དམངས་འཚོ་རྩ་བར་བཟུང་ནས་བདེ་སྐྱིད་ལྡན་པའི་འཚོ་བ་གསར་པ་བཏོད།

རྩོམ་སྒྲིག་པ།ཚེ་དཔལ། ཡོང་ཁུངས།བོད་ལྗོངས་ཉིན་ཚགས། སྤེལ་དུས། 01-04



           ལོ་གཅིག་རིང་། བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཐོག་མཐའ་བར་གསུམ་དུ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱས་ནས། གྲོང་གསེབ་དར་རྒྱས་ཀྱི་འཐབ་ཇུས་ལག་བསྟར་བྱ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་ལག་བསྟར་དོན་འཁྱོལ་གཏིང་ཟབ་ཀྱིས་དམངས་འཚོ་ལེགས་གཏོང་དང་མི་སེམས་གཅིག་ཏུ་བསྒྲིལ་རྒྱུ་འགོ་འཛུགས་ས་དང་དོན་ལ་བབས་སར་བརྩི་བ་དང་དམངས་འཚོའི་བྱ་གཞག་དེ་སྤྱི་ཚོགས་ཀྱི་བྱ་གཞག་མཐའ་དག་གི་ཆེས་མདུན་མར་བཞག་ནས་མི་དམངས་མང་ཚོགས་ཀྱི་འཚོ་བའི་ཆུ་ཚད་རྒྱུན་ཆད་མེད་པར་མཐོ་རུ་བཏང་ཡོད།
           རྨང་གཞིའི་སྒྲིག་བཀོད་ཉིན་བཞིན་འཐུས་སྒོ་ཚང་དུ་སོང་བ།
           ཉེ་བའི་ལོ་ཤས་རིང་། བོད་ལྗོངས་ཀྱིས་ཚ་ཚ་འུར་འུར་ངང་རྨང་གཞིའི་སྒྲིག་བཀོད་འཛུགས་སྐྲུན་བྱས་པ་དེ་ནི་བོད་ཀྱི་དཔལ་འབྱོར་དང་སྤྱི་ཚོགས་མགྱོགས་མྱུར་འཕེལ་རྒྱས་འགྲོ་བའི་བསྡུས་རིས་ཤིག་རེད།

           གཞུང་ལམ་གྱི་ལམ་ཐིག་མགྱོགས་མྱུར་མང་དུ་ཕྱིན་ཞིང་། ད་ཆ། སྒྲིག་ཚུད་གྲོང་ཚོ་ཚང་མར་གཞུང་ལམ་ཤར་གཏོང་ཐུབ་ནས་བོད་ཀྱི་གཞུང་ལམ་ཤར་གཏོང་ཐུབ་པའི་ལམ་ཐག་སྤྱི་ལེ་ཁྲི་11.88ཟིན་པ་དང་། ཤང་དང་གྲོང་རྡལ་དང་སྒྲིག་ཚུད་གྲོང་ཚོར་གཞུང་ལམ་ཤར་གཏོང་ཐུབ་ཚད་94%དང་76%སོ་སོར་ཟིན་ཡོད། མྱུར་བགྲོད་གཞུང་ལམ་དང་དེ་བཞིན་རིམ་པ་དང་པོའི་གཞུང་ལམ་ཤར་གཏོང་ཐུབ་པའི་ལམ་ཐག་སྤྱི་ལེ་700ཙམ་ཟིན་ཡོད།

           ལྕགས་ལམ་འཛུགས་སྐྲུན་ཉིན་རེ་ལས་མ་འདས་པར་འཕེལ་རྒྱས་ཕྱིན་ཞིང་། ད་ལོའི་ཟླ་6པར་ལྷ་ས་ནས་ཉིང་ཁྲི་བར་གྱི་ལྕགས་ལམ་ཤར་གཏོང་ཐུབ་པ་དང་། ད་བར་ལྷ་ས་དང་། གཞིས་རྩེ། ནག་ཆུ། ལྷོ་ཁ། ཉིང་ཁྲི་བཅས་གྲོང་ཁྱེར་5ལ་ལྕགས་ལམ་ཤར་གཏོང་ཐུབ་ཡོད།

