དང་པོ། སེམས་ཁམས་འཕྲོད་བསྟེན་གྱི་སྤྱིར་བཏང་གི་གོ་དོན།
སེམས་ཁམས་འཕྲོད་བསྟེན་ལ་བསམ་བློའི་འཕྲོད་བསྟེན་ཡང་ཟེར། གསོ་རིག་གཞུང་ལུགས་ནང་དུ་གནའ་སྔ་མོ་ནས་རང་གཅུན་བློ་སྦྱོང་ནན་བཤད་བྱས་ཡོད་པ་ལས་སེམས་ཁམས་བདེ་ཐང་ཕྱོགས་ལ་དོ་སྣང་བྱེད་དགོས་པ་གསལ་པོར་རྟོགས་ཐུབ་ལ། ང་ཚོས་འདི་ལྟར་གོ་བ་བླངས་ཆོག་སྟེ། སེམས་ཁམས་ལྷོད་ལ་བབས་པ་དང་མཐའ་འཁོར་གྱི་མི་དང་བྱ་བར་ཡར་སྐུལ་གྱི་བསམ་ཚུལ་ལེགས་པོ་བཅངས་པ། གཞན་ལ་བརྩི་བཀུར་བྱེད་པ། ཐོབ་ཤོར་ལ་མི་ལྟ་བ་བཅས་ཀྱིས་མི་དེའི་སེམས་ཁམས་བདེ་ཐང་ཡིན་པ་མཚོན་ཐུབ།
གཉིས་པ། སེམས་ཁམས་བདེ་ཐང་གི་སྣང་ཚུལ་རྒྱུན་འཁྱོངས་བྱེད་པ།
སེམས་ཁམས་དོ་མཉམ་ཡོང་བ་བྱ་རྒྱུ་དེ་མི་རང་ཉིད་ཀྱི་སེམས་ཁམས་སྲུང་སྐྱོབ་བྱེད་པའི་དགོས་མཁོ་དང་། མི་དེའི་རྒྱུན་ལྡན་འཚོ་བ་དང་ལུས་སེམས་གཉིས་ཀའི་བདེ་ཐང་སྲུང་འཛིན་བྱེད་པའི་ཆ་རྐྱེན་གཙོ་ཤོས་ཤིག་ཡིན། གཤམ་དུ་སེམས་ཁམས་དོ་མཉམ་ཐད་ཀྱི་རྩ་དོན་འགའ་བཏོན་ཡོད།
རང་ཉིད་ཀྱི་འདུ་ཤེས་བཟང་པོ་ཡིན་དགོས།
རང་ཉིད་ཀྱི་འདུ་ཤེས་བཟང་པོ་ཞིག་ཡིན་དགོས་པའི་གནད་འགག་ནི་རང་གིས་རང་ཉིད་ལ་རྒྱུས་ལོན་དང་རང་གཅེས་བྱེད་པ་དེ་ཡིན། རང་གིས་རང་ཉིད་ལ་རྒྱུས་ལོན་བྱེད་པ་ནི་རང་གི་ནུས་པ་དང་མངོན་འགྱུར་ཆ་རྐྱེན། དགའ་སྣང་དང་སྤྲོ་ཕྱོགས། དགེ་སྐྱོན་སོགས་སེམས་ཁོང་ནས་གསལ་པོར་རྟོགས་དགོས་ཤིང་། རང་གི་ནུས་པ་དང་འཚམ་པའི་འཚོ་བའི་དམིགས་འབེན་གདམ་གསེས་བྱེད་པ་ལས། རང་ཚོད་ལས་བརྒལ་བའི་རེ་བ་མཐོན་པོ་ཞིག་ལ་བསྙེག་ཚེ་ཡུན་རིང་པོར་ལུས་སེམས་གཉིས་ཀ་བདེ་ལ་འབབ་པའི་གོ་སྐབས་ཀྱིས་དབེན་པ་རེད།
རང་མོས་ཀྱིས་སྤྱི་ཚོགས་ཁོར་ཡུག་ལ་གོམས་འདྲིས་བྱེད་པ།
གོམས་འདྲིས་ནི་ཁེར་རྐྱང་གིས་འཚོ་གནས་ཀྱི་དགོས་མཁོ་སྐོང་ཆེད་ཁོར་ཡུག་སྙོམས་སྒྲིག་བྱེད་པའི་ནུས་པ་འདོན་པ་ཞིག་ལ་གོ་བ་ཡིན། དངོས་ཡོད་འཚོ་བ་གདོང་གིས་བསུ་བ་དང་ཁོར་ཡུག་འདྲ་མིན་ལ་གོམས་འདྲིས་བྱེད་ཐུབ་པ་བྱ་དགོས། འཚོ་བ་ནི་མ་གཞི་ནས་རྙོག་འཛིང་ཆེ་ཞིང་འགྱུར་ལྡོག་མང་བ་དང་། སྤྱི་ཚོགས་ཁྲོད་དུ་ཡང་དཀའ་གནད་དང་འགྲན་རྩོད་ཀྱིས་ཁེངས་ཡོད་པས་ན། ང་ཚོས་ངེས་པར་དུ་དངོས་ཡོད་ཀྱི་རྣམ་པ་གཞི་བྱས་ཏེ་རང་ཉིད་སྙོམས་སྒྲིག་བྱས་མཐར། སྤྱོད་གོ་འཐུས་པའི་དམིགས་འབེན་ཞིག་གཏན་ལ་འབེབས་དགོས་ཤིང་། ཧོལ་རྒྱུག་གཏན་ནས་མི་བྱེད་པར་རྒྱུན་ལྡན་དང་ཕན་ནུས་ལྡན་པའི་ངང་ནས་འཚོ་བའི་ཁྲོད་ཀྱི་སྣང་ཚུལ་མཐའ་དག་ལ་གོམས་འདྲིས་བྱ་དགོས།
