འདི་ནི་ཉིན་དཀར་འགུལ་སྐྱོད་བྱེད་པའི་འུག་པའི་སླར་སོས་རི་མོ་ཡིན།

འདི་ནི་འུག་པའི་འགྱུར་རྡོ་ཡིན།

        ད་ལྟ་འཚོ་གནས་བྱེད་བཞིན་པའི་འུག་པ་མང་ཆེ་བ་ནི་སྒྲ་མེད་པའི་མཚན་མོར་འགུལ་སྐྱོད་བྱེད་བཞིན་པའི་བྱ་རིགས་ཡིན་ལ། མི་མང་ཆེ་བ་ཞིག་གིས་མི་ཤེས་པ་ནི། འུག་པ་རིགས་ཉུང་ཤས་ཤིག་གིས་ཉིན་མོར་ཁ་ཟས་རྔོན་ཞིང་ཉིན་དཀར་འགུལ་སྐྱོད་བྱེད་རྒྱུར་དགའ། རང་རྒྱལ་གྱི་ཚན་རིག་པས་མཚོ་བོད་མཐོ་སྒང་གི་བྱང་ཤར་རྒྱུད་དུ་ཉིན་དཀར་འགུལ་སྐྱོད་བྱེད་བཞིན་པའི་འུག་པའི་འགྱུར་རྡོ་གསར་དུ་རྙེད་པ་དང་། དེ་ནི་རང་རྒྱལ་ནས་རྙེད་པའི་ཆེས་སྔ་བའི་འུག་པ་རིགས་ཀྱི་འགྱུར་རྡོ་ཡིན་པ་མ་ཟད། ཆ་ཚང་ཞིང་ལངས་གཟུགས་ཀྱི་ཉར་ཚགས་ཀྱང་བྱས་ཡོད།
        ཀྲུང་གོ་ཚན་རིག་ཁང་གནའ་བོའི་སྒལ་རུས་ཅན་གྱི་སྲོག་ཆགས་དང་གནའ་བོའི་མིའི་རིགས་ཞིབ་འཇུག་སུའོ་ཡི་ཞིབ་འཇུག་པ་གཞོན་པ་ལི་ཀྲི་ཧེང་གིས་ངོ་སྤྲོད་ལྟར་ན། ཐེངས་འདིར་རྙེད་པའི་འགྱུར་རྡོ་དེ་ནི་རྩ་མེད་དུ་སོང་བའི་འུག་པའི་རིགས་ཤིག་ཡིན་ཞིང་། དེ་ལ་ཉིན་དཀར་འགུལ་སྐྱོད་བྱེད་པའི་འུག་པ་གསར་བ་ཞེས་མིང་བཏགས་ཆོག ད་ལྟ་དང་བསྡུར་ན་ཧ་ལམ་ལོ་ཁྲི950ནས་ཁྲི600བར་གྱི་དུས་རབས་གསར་པའི་དུས་མཇུག་ཏུ་འཚོ་སྡོད་བྱེད་བཞིན་ཡོད། འགྱུར་རྡོ་དེ་ཀན་སུའུ་ལིན་ཞ་གཤོངས་ས་ནས་རྙེད་པ་དང་། མགོ་རུས་ནས་གཤོག་པ་དང་རྐང་པ་སོགས་ཀྱི་གྲུབ་ཆ་གསལ་བོར་མཐོང་ཐུབ་པ་མ་ཟད། དེའི་ནང་ཐ་ན་འུག་པས་ད་དུང་ཕྱིར་སྐྱུག་མ་ཐུབ་པའི་བཟའ་བཅའི་དཔང་རྟགས་ཀྱང་རྙེད་ཡོད། ངོ་སྤྲོད་ལྟར་ན། འུག་པའི་ལུས་པོའི་རིང་ཚད་ལ་ལི་སྨི40ཙམ་ཡོད་པ་དང་། ལུས་པོའི་ལྗིད་ཚད་ཚོད་དཔག་བྱས་ན་ཁེ240ནས320བར་ཡིན།
