༄༅།། འབྲས་སྐྲན་ནི་བཟའ་བཏུང་ ལས་བྱུང་བ་ཡིན་ནམ།

རྩོམ་སྒྲིག་པ།ཚེ་དཔལ། ཡོང་ཁུངས།མཚོ་སྔོན་བོད་ཡིག་གསར་འགྱུར། སྤེལ་དུས། 02-28


        “ཟས་ལ་ཟ་ཚོད་མེད་ན།ཕོ་བར་ན་ཟུག་འབྱུང་།”“ཟས་ཞིམ་བག་མེད་རོལ་ན་དུག་ཏུ་འགྱུར།”ཞེས་པ་སོགས་ནི《ཧོང་ཏི་སྨན་གཞུང》ནང་གི་བཟའ་བཏུང་སྐོར་གྱི་རྣམ་བཤད་རེད།དེས་ནད་རིགས་མང་པོ་ཞིག་ནི་བཟའ་བཏུང་དོ་མཉམ་མིན་པ་ལས་བྱུང་བ་བསྟན་ཞིང་།བཟའ་བཏུང་གི་གནོད་པ་ཆེས་ཐེབས་སླ་བ་ནི་ཕོ་མཚེར་གཉིས་ཀ་ཡིན་པ་དང་།ཕོ་མཚེར་གཉིས་ལ་གནོད་པ་ཐེབས་ན་ལུས་པོར་བརླན་འཁོར་བ་དང་ལུད་པ་འབྱུང་བ།ཚ་རྒྱག་པ་བཅས་ཀྱིས་འབྲས་སྐྲན་གྱི་ས་བོན་བཏབ་པ་རེད།

བཟའ་བཏུང་གི་གོམས་སྲོལ་མི་ལེགས་པ་ལས་འཇུ་ལམ་གྱི་འབྲས་སྐྲན་འབྱུང་བ།
        ཞིབ་འཇུག་ལས་མངོན་པ་ལྟར་ན།འབྲས་སྐྲན་གྱི་འབྱུང་རྐྱེན་ཁྲོད་བཟའ་བཏུང་གིས30%ནས35%ཟིན་པ་དང་།བཟའ་བཏུང་གི་གོམས་སྲོལ་མི་ལེགས་པ་ནི་མིད་པའི་འབྲས་སྐྲན་དང་ཕོ་འབྲས།རྒྱུ་མའི་འབྲས་སྐྲན་སོགས་ལ་འབྲེལ་བ་དམ་པོ་ཡོད།ནད་ཐོག་ལག་ལེན་ཁྲོད་ང་ཚོས་འབྲས་སྐྲན་ནད་པ་མང་ཆེ་བ་ཞིག་ལ་བཟའ་བཏུང་དོ་མཉམ་མིན་པའི་གནས་ཚུལ་ཏེ།དཔེར་ན་ཁ་འདེམ་ཆེ་བ་དང་།རྒྱས་བཟའ་རྒྱས་འཐུང་བྱེད་རྒྱུར་དགའ་བ།ཡང་ན་ཕོག་ཐུག་ཆེ་བའི་ཟས་རིགས་བཟའ་རྒྱུར་དགའ་བ་སོགས་ཀྱི་གནས་ཚུལ་ལྡན་པ་ཤེས་ཐུབ།
        རང་རྒྱལ་གྱི་མིད་པའི་འབྲས་སྐྲན་འབྱུང་ཚད་ཆེས་མཐོ་བའི་ས་ཆར་བརྟག་ཞིབ་བྱས་པ་ལས་མངོན་པ་ལྟར་ན།མིད་པའི་འབྲས་སྐྲན་གྱི་ནད་པའི་ཁྲོད། 7%ཡས་མས་ཤིག་སྐོམ་ཆུ་ཚ་མོ་དང་ཟས་རིགས་སྲ་མོའི་རིགས།མགྱོགས་ཟས་བཅས་བཟའ་བ་དང་ཆང་འཐུང་བ་དང་དུ་བ་འཐེན་རྒྱུར་དགའ་བ་རེད། ཆང་འཐུང་བ་དང་དུ་བ་འཐེན་པ།ཟ་མ་ཚ་མོ་དང་མགྱོགས་ཟས་བཟའ་བ་སོགས་གོམས་སྲོལ་ངན་པ་དག་གིས། མིད་པའི་འབྱར་སྐྱི་ལ་འཚིག་རྨས་དང་རུལ་རྨས་ངེས་ཅན་ཞིག་བཟོས་ཏེ།འབྱར་སྐྱིའི་ཕྲ་ཕུང་ལ་འཕར་སྐྱེ་རང་བཞིན་གྱི་ནད་འགྱུར་བྱུང་བ་ལས་འབྲས་སྐྲན་དུ་འགྱུར་བཞིན་པ་དེ་ཞིབ་འཇུག་ལས་བདེན་དཔང་བྱས་ཡོད།
        ཞིབ་འཇུག་ལས་མངོན་པ་ལྟར་ན།རང་བྱུང་ཁམས་སུ་སྨར་སྲིན་འཁྱོག་རྒྱུ་སེར་པོ་ཞིག་གིས་ཁྱབ་ཡོད་ལ།དེའི་ནང་གི་འཁྱོག་རྒྱུ་སེར་པོB1ནི་མིག་སྔར་ཤེས་པའི་འབྲས་སྐྲན་སློང་བྱེད་ཀྱི་དུག་གཙོ་བོ་ཡིན་པ་དང་།དུག་དེ་ལས་བྱུང་བའི་འཁྱོག་རྒྱུ་སེར་པོས་མཆིན་འབྲས་འབྱུང་བར་དེ་བས་ཀྱང་ནུས་པ་ཆེན་པོ་ཐོན་གྱིན་ཡོད།འཁྱོག་རྒྱུ་སེར་པོ་དེ་རྒྱུན་པར་བ་དམ་རུལ་བ་དང་མ་རྨོས་ལོ་ཏོག་རུལ་བ།འབྲས་རུལ་བ།སྲན་མ་རུལ་བ་བཅས་ཀྱི་ནང་དུ་མཐོང་ཐུབ།