མི་དང་མིའི་བར་ལ་འབྲེལ་བ་ལེགས་པོ་ཞིག་ཡོད་དགོས།
སྤྱི་ཚོགས་འཚོ་བའི་ཁྲོད་མི་དང་མིའི་བར་ལ་འབྲེལ་བ་ལེགས་པོ་ཞིག་ཡོད་ཚེ། ཁེར་རྐྱང་དང་རང་དམན་གྱི་ཚོར་སྣང་སེལ་ཏེ་བདེ་འཇགས་དང་རང་རློམ་གྱི་དགེ་མཚན་འཐོབ་ངེས་ཡིན། གཞན་གྱིས་མཉམ་འཇོག་དང་ཐུགས་ཁུར་གནང་བར་རེ་བ་ནི་མིའི་རིགས་ལ་ལྷན་སྐྱེས་ནས་ཡོད་པའི་ཀུན་སློང་ཞིག་ཡིན་ལ། གཞན་གཅེས་ཀྱི་སེམས་དང་བཅས་མི་གཞན་ལ་ཐུགས་ཁུར་དང་རོགས་རམ་བྱས་ཚེ་ཁོ་ཚོའི་སེམས་གཏིང་གི་དགོས་མཁོ་སྐོང་བ་དང་མཉམ་དུ་ཁྱེད་ལའང་ཞར་དུ་མི་གཞན་པའི་འཚོ་བའི་ཁྲོད་དུ་གོ་གནས་གལ་ཆེན་ཐོབ་ཡོད། ཕན་ཚུན་ལ་སེམས་ཁུར་དང་རོགས་རམ་བྱས་ན་སེམས་ཁམས་བདེ་ཐང་ལ་སྐུལ་འདེད་ཀྱི་ནུས་པ་ཐོན་ངེས་རེད། མི་གཞན་ལ་རོགས་རམ་བྱེད་པར་སྤྲོ་བ་ནི་སྤྱོད་བཟང་ཞིག་ཡིན་ལ། མི་གཞན་ལ་རོགས་རམ་བྱེད་འདོད་ཀྱི་འདུ་ཤེས་ཟབ་པའི་དུས་དེར། མི་དེའི་ཡིད་ཆེས་དང་རང་བཀུར་གྱི་ཚད་ཡང་ཇེ་མཐོར་འགྲོ་ངེས་ཡིན།
ཧུར་ཐག་གིས་ངལ་རྩོལ་དངོས་ལ་ཞུགས་པ།
ངལ་རྩོལ་གྱིས་གཟུགས་གཞི་ཁྱོན་ཡོངས་ནས་གོང་འཕེལ་དུ་གཏང་བ་དང་། ལྷག་པར་དུ་བློ་རིག་བཀྲ་བར་སྐུལ་འདེད་གཏང་ངེས་ཡིན་ལ། སེམས་མི་སྐྱིད་པ་དང་རང་གིས་རང་ལ་བརྩི་མཐོང་བྱེད་པ་ཐལ་དྲགས་པ་དང་སྐྱོ་སྣང་སེལ་ཐུབ་ཅིང་། བློ་སེམས་རྩེ་གཅིག་གིས་ངལ་རྩོལ་ལ་ཞུགས་ན་འཚོ་བ་ཕུན་སུམ་ཚོགས་པར་འགྱུར་བ་དང་རང་ཉིད་སྤྱི་ཚོགས་ཀྱི་ཁྲོད་གནས་པའི་རིན་ཐང་ལའང་ཤེས་རྟོགས་འབྱུང་བར་མ་ཟད། འཚོ་བ་ལ་དོན་སྙིང་ལྡན་ཞིང་བདེ་སྐྱིད་ལྡན་པའི་ཚོར་སྣང་སྐྱེ་ངེས་ཡིན།
དཀའ་གནས་ལས་ཐར་ཐབས་བྱེད་དགོས།
ཧུར་ཐག་གིས་རང་གི་འཚོ་བ་རོལ་སྟངས་དང་འཚོ་བའི་དམིགས་འབེན་སྙོམས་སྒྲིག་བྱས་ཏེ། གོམས་གཤིས་ངན་པ་མཐའ་དག་ལེགས་སྒྱུར་བྱ་དགོས་ཤིང་། ལྷག་པར་དུ་འཚོ་བ་དང་བྱ་བའི་ཁྲོད་དཀའ་སྡུག་ལ་འཕྲད་དུས། སྔ་མོ་ནས་དེ་དག་ལས་ཐར་ཐབས་མ་བྱས་ཚེ་སེམས་ཁམས་བདེ་ཐང་ལ་ངན་ཤན་ཟབ་མོ་ཐེབས་ངེས་ཡིན། །
