དྲི་བྲལ་དར་དཀར་ཕྱི་རུ་འཕྱངས་པའི་གངས་རི་དཀར་པོའི་ངོ་སོ་བསྟོད། །
ཁ་དོག་དམར་སྨུག་གོས་སུ་བྱས་པའི་རྫ་རི་སྨུག་པོའི་ངོ་སོ་བསྟོད། །
སྟུག་ཅིང་ཚང་ཚིང་དབུས་སུ་བཀླུབས་པའི་ནགས་ཀླུང་ཕྱུག་མོའི་ངོ་སོ་བསྟོད། །
གངས་ལྗོངས་ཉི་མ་གཞོན་ནུ་ཁྱེད་ནི་ང་ཡི་འཚོ་བའི་རྒྱབ་རྟེན་ཡིན། །
ཐང་དཀར་རྒོད་པོའི་གནས་ལམ་མཐོན་པོ་བྲག་དཀར་རི་བོའི་ངོ་སོ་བསྟོད། །
ཁུ་བྱུག་སྔོན་མོའི་གཡང་ཁྱིམ་དྲོན་མོ་སྤང་རི་སྔོན་མོའི་ངོ་སོ་བསྟོད། །
གླག་རྒོད་ངར་མའི་གཞིས་ཁྱིམ་བཙན་པོ་གཡང་གཟར་རི་བོའི་ངོ་སོ་བསྟོད། །
གངས་ལྗོངས་ཉི་མ་གཞོན་ནུ་ཁྱེད་ནི་ང་ཡི་མ་འོངས་དམིགས་འབེན་ཡིན། །
སྦྲང་མ་ཆུང་ཆུང་དིར་དིར་འཁོར་སའི་གཡས་ཀྱི་རི་བོའི་ངོ་སོ་བསྟོད། །
བྱིས་ཕྲུག་སྣབས་ལུད་རྣམ་གཡེང་རོལ་སའི་གཡོན་གྱི་རི་བོའི་ངོ་སོ་བསྟོད། །
འབའ་འབའ་ལུ་གུ་རྩེ་ལ་ལྡིང་སའི་སྤང་ལྗང་སྔོན་མོའི་ངོ་སོ་བསྟོད། །
གངས་ལྗོངས་ཉི་མ་གཞོན་ནུ་ཁྱེད་ནི་ང་ཡི་འདས་སོང་གཏམ་རྒྱུད་ཡིན། །
ཕུགས་བསམ་བརྟན་མོས་རྒྱགས་ཕྱེ་བྱས་ནས་ལམ་ཐག་རིང་པོ་བགྲོད་པར་ཆས། །
མཐུན་སྒྲིལ་དམ་པའི་ལག་ཟུང་སྦྲེལ་ནས་བོད་ཡུལ་སྟོད་སྨད་བར་གསུམ་འགྲིམས། །
གངས་ལྗོངས་ཉི་མ་གཞོན་ནུ་ཁྱེད་ནི་གངས་རིའི་ཡུལ་ན་བརྗིད་ཀྱང་གསལ། །
སྙིང་ནས་གུས་ཤིང་སེམས་ཀྱིས་དད་པའི་ཉི་མ་གཞོན་ནུའི་ངོ་སོ་བསྟོད། །