           མཁའ་འགྲུལ་སྐྱེལ་འདྲེན་དེ་བས་སྟབས་བདེ་རུ་ཕྱིན་ཞིང་། འདི་ལོའི་ཟླ་8པར་ལྷ་ས་གོང་དཀར་རྒྱལ་སྤྱིའི་གནམ་གྲུ་ཐང་གི་T3གནམ་ཐང་བབས་ཚུགས་སྤྱོད་འགོ་ཚུགས་པ་དེས་2025ལོར་སླེབས་སྐབས་འགྲུལ་པ་སྐྱེལ་འདྲེན་བྱེད་ཚད་མི་ཐེངས་ཁྲི་900དང་། དངོས་ཟོག་དང་སྦྲག་ཐོག་བསྐུར་མ་དབོར་འདྲེན་བྱེད་ཚད་ཏུན་ཁྲི་8 གནམ་གྲུ་འབབ་འཕུར་བྱེད་ཚད་ཁྲི་5.85བཅས་ཀྱི་དམིགས་ཚད་ཀྱི་དགོས་མཁོ་སྐོང་ཐུབ་རྒྱུ་རེད། ཆབ་མདོའི་སྤང་མདའ་དང་། ཉིང་ཁྲིའི་སྨན་གླིང་། གཞིས་རྩེའི་ཞི་བདེ། མངའ་རིས་ཀྱི་དགུན་ས་སོགས་ཡན་ལག་གནམ་གྲུ་ཐང་བསྐྲུན་ཟིན་པ་དང་། རྒྱལ་སྤྱི་རྒྱལ་ནང་གི་མཁའ་ལམ་140ཟིན་པ། གྲོང་ཁྱེར་66ལ་ཤར་གཏོང་ཐུབ་པ་བཅས་རེད།
           ཐོན་ལས་གྲུབ་ཆ་ཟམ་མི་ཆད་པར་ལེགས་སུ་ཕྱིན་པ།
           ཐོན་ལས་དར་རྒྱས་གཏོང་བ་ནི་གྲོང་གསེབ་ཕྱོགས་ཡོངས་ནས་དར་རྒྱས་གཏོང་བའི་མཚོན་རྟགས་གལ་ཆེན་ཞིག་ཡིན་པས། ཁྱད་ལྡན་ཐོན་ལས་འཕེལ་རྒྱས་དང་རྒྱ་སྟོབས་ཆེ་རུ་གཏོང་བ་དང་། ཐོན་ལས་སྤུས་ཚད་མཐོ་བ་དང་ཕན་འབྲས་ཆེ་བའི་འཕེལ་རྒྱས་ལ་སྐུལ་འདེད་བཏང་བས། མི་དམངས་ཀྱི་བདེ་སྐྱིད་འཚོ་བ་ཕུན་སུམ་ཇེ་ཚོགས་སུ་ཕྱིན་ཡོད།

