ཉེ་བའི་ལོ་འགའི་རིང་། བོད་ལྗོངས་ཉིང་ཁྲི་གྲོང་ཁྱེར་གྱིས《བརླན་ས་སྲུང་སྐྱོང་དང་སླར་གསོའི་ལམ་ལུགས་ཀྱི་ཇུས་གཞིའི》བླང་བྱ་དོན་འཁྱོལ་ནན་ཏན་བྱས་ཏེ། བརླན་ས་སྲུང་སྐྱོང་སླར་གསོ་དང་དྲིལ་སྒྲོག་སློབ་གསོའི་ལས་དོན་ཤུགས་ཆེན་སྤེལ་བས། ཡར་ཉང་རྒྱལ་ཁབ་བརླན་སའི་སྤྱི་གླིང་དུ་བསྡོམས་པས་བརླན་སའི་སྔོ་ཁེབས་མུའུ1839སླར་གསོ་བྱས་ནས། བརླན་སའི་སྐྱེ་ཁམས་ལ་སྲུང་སྐྱོང་ནུས་ལྡན་བྱས་ཡོད།
ཤེས་གསལ་ལྟར་ན། 2016ལོ་ནས་བཟུང་གྲོང་ཁྱེར་ཡོངས་ཀྱིས་བསྡོམས་པས་མ་དངུལ་སྒོར་ཁྲི3010བཏང་ནས། ཡར་ཉང་རྒྱལ་ཁབ་བརླན་སར་སྲུང་སྐྱོང་དང་སླར་གསོའི་ལས་གཞི་དང་། ནགས་ལས་བཅོས་སྒྱུར་དང་འཕེལ་རྒྱས་ཀྱི་མ་དངུལ། ཡར་ཉང་བརླན་སའི་ཁ་གསབ་རོགས་དངུལ་སོགས་བརླན་ས་སྲུང་སྐྱོང་དང་སླར་གསོའི་ལས་གཞི4ལག་བསྟར་བྱས་ཡོད། ཡར་ཉང་རྒྱལ་ཁབ་བརླན་སའི་སྤྱི་གླིང་དོ་དམ་ས་ཚིགས་དང་ས་མཚམས་རྡོ་རིང་སོགས་རྨང་གཞིའི་སྒྲིག་བཀོད་རིམ་བཞིན་འཐུས་ཚང་དུ་བཏང་བ་དང་། བརླན་སའི་ཉེ་འཁོར་གྱི་རོང་འབྲོག་པའི་དོ་དམ་པ70གདན་ཞུ་བྱས་ནས། བརླན་སའི་རྒྱུན་ལྡན་སྐོར་སྐྱོད་དང་དོ་དམ་སྲུང་སྐྱོང་གི་ལས་དོན་སྤེལ་ལ། མིས་ཐབས་ལ་བརྟེན་ནས་སྡོང་འཛུགས་ནགས་སྐྲུན་བྱས་ནས་སྔོ་ཁེབས་སྐྱར་གསོ་དང་། རང་བྱུང་འགོག་གསོ། ཕྱུགས་བཀག་སླར་གསོ། ཆུ་ལམ་གཙང་གཤོང་སོགས་ཀྱི་ནུས་ལྡན་བྱེད་ཐབས་ཧུར་ཐག་སྒོས་སྤྱད་དེ། ཞན་འགྱུར་བརླན་སའི་སྲུང་སྐྱོང་དང་སླར་གསོ་བྱེད་ཤུགས་ཆེ་རུ་བཏང་སྟེ། བརླན་སའི་སྐྱེ་ཁམས་བྱེད་ནུས་རིམ་བཞིན་སླར་གསོ་བྱུང་ནས་ཡར་ཉང་རྒྱལ་ཁབ་བརླན་སའི་སྤྱི་གླིང་གི་རྣམ་པ་ལེགས་པོ་མངོན་ཡོད།
