དགུ་ཆུ་སྔོན་མོ་ནི། ད་ལྟའི་མཚོ་སྔོན་ཞིང་ཆེན་རྨ་ལྷོ་ཁུལ་ཐུན་རིན་རྫོང་སྟེ། རེབ་གོང་དུ་ལྷོ་ནས་བྱང་དུ་བཞུར་བའི་ཆུ་རྒྱུད་ཅིག་ཡིན། དེ་ཡང་དགུ་ཆུ་ཞེས་པའི་ཐོགས་དོན་ནི། རྫོང་དམར་ཁོག་གི་ཆུ་དམར། ས་ནག་གཞུང་གི་ཆུ་ནག ཀླུ་ཚང་ཁོག་གི་བཙན་ཆུ། ཨ་ཡངས་སྟག་མོའི་རྫོང་ཆུ། རྭ་རྩེ་ཕུའི་སྤང་ཆུ། གསེར་ལྗོངས་ཁོག་གི་ཤ་ཆུ། མ་མོའི་ཕུག་གི་གྱོ་ཆུ། ཟ་ལུང་ཁོག་གི་ནོའུ་ཆུ། འཛམ་གླིང་ཁོག་གི་གློང་ཆུ་བཅས་འདུས་པ་ཡིན་པས་སམ། ཡང་ན། སྟོད་ན་ཀ་རོང་ཡ་རོང་བདེ་རོང་གསུམ། བར་ན་ཚ་རོང་བ་རོང་བསེ་རོང་གསུམ། སྨད་དུ་ཐེའུ་རོང་ནོའུ་རོང་དགུ་རོང་སྟེ་རོང་དགུའི་ཆུ་བོ་རྣམས་གཅིག་ཏུ་འདུས་ཤིང་འབབ་པས་ན་དེ་ལྟར་ཐོགས་པར་བཤད། གང་ལྟར་ཡུལ་མདོ་སྨད་དུ་གྲགས་ཆེ་བའི་ཆུ་བོ་ཞིག་སྟེ། ཆུ་དེའི་རྒྱུད་དུ་རེབ་གོང་ཉིན་སྲིབ་གཉིས་སུ་ཕྱེས་པའི་ཡུལ་སྡེ་ཆལ་མར་རྡལ་ཡོད་ཅིང་། རོང་བོ་དགོན་ཆེན་གྱིས་གཙོས་གནས་ཆེན་ཡང་ཚར་དུ་བསྒྲིགས་པ་ལྟར་ཡོད་དོ། །
