༄༅། །འདི་ལ་རྣམ་ཕྲན་ཉེར་ལྔ་དང་། གླེགས་བུ་ཕྱེད་དང་ལྔ་རེ་ཡོད་པས་ནི་འཕགས་ལམ་ཡན་ལག་བརྒྱད་དང་། ཡན་ལག་བདུན། དབང་སྟོབས་བཅུ། ལྕགས་རི་དྲན་ཉེ་སོགས་གསུམ་སྟེ་བྱང་ཆོས་སོ་བདུན་དྲན་གསོ་བའི་རྟེན་ནོ། ། འདི་ལ་གླེགས་བུ་ཕྱེད་དང་གསུམ་རེ་ཡོད་པས་ནི་བྱང་ཆུབ་ཡན་ལག་བདུན་དང་། དེའི་ངོ་བོར་ གྱུར་པའི་མཉམ་བཞག་སོགས་ཀྱི་དྲན་པ་གསོ་བའི་རྟེན་ནོ། །འདི་ལ་གླེགས་བུ་ཕྱེད་དང་གཉིས་རེ་ཡོད་པས་ནི་དབང་སྟོབས་ལྔ་དྲན་པ་གསོ་བའི་རྟེན་དུ་མཚོན་པ་ཡིན་ནོ། །སྤྱིར་གོས་ལ་དགེ་སློང་གི་འཚོ་བའི་ཡོ་བྱད་བཅུ་གསུམ་ཡོད། ལྕགས་རི་དྲན་ཉེ་བཞི་དང་། གླེགས་བུ་ཕྱེད་དང་གཉིས་ནི་ཡང་དག་སྤོང་བཞི་དང་། རྫུ་འཕྲུལ་གྱི་རྐང་པ་བཞིའི་དྲན་པ་གསོ་བའི་རྟེན་དུ་གསུངས་སོ། །ལྷུང་བཟེད་ནི་ཡོ་བྱད་ངན་ངོན་ཙམ་དང་། ཟས་བསོད་སྙོམས་དང་། འདོད་ཆུང་ཆོག་ཤེས་སོགས་མཐའ་གཉིས་སྤོངས་པའི་དགེ་སྦྱོང་གི་ཆོས་དྲན་པའི་རྟེན་དུ་གནང་བའི་ཡོ་བྱད་ཡིན། སྟོན་པའི་ཕྱག་ན་ལྷུང་བཟེད་བསྣམས་པའི་དོན་ཡང་དེ་དང་འདྲ་ཞིང་བདུད་རྩིས་གང་བས་ཐུགས་རྒྱུད་ཡོན་ཏན་གྱིས་གང་བ་མཚོན་ཏེ། ཕྱི་དགེ་སྦྱོང་གི་སྤྱོད་པ་ཞི་དུལ་ལ་ནང་ཡོན་ཏན་གྱི་ཆ་ཡོངས་སུ་རྫོགས་པ་སྟོན་ནོ། །ཆུ་ཚགས་ནི་ལོངས་སྤྱོད་པའི་ཆུར་གནས་པའི་སེམས་ཅན་གཟུགས་ཕྲ་བ་མཐོང་མི་ཐུབ་པའི་ཚོགས་ལ་གནོད་པ་མི་བྱེད་པའི་དོན་ཏེ། སངས་རྒྱས་ཀྱི་བསྟན་པ་ནི་གང་གི་ཐད་ནས་ཀྱང་སྙིང་རྗེས་ཀུན་ནས་བསླངས་དགོས་པས། ཆུར་གནས་སྲོག་ཆགས་རྣམས་ལ་མི་གནོད་ཅིང་སྙིང་རྗེ་བ་མཚོན་པ་ཡིན། འཁར་གསིལ་ནི་དུམ་བུ་གསུམ་དུ་ཡོད་པས་བསླབ་པ་གསུམ་དང་། བར་གསོམ་ཤིང་གིས་བྱས་པ་ནི་སེམས་རྒྱུད་དྲང་ཞིང་འཇམ་དགོས་པའི་རྟགས། མ་རྩེར་རྒྱ་མདུད་ཡོད་པ་ནི་ངན་སོང་གི་སྒོ་གཅོད་པ། སྨད་ལ་བདུན་གཞོགས་ཡོད་པ་ནི་བྱང་ཆུབ་ཀྱི་ཡན་ལག་བདུན་དང་། སྟོད་ལ་བརྒྱད་གཞོགས་ཡོད་པ་འཕགས་ལམ་ཡན་ལག་བརྒྱད་། རྩེ་མོར་རྭ་བཞི་ཡོད་པ་བདེན་བཞི། རྭ་རེ་ལ་ཨ་ལུང་གསུམ་སྟེ། བཅུ་གཉིས་ཡོད་པ་གསུང་རབ་ཡན་ལག་བཅུ་གཉིས། མཆོད་རྟེན་གཉིས་ཀྱི་ཐབས་ཤེས་གཉིས་དང་སྐུ་གཉིས་ཏེ་རྒྱུ་འབྲས་ཀྱི་ལམ་ཆ་ཚང་མཚོན། ལྕགས་ཀྱུས་ནི་གདུལ་བྱ་ཐར་པར་འདྲེན་པའི་འཕྲིན་ལས་མཚོན་ཏེ། ཚུལ་དེ་ལྟར་དྲན་པའི་རྟེན་དུ་བྱས་པ་ཡིན་ནོ། །
