གླུ་ཐ་ལ་ལ་མོ་ཐ་ལ་རེད། །
གླུ་ཨ་ལ་ལ་མོ་ཨ་ལ་རེད། །
སྐྱབས་བླ་མ་ཡི་དམ་མཁའ་འགྲོ་གསུམ། །
གནས་མི་འབྲལ་སྤྱི་བོའི་གཙུག་ན་བཞུགས། །
བྱིན་རླབས་དངོས་གྲུབ་སྩལ་ཏུ་གསོལ། །
དཔོན་པོ་ང་ལ་སྡོངས་གྲོགས་མཛོད། །
ས་འདིའི་ས་ངོ་མ་ཤེས་ན། །
རྨ་དེལ་ཡག་སྟག་ཐང་ཁྲ་མོ་རེད། །
ང་དང་ང་ངོ་མ་ཤེས་ན། །
སྲིབ་པ་ཁོག་མོའི་རོག་རྫོང་ན། །
མ་བཞིའི་དཔོན་པོ་ཁྲོ་རྒྱལ་ཡིན། །
བརྒྱ་ར་རུ་མགོ་ཡི་རྩེ་རྩེ་ཡིན། །
སྟོང་ལུག་རུ་མགོ་ཡི་ཕྱུར་ཕྱུར་ཡིན། །
ཆུ་དཀར་བསྐོལ་ཕུད་འཐུང་མི་ཡིན། །
ལུག་མགོའི་ཡ་ཐོད་ཟ་མི་ཡིན། །
གོ་ཁའི་གཡས་གྲལ་གནོན་མཁན་ཡིན། །
རྨ་ཁ་མཐེབ་གནོན་བྱེད་མི་ཡིན། །
སྐྲངས་མགོ་སེན་མོས་རྟོལ་མི་ཡིན། །
ང་ལ་དོ་བའི་དཔོན་པོ་མེད། །
ཚོ་ཆེན་ལྷ་སྡེ་དཀར་པོ་ལགས། །
གསོན་དང་ཞུ་རྒྱུ་རེ་རེ་ཡོད། །
བྱ་འདིའི་བྱ་རྒྱུས་ང་ལ་ཡོད། །
སྒྲོ་འདིའི་སྒྲོ་ངོ་ང་ཡིས་ཤེས། །
གོ་ཆོད་མི་དར་སྟག་ཡུ་ཁྱོད། །
ལྷ་མི་མགོན་དུས་དེར་མཆོད་མི་ཡིན། །
འདྲེ་མི་གནོད་དུས་དེར་རྡུང་མི་རེད། །
མདའ་མཐོ་གསུམ་མཐེབ་མོས་མི་ཐོན་པའི། །
ཐོག་དམར་པོ་ཁ་ལ་བསྒྱུར་ཁ་བྱེད། །
ལས་ཐོན་རྒྱུ་གསུམ་དེ་ཐོན་ནས་གདའ། །
ལྷ་གོང་མའི་དམ་ཚིག་བཅག་ནས་གདའ། །
དཀར་པོ་སྒྲོ་གཅིག་གདའ་ལེ་དེ། །
ཚངས་པ་དཀར་པོའི་བླ་སྒྲོ་རེད། །
སེར་པོ་སྒྲོ་གཅིག་གདའ་བ་འདི། །
སྐུ་ལྷ་གེར་མཛོའི་བླ་སྒྲོ་རེད། །
ནག་པོ་སྒྲོ་གཅིག་གདའ་བ་འདི། །
གཙུག་ན་རིན་ཆེན་བླ་སྒྲོ་རེད། །
སྨུག་པོ་སྒྲོ་གཅིག་གདའ་བ་འདི། །
ཚ་བོ་གེ་སར་བླ་སྒྲོ་རེད། །
དམར་པོ་སྒྲོ་གཅིག་གདའ་བ་དེ། །
གསེར་པ་ཆེ་རྒྱུད་བླ་སྒྲོ་རེད། །
སྔོན་པོ་སྒྲོ་གཅིག་གདའ་བ་དེ། །
འབྲིང་རྒྱུད་འོམ་བུའི་བླ་སྒྲོ་རེད། །