        འུག་པ་འདིའི་རིགས་ནི་ཉིན་དཀར་འགུལ་སྐྱོད་བྱེད་བཞིན་པ་ཇི་ལྟར་ཤེས་ཐུབ་ཟེར་ན། ལི་ཀྲི་ཧེང་གིས། ཉིན་དཀར་འགུལ་སྐྱོད་བྱེད་པའི་འུག་པ་དང་མཚན་མོ་འགུལ་སྐྱོད་བྱེད་པའི་འུག་པའི་མིག་ལ་ཁྱད་པར་ཡོད་དེ། སྤྱིར་བཤད་ན། ཉིན་དཀར་འགུལ་སྐྱོད་བྱེད་པའི་འུག་པའི་མིག་སྤྲིན་གྱི་རུས་པའི་ནང་ཁུལ་ཅུང་ཆུང་ལ། རྒྱུ་མཚན་ནི་ཉིན་དཀར་འོད་མང་པོ་ཕོག་མི་དགོས་པར་དངོས་གཟུགས་མཐོང་ཐུབ་པའི་ཕྱིར། མཚན་མོར་འགུལ་སྐྱོད་བྱེད་པའི་འུག་པའི་མིག་སྤྲིན་གྱི་རུས་པའི་ནང་ཁུལ་ཅུང་ཆེ་ལ། དེ་ནི་མཚན་མོར་འོད་བསྡུ་གང་ཐུབ་བྱེད་པའི་ཕྱིར་ཡིན།
        ཞིབ་འཇུག་པས་འུག་པའི་འགྱུར་རྡོའི་མིག་སྤྲིན་གྱི་རུས་པ་དེ་གོག་བགྲོད་སྲོག་ཆགས་རིགས55དང་། དེ་བཞིན་འུག་པ་རིགས་སྣ་ཚོགས་ཚུད་པའི་འདབ་ཆགས་རིགས360ལྷག་ཙམ་གྱི་མིག་སྤྲིན་གྱི་རུས་པ་དང་མིག་མཐའི་ཆེ་ཆུང་ལ་བསྡོམས་རྩིས་དབྱེ་ཞིབ་དང་ཞིབ་བསྡུར་བྱས་པ་ན། མཇུག་འབྲས་ལ་འུག་པ་དེ་རིགས་ཀྱི་མིག་གིས་འོད་ཐིག་ལ་སྒོ་འབྱེད་ཚད་ཆུང་བ་རྟོགས་ཤིང་། དེ་ལྟར་བྱས་ན་ཉི་འོད་ཆེས་ཆེར་ཉམས་སུ་འཇུག་ཐུབ་པ་དང་ཉིན་གུང་གི་དུས་སུ་ཡང་དངོས་པོ་གསལ་བོར་མཐོང་ཐུབ་པ་རེད།
        “སྐབས་དེར་ལིན་ཞ་གཤོངས་ས་དེ་མཚོ་བོད་མཐོ་སྒང་མཐོ་རུ་སོང་བའི་དུས་མཇུག་གི་རྒྱབ་ལྗོངས་འོག་གནས་ཤིང་། དེ་ནི་ཡངས་ཤིང་རྒྱ་ཆེ་བའི་སྐམ་ཤས་ཆེ་བའི་རྩྭ་ཐང་གི་ཁོར་ཡུག་དང་འདྲ་བས། གནས་དེར་འཚོ་སྡོད་བྱེད་པ་དང་ཉིན་དཀར་འགུལ་སྐྱོད་བྱེད་པའི་འུག་པ་ཡིས་འོ་འཐུང་སྲོག་ཆགས་ཆུང་ཆུང་ཁ་ཤས་རྔོན་པར་བརྟེན་ནས་འཚོ་བ་སྐྱེལ་བཞིན་ཡོད”ཅེས་ལི་ཀྲི་ཧེང་གིས་དེ་ལྟར་བཤད།
        ཉེ་ཆར། འབྲེལ་ཡོད་ཞིབ་འཇུག་གྲུབ་འབྲས་རྒྱལ་སྤྱིའི་དུས་དེབ《ཨ་རིའི་ཚན་རིག་ཁང་གི་དུས་དེབ》ཐོག་སྤེལ་བ་རེད། །