མེ་ཏོག་གླིང་ཁའི་ཤེས་རབ་འཚོ།།
ཐར་བའི་མེ་ཏོག་གཅིག་ཏུ་བསྡུས།།
འདུ་ཤེས་བག་གི་རྟོག་པའི་ཟོར།།
རྨོངས་པའི་དྲ་བ་ཉག་ཅིག་ལ།།
མཛའ་བ་གཉིས་ཀྱི་རྨི་ལམ་བཟོས།།
ཚིག་ཕྲེང་གཏོར་བའི་ཟམ་པ་རུ།།
རྒྱུད་མངས་སྒྲ་ཡིས་ལས་སྤྲུལ་ཏེ།།
འཇའ་ཡི་ལག་པའི་གམ་དུ་ལོག།
ཅིའི་ཕྱིར་ལབ་ཅེས་ཞུས་པས་ན།།
ཚིག་གི་ཕྲེང་བའི་ངག་རིས་སུ།།
མ་ཆགས་པདྨའི་མདངས་འཕྲོ་སྟེ།།
དབྱངས་ཀྱི་མཁའ་ལ་ཁྱོད་ཉིད་བྱོན།།
ལས་ཀྱི་རི་མོའི་མཐིལ་དུ་འཁྱིལ།།
ལས་ཀྱི་སྣེ་རུ་རྨི་ལམ་བྱུང་།།
མཁའ་ལ་ཆས་པའི་ལྷ་མོ་ཀྱེ།།
མཚན་དཔེ་ལུས་ཀྱི་སྤྱན་རིས་ན།།
དད་པའི་མགུར་ཞིང་བླང་བར་བྱ།།
ཨ་ལ་གླུ་ཡི་གཞས་ཤིག་འཁྱིལ།།
ཐ་མོ་ངག་གིས་རྩལ་ཞིག་བཏོན།།
འཁྱུག་རྩལ་མྱུར་བའི་བྲོ་ཞིག་འཁྲབ།།
སིལ་སྡོང་བག་གི་སྙན་མོའི་ངག།
སྐྱོ་བའི་ངག་གིས་བླངས་པས་སོ།།
འདབ་མའི་གདན་ལ་བུང་བ་འཁོར།།
བསོད་ལྡན་ཅན་གྱི་མེ་ཏོག་ཀྱེ།།
ཁྱོད་ཉིད་ཕེབས་སའི་བར་སྣང་ལ།།
མྱུར་རྩལ་བྱང་བའི་རྟ་ཕོ་འགས།།
མཚན་དཔེ་ལུས་ལ་སྤྱན་འཁོར་བྱ།།
ཞེ་དྲག་མཚར་བའི་ངག་གི་གཏམ།།
མོས་པའི་ཚུལ་དུ་གསོན་པར་གྱིས།།
རྟོག་འགྱུ་ཞིག་གི་འཕྲུལ་བའི་ངག།
འཕྲིན་པའི་གམ་གྱི་ཡི་གེའི་ཚོགས།།
མིག་ཟུང་གཉིས་ཀྱི་གམ་དུ་ལོག།
ཁྱོད་ལ་བྲིས་པའི་བརྡ་རྙིང་དག།
སྟོན་ཁའི་རི་བོང་འཛིན་པ་འམ།།
ཟླ་བ་ཞེས་བྱ་དྭངས་གསལ་འཁྱིལ།།
