རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་སྤྱི་ཟླ་9པའི་ཚེས་19ཉིན་སྐབས་བདུན་པའི་ཀྲུང་གོ—ཨེ་ཤེ་ཡ་དང་ཡོ་རོབ་ཀྱི་དངོས་མང་སྟོན་ཚོགས་ལ་རྟེན་འབྲེལ་འཕྲིན་ཡིག་སྤྲིངས་གནང་བ་རེད།
ཞི་ཅིན་ཕིང་གིས། ཨེ་ཤེ་ཡ་དང་ཡོ་རོབ་སྐམ་ས་ཆེན་པོའི་ཐོག་གོང་འཕེལ་གྱི་གསོན་ཤུགས་དང་མི་མངོན་པའི་སྟོབས་ཤུགས་ཀྱི་ཁེངས་ཡོད་པས་རྒྱུད་གཅིག་ལམ་གཅིག་མཉམ་སྐྲུན་གྱི་རྒྱལ་སྤྱིའི་མཉམ་ལས་ཀྱི་གཙོ་གནད་ཁྱབ་ཁོངས་ཤིག་རེད། ཉེ་ལམ་ལོ་ཤས་རིང་། ཀྲུང་གོའི་ཤིན་ཅང་གིས་ས་ཁོངས་བཟང་ཆ་འདོན་སྤེལ་གང་ལེགས་བྱས་ནས་དར་གོས་ལམ་བུའི་དཔལ་འབྱོར་ཁུལ་གྱི་སྲོག་ཤིང་ཁུལ་འཛུགས་སྐྲུན་ལ་སྐུལ་འདེད་ཧུར་ཐག་བཏང་བ་དང་། ཀྲུང་གོ་དང་ཨེ་ཤེ་ཡ་དང་ཡོ་རོབ་ཁུལ་གྱི་རྒྱལ་ཁབ་མཉམ་འབྲེལ་མཉམ་མཐུད་དང་། གཉིས་ཕན་མཉམ་ལས། ཐུན་མོང་གོང་འཕེལ་བཅས་ལ་སྐུལ་འདེད་བཏང་བར་ཕན་འབྲས་ཆེན་པོ་ཐོན་ཡོད་ཅེས་བསྟན་པ་དང་།
ཞི་ཅིན་ཕིང་གིས། ཀྲུང་གོས་རྒྱལ་ཁབ་ཁག་དང་མཉམ་དུ་ཀྲུང་གོ—ཨེ་ཤེ་ཡ་དང་ཡོ་རོབ་ཀྱི་དངོས་མང་སྟོན་ཚོགས་སྟེགས་བུར་བྱས་ཏེ་ཞི་བདེ་མཉམ་ལས་དང་། སྒོ་དབྱེ་ཁོང་ཡངས། ཕན་ཚུན་སློབ་སྦྱོང་དང་དཔྱད་གཞིར་འཛིན་པ། གཉིས་ཕན་མཉམ་རྒྱལ་བཅས་ཀྱི་དར་གོས་ལམ་བུའི་སྙིང་སྟོབས་དར་སྤེལ་གཏོང་བ་དང་། ཚད་གཞི་མཐོ་བ་དང་། རྒྱུན་མཐུད་རུང་བ། དམངས་འཚོར་ཕན་པ་བཅས་རྒྱུན་འཁྱོངས་ཀྱིས་ཨེ་ཤེ་ཡ་དང་ཡོ་རོབ་ཀྱི་མཉམ་ལས་ཁྱབ་ཁོངས་ཟམ་མི་ཆད་པར་རྒྱ་ཆེར་གཏོང་བ་དང་། ཨེ་ཤེ་ཡ་དང་ཡོ་རོབ་ཀྱི་མཉམ་ལས་ཆུ་ཚད་མཐོ་རུ་གཏོང་བ་བཅས་བྱས་ནས་ཐུན་མོང་གོང་འཕེལ་དང་དར་རྒྱས་ལ་སྐུལ་འདེད་གཏོང་འདོད་ཡོད་ཅེས་ནན་སྟོན་གནང་བ་རེད།
སྐབས་བདུན་པའི་ཀྲུང་གོ—ཨེ་ཤེ་ཡ་དང་ཡོ་རོབ་ཀྱི་དངོས་མང་སྟོན་ཚོགས་སྤྱི་ཚེས་19ཉིན་ཤིན་ཅང་ཝུའུ་ལུའུ་མུའུ་ཆིར་གཉེར་འགོ་ཚུགས་པ་དང་། བརྗོད་དོན་གཙོ་བོ་ནི་“མཉམ་གྲོས་དང་མཉམ་འཛུགས་མཉམ་སྤྱོད་མཉམ་ལས་བཅས་བྱས་ནས་མ་འོངས་བསུ”ཞེས་པ་དེ་ཡིན་ཞིང་། ཚོང་དོན་པུའུ་དང་། ཕྱི་འབྲེལ་པུའུ། ཀྲུང་གོའི་ཉོ་ཚོང་སྐུལ་འདེད་ཚོགས་པ། ཤིན་ཅང་ཡུ་གུར་རང་སྐྱོང་ལྗོངས་མི་དམངས་སྲིད་གཞུང་སོགས་ཀྱིས་ཐུན་མོང་ཐོག་གཙོ་གཉེར་བྱས་པ་ཞིག་རེད།
