གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
སྐྱབས་བླ་མ་ཡི་དམ་དཀོན་མཆོག་གསུམ། །
གནས་མི་འབྲལ་སྤྱི་བོའི་གཙུག་ཏུ་བཞུགས། །
འབྲེལ་ཚད་དོན་དང་ལྡན་པར་ཤོག །
སྟོང་དབྱེར་མེད་ཁ་ལོ་ཆོས་ལ་སྒྱུར། །
ས་འདིའི་ས་ངོ་མ་ཤེས་ན། །
རྨ་དེའུ་ཡག་སྟག་ཐང་བར་མ་རེད། །
རྨ་ཆུ་སྔོན་མོའི་གཡས་ཟུར་རེད། །
ཕོ་ང་དང་ང་ངོ་མ་ཤེས་ན། །
གླིང་ས་མཐོང་བ་ཀུན་སྨོན་ན། །
ཤར་རི་བོ་ཆེ་ཡི་ས་ཆ་ན། །
མཁར་མི་འགྱུར་བེའུ་སྟག་རྫོང་ནས། །
ལྡོང་མི་འགྱུར་སྟག་རོང་གཟིག་འཕེན་ཡིན། །
སྨུག་པོ་ལྡོང་གི་ཆེ་མགོ་ཡིན། །
གླིང་དཔའ་བརྟུལ་སུམ་ཅུའི་རྒན་མགོ་ཡིན། །
དགྲ་མ་ཐུབ་ཆམ་ལ་འབེབ་མི་ཡིན། །
རྟིང་མ་དྲུག་གསུམ་རྒྱབ་ལ་བཞག །
གཏམ་ཁ་བཤད་སྔོན་ལ་གཏོང་མི་མིན། །
མིན་དོན་རྩ་བ་བཤད་པ་ན། །
སྐུ་སེང་ཆེན་རྒྱལ་པོ་མ་འཁྲུངས་གོང་། །
དཔའ་ཞལ་ལུ་སྐུ་ན་ཕྲ་བའི་དུས། །
རང་གླིང་གོང་བ་རྩོད་རེས་བྱུང་། །
གླིང་སྤྱི་དཔོན་གཡུ་འཕེན་སྟག་རྒྱལ་གཙོས། །
ཕུ་ནུ་མི་མང་དཔུང་སྡེབ་ཤོར། །
འགག་གླིང་ཕ་ཆོས་རྩོད་རེས་བྱུང་། །
སྤྱི་དཔོན་གླེན་པ་ཆོས་རྒྱལ་གཙོས། །
ཤ་ཕུ་ནུ་མགོ་སྐེ་བྲལ་ལེ་བྱུང་། །
དེ་ནས་ཨ་ཁུ་སྤྱི་དཔོན་གྱིས། །
ཤ་ཤོར་ཤ་ལན་ང་ལོངས་ཟེར། །
ཟོག་ཤོར་རྩ་ར་ང་ལོངས་ཟེར། །
ཕོ་ལོ་ངོ་བཅུ་དགུ་སླེབས་དུས་ཡིན། །
མ་བསྡད་ཨ་ཕོ་ཁེར་འགྲོས་བྱས། །
ང་དང་པོ་རོང་ཡུལ་མཐིལ་ལ་བབས། །
ཕོ་སྐྱེས་ཚད་མགོ་སྐེ་བླངས་ནས་བཞག །
སྨན་མ་ལུས་ཡུག་ས་ཕུད་ནས་བཞག །
རྟ་འདོ་བ་ཁྱུ་དགུ་ནོམ་ལ་བཅད། །
ཕ་ཆེན་ལྷ་འུ་སྤུན་གསུམ་ཁྲིད། །
དེ་ནས་མ་བསྡད་འགག་ལ་སོང་། །
ཕོ་སྐྱེས་ལུས་ཐོབ་ཚད་ཆམ་ལ་ཕབ། །
སྨན་མོ་ལུས་ར་ནག་འགྲོ་འགྲོ་བྱས། །
དྲེལ་སྨུག་ཆུང་ཁྱུ་དགུ་ནོམ་ལ་བཅད། །
ཕ་ཆེན་སྤུན་གསུམ་བཙོན་ལ་ཁྲིད། །
རྟིང་མ་དེ་བྱས་གཏམ་རྒྱུད་བཞག །
ཤར་གླིང་གི་དཔའ་བརྟུལ་དེ་ནས་ཐོགས། །
ཕོ་རྒོད་ཁེར་འགྲོ་དེ་ནས་དར། །
ངས་ཁར་ཉིན་ཉི་མའི་གདོང་གང་ལ། །
ཧོར་མི་རྒོད་བརྒྱ་ཚོ་གཉིས་གསུམ་བསད། །
ཕོ་ཡིན་ན་གཟིག་འཕེན་དེ་ལྟར་ཡིན། །
དཔའ་ཁྲི་དཔོན་ཞལ་ལུ་གཙོ་བྱས་པའི། །
གླིང་ལྷ་སྡེ་དཀར་པོས་ཚུར་གསོན་དང་། །
དེ་རིང་ཇག་རེས་ང་ལ་བབས། །
ངས་གུར་དཀར་མགོ་ལག་ཨེ་ལོན་བལྟ། །
བརྒྱ་ལ་གུར་དཀར་མ་ཐུག་ན། །
བློན་ཤན་པ་གང་རུང་ཆམ་ལ་འབེབས། །
དཔའ་རྟིང་མ་གླེང་རྒྱུ་ཡོད་ལེ་བྱེད། །
དེ་ལྟར་ཚོ་ཆེན་ལྷ་སྡེ་འདི། །
ཡང་མིན་ན་རྒོད་ནས་ཐལ་ལེ་རེད། །
ཡང་མིན་ན་སྡར་ནས་སྐྲག་ལེ་རེད། །
དཔའ་རྒྱ་ཚས་འདི་གྱིས་ཚིག་གཅིག་མེད། །
གླིང་ཕུ་ནུ་འདི་བྱེད་ཚིག་གཅིག་མེད། །
ལས་ཅི་འདྲ་ཞིག་རེད་གླིང་རུའི་སྡེ། །
རྨ་ཆུ་འདི་ལ་རབ་གསུམ་གདའ། །
རབ་ཁ་ཡན་འཇོག་རྒྱུ་ཨེ་ཡིན་ལགས། །
གླིང་ཆེ་རྒྱུད་ཆུང