རྒྱུན་དུ་ཚིལ་མཐོ་ཟས་རིགས་ཟོས་པ་ལས་ནུ་མའི་འབྲས་སྐྲན་འབྱུང་བ།
        རྒྱལ་ཁབ་འབྲས་སྐྲན་ལྟེ་གནས་ཀྱིས་ཁྱབ་བསྒྲགས་བྱས་པའི《2017ལོའི་ཀྲུང་གོའི་འབྲས་སྐྲན་གྱི་གནས་བབ་དང་འཕེལ་རྒྱས་ཐད་ཀྱི་སྙན་ཞུ》ལས་མངོན་པ་ལྟར་ན། ནུ་མའི་འབྲས་སྐྲན་གྱི་འབྱུང་ཚད་ནི་བུད་མེད་ཀྱི་སྐྲན་ནག་ལས་ཨང་དང་པོ་རེད།དེའི་རྒྱུ་རྐྱེན་གཙོ་བོ་ནི་མི་རྣམས་ཀྱི་བཟའ་བཏུང་གོམས་གཤིས་དང་གྲུབ་ཚུལ་ལ་འགྱུར་ལྡོག་བྱུང་བས་རེད།སྡོམ་རྩིས་ལས་མངོན་པ་ལྟར་ན།ནུ་མའི་འབྲས་སྐྲན་འབྱུང་ཚད་མཐོ་བའི་ས་ཁུལ་གྱི་མི་རྣམས་ཀྱིས་ཚིལ་སྣ་དང་སྤྲི་དཀར་མཐོ་བའི་ཟས་རིགས་གཙོ་བོར་བསྟེན་ཡོད་ལ།ཚིལ་སྣ་དང་སྤྲི་དཀར་མཐོ་བའི་ཟས་རིགས་རྒྱུན་དུ་བསྟེན་ན་ནུ་རྩའི་ཕུང་གྲུབ་འཕར་སྐྱེ་འབྱུང་བར་ཕོག་ཐུག་གཏོང་བ་དང་།དེ་ནི་ནུ་མའི་འབྲས་སྐྲན་འབྱུང་ཚད་མཐོ་བའི་རྒྱུ་མཚན་ཡིན་ནོ། །
        དེ་ལས་གཞན་ད་རུང་དར་ཁྱབ་ནད་རིགས་ལ་ཞིབ་འཇུག་བྱས་པ་ལས་མངོན་པ་ལྟར་ན།ནུབ་ཕྱོགས་རྒྱལ་ཁབ་ཀྱིས་དུས་ཡུན་རིང་པོར་ཚིལ་སྣ་མཐོ་བའི་ཟས་རིགས་བསྟེན་ཡོད་པས།ནུ་འབྲས་དང་གཤེར་རྨེན་འབྲས།ལོང་འབྲས་སོགས་ཀྱི་འབྱུང་ཚད་ཤར་ཕྱོགས་རྒྱལ་ཁབ་ལས་མངོན་གསལ་གྱིས་མཐོ་བ་རེད།སྲོག་ཆགས་ལ་ཞིབ་འཇུག་བྱས་པ་ལས་མངོན་པ་ལྟར་ན།དུས་ཡུན་རིང་པོར་སྤྲི་དཀར་མཐོ་བའི་ཟས་རིགས་མང་དུ་ཟོས་ན་འབྲས་སྐྲན་ཀྱི་འབྱུང་ཚད་ཇེ་མཐོར་འགྲོ་ཞིང་།འབྲས་སྐྲན་གྱི་འབྱུང་ཚད་དེ་སྤྲི་དཀར་གྱི་རིགས་སྣ་ལ་འབྲེལ་བ་གང་ཡང་མེད་པར་སྤྲི་དཀར་གྱི་མང་ཉུང་ལ་འབྲེལ་བ་དམ་པོ་མཆིས། །


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1