩོམ་པའི་གནད་ལ་བརྩོན་འདི་སྤྲོ། །
ཐབས་མཆོག་གཞན་གསོས་བུ་མོའི་དབྱངས་དང་འགྲོགས། །
དྲི་བཞོན་བུ་མོ་གང་སར་ལྡང་བའི་མཐུས། །
ཟླུམ་གཟུགས་གོ་ལའི་ཏོག་ཏུ་རབ་མཛེས་པའི། །
རིག་གནས་འཕེལ་རྒྱས་དཔྱིད་དཔལ་ཀུན་ནས་བསུས། །
ཚགས་སུ་ཚུད་པའི་སྨན་བཅོས་སྒྲིག་གཞི་དང་། །
སྤྱོད་ཡོན་གཉིས་ལྡན་ལྷ་རྗེའི་མཛད་པ་ལས། །
ནད་རིགས་བཞི་བརྒྱ་རྩ་བཞིའི་མགོ་གནོན་གྱིས། །
འགྲོ་བའི་ནད་ཀྱི་གདུང་བ་མ་ལུས་སེལ། །
ཁོར་ཡུག་འཕྲོད་བསྟེན་བཅོས་སྒྲིག་སྲོལ་བཟང་དང་། །
སྤྱི་འབངས་བྱང་ཚད་མཐོར་འདེགས་མཛད་མཆོག་གིས། །
རི་མཐོ་ས་གཙང་ནགས་ལས་འཕེལ་རྒྱས་ཀྱི། །
འབྱུང་ཁམས་བདེ་བའི་ཁོར་ཡུག་ཀུན་ནས་གཏོད། །
ཇི་ལྟར་བྱ་ཡི་ནམ་འཕང་གཅོད་ཚོད་ལས། །
ནམ་མཁའི་མཐའ་ལ་ཐུག་པའི་ནུས་མེད་བཞིན། །
ཚན་རྩལ་སློབ་གསོ་རིག་གནས་སྨན་བཅོས་སོགས། །
ཟུར་ཙམ་གླེང་བ་རྒྱ་མཚོའི་ཆུ་ཐིགས་ཙམ། །
གཟིགས་དང་འཕེལ་རྒྱས་གསར་པའི་དགའ་སྟོན་གྱི། །
དགའ་བདེའི་རྣམ་པ་འཛིན་མའི་ཁྱོན་ལ་ཁྱབ། །
རླབས་ཆེན་མེས་རྒྱལ་ཕྱོགས་དང་ཕྱོགས་མཚམས་ནས། །
ཅན་བཞིའི་འཛུགས་སྐྲུན་རྒྱལ་མཚན་སྲིད་རྩེར་འཕྱར། །
མུ་མཐུད་གཟིགས་དང་སྟོབས་འབྱོར་མངའ་ཐང་གི །
རྒྱལ་ཁའི་བ་དན་ལྷབ་ལྷུབ་གཡོ་བའི་ཚེ། །
ཡུན་ཙམ་མི་ལྷོད་རེ་བའི་ལམ་ཆེན་ཐོག །
གོམ་ཆེན་སྤོ་བའི་སྤོབས་པ་མི་སྐྱེའམ། །