           བསྡོམས་རྩིས་བྱས་པར་གཞིགས་ན། བོད་ལྗོངས་ཀྱི་གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་14598ཟིན་ནས། ལོ་གོང་མ་ལས་12.7%འཕར་བ་དང་ལོ་18བསྟུད་མར་གྲངས་གནས་གཉིས་འཕར་བ་རྒྱུན་འཁྱོངས་ཐུབ་པ་དང་། ཉེ་བའི་ལོ་5ཡི་རིང་འཕར་ཚད་13%ཙམ་རྒྱུན་འཁྱོངས་ཐུབ་སྟེ་འཕར་ཚད་རྒྱལ་ཡོངས་ཀྱི་ཨང་དང་པོར་སླེབས་ཡོད། གྲོང་ཁྱེར་དང་གྲོང་རྡལ་གྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་41156ཟིན་ནས་ལོ་གོང་མ་ལས་10%འཕར་ཡོད།
           མི་དམངས་ཀྱི་འཚོ་བ་སྔར་བས་བདེ་སྐྱིད་ལྡན་པར་གྱུར་པ།
           འདི་ལོའི་ཟླ་བདུན་པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ལྗོངས་སུ་རྟོག་ཞིབ་གནང་རིང་། ཡུལ་མི་ཟླ་བ་རྒྱལ་མཚན་གྱི་ཁྱིམ་དུ་སྐུ་མགྲོན་ལ་ཕེབས་སྐབས་ནང་མི་ཚང་མར་སེམས་འགུལ་ཚད་མེད་ཐེབས་ཡོད། ཟླ་བ་རྒྱལ་མཚན་གྱི་ཁྱིམ་དུ་ད་ཆ་ས་ཞིང་མུའུ་29ཡོད་པའི་ནང་ས་ཞིང་མུའུ་22ནང་བཤུག་བཏང་བ་དང་ས་ཞིང་ལྷག་མ་མུའུ་7ལ་གྲོ་དང་། མ་རྨོས་ལོ་ཏོག བྲ་བོ་སོགས་བཏབ་ཡོད། ལོ་དེ་དག་རིང་ཁོ་ཚོའི་ཁྱིམ་གྱིས་སྐྱེལ་འདྲེན་དང་། ཁམ་བུའི་མེ་ཏོག་དུས་ཆེན་གྱི་ཁེ་སྤོགས་བགོ་བཤའ། ས་ཞིང་ནང་བཤུག་གཏོང་བ། འདེབས་འཛུགས་གསོ་ཚགས་བཅས་ལ་བརྟེན་ནས་ལོ་གཅིག་ལ་ཡོང་འབབ་སྒོར་ཁྲི་30ལྷག་ཙམ་ཡོང་གི་ཡོད།

           ཉེ་བའི་ལོ་ཤས་རིང་། ཀ་ལ་གྲོང་ཚོས་གཞུང་ལམ་མཁྲེགས་འགྱུར་དང་། མདོང་ལམ་དྲ་བ་བཟོས་པ། སྔོ་འགྱུར་སོགས་ཀྱི་འདུ་འགོད་ལག་ལེན་གཅིག་སྡུད་བསྟར་བས་ཤིང་འཛུགས་ནགས་བཟོའི་རྒྱ་ཁྱོན་མུའུ་240ཟིན་པ་དང་། སྔོ་ལྗང་ར་སྐོར་དང་ཀྭ་རིགས་སམ་ཤིང་འབྲས་སྒོ་ར་འཛུགས་སྐྲུན་ལ་སྐུལ་འདེད་བཏང་བ། སྒོ་ར་སྔོ་འགྱུར་ཁྱོན་ཡོངས་ལ་ཁྱབ་པ་བཅས་བྱས་པས། གྲོང་ཚོ་ཡོངས་ཀྱི་སྐྱེ་ཁམས་ཁོར་ཡུག་མངོན་གསལ་དོད་པོས་ལེགས་སུ་ཕྱིན་ཡོད།
           དམངས་འཚོ་ལེགས་སུ་གཏོང་མཇུག་འགྲིལ་མཐའ་མེད། མི་དམངས་ཀྱིས་བདེ་སྐྱིད་ལྡན་པའི་འཚོ་བར་བཅངས་པའི་རེ་འདོད་ནི་ང་ཚོའི་འབད་འཐབ་དམིགས་ཚད་རེད། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་དང་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་སྐུལ་འདེད་འོག བོད་ལྗོངས་ཀྱིས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་དང་བོད་རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་གོ་སྐབས་སུ་བྱས་ཚེ། དམངས་འཚོའི་རྒྱུགས་ལན་སྔར་བས་ཕུན་སུམ་ཇེ་ཚོགས་སུ་འགྲོ་བ་དང་མི་དམངས་ཀྱི་འཚོ་བའང་སྔར་བས་བདེ་སྐྱིད་ལྡན་པ་ཞིག་ཡོང་ངེས་རེད།

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1