ལྗང་ཁུ་སྒྲོ་གཅིག་གདའ་བ་དེ། །
ཆུང་རྒྱུད་རྨུ་སྤྱང་བླ་སྒྲོ་རེད། །
དེ་ནས་སྒྲོ་གཅིག་གདའ་ལེ་དེ། །
ཚོ་དྲུག་གླིང་གི་བླ་སྒྲོ་རེད། །
གནམ་ལ་སྐར་མ་བཟང་ལེ་རེད། །
ས་ལ་དུས་ཚོད་བཟང་ནས་གདའ། །
རྒྱུ་སྐར་ལ་ཉེ་བཟང་ལེ་རེད། །
བཟང་གསུམ་རྟེན་འབྲེལ་འགྲིགས་ལེ་རེད། །
ཡར་ཁམས་བྱང་མའི་རི་བརྒྱད་ནས། །
སྐུ་འཛམ་གླིང་སེང་ཆེན་རྒྱལ་པོ་དེ། །
ཚོ་ཆེན་ལྷ་སྡེ་དཀར་པོ་ལ། །
སྐྱིད་སྡུག་ཅི་འདུག་ལྟ་མི་ལ། །
བླ་བྱ་སྔོན་ལ་མངགས་ལེ་རེད། །
སྐྱེས་བུ་རྒྱབ་ནས་འབྱོན་ངེས་རེད། །
མཇུག་སྒྲོ་བཅད་པ་མ་ལེགས་སོ། །
ཉི་མ་སང་ཉིན་སྔ་དྲོ་ལ། །
གླིང་ཡ་ཐའི་བླ་མ་དར་འབུམ་དང་། །
སྒ་རབ་བརྟན་ཆོད་ཀྱི་དགེ་རྒྱས་དང་། །
སྤྱིར་མཆོད་པའི་བླ་མ་ཀུན་དགའ་གསུམ། །
བླ་མ་གསུམ་འདི་གདན་འདྲེན་གྱིས། །
རྨ་རི་གསལ་བ་ཡང་སྟེང་ན། །
བསང་ཁལ་བཅུ་གསུམ་ཕུལ་ཤོམ་གྱིས། །
མདའ་དར་བཅུ་གསུམ་སྒྲོན་རྒྱུ་གྱིས། །
མདུང་དར་བཅུ་གསུམ་འཛུགས་རྒྱུ་གྱིས། །
ལྷ་གོང་མའི་ངོ་སོ་བསྟོད་རྒྱུ་གྱིས། །
ལྷ་བྱ་ཁོང་ལ་མཆོད་བསྟོད་གྱིས། །
ཚོ་ཆེན་ལྷ་སྡེ་དཀར་པོ་དེ། །
སྐྱ་བོ་རི་ལ་འབྲོས་དོན་མེད། །
སྨུག་པོ་རི་ལ་སྐུང་དོན་མེད། །
སོ་པ་ཉུལ་མ་དགོས་དོན་མེད། །
དགའ་བའི་བྲོ་ཡང་འཁྲབ་རྒྱུ་གྱིས། །
སྐྱིད་པའི་གླུ་ཡང་ལེན་རྒྱུ་གྱིས། །
མགྱོགས་པའི་རྟ་ཡང་རྒྱུག་རྒྱུ་གྱིས། །
སྐྱེན་པའི་རྒྱང་ཚད་འཕེན་རྒྱུ་གྱིས། །
སྐྱ་ལོའི་བུ་མོ་འབྲུག་མོ་ལགས། །
སྡེ་གཉིས་ཐོད་པ་མ་གཏུག་ཅིག །
སྡེ་གསུམ་ཀླད་ཡུ་མ་བསྐོར་ཅིག །
གྱོད་ཕུང་གཞིའི་རྩ་བ་མི་སློང་རྒྱུ། །
དཔོན་པོ་ང་ཡི་བསམ་ཚུལ་ཡིན། །
གླིང་ཚོ་ཆེན་སྡེ་བའི་ཐུགས་ལ་ཞོག །
ཅེས་ཟེར་བ་དང་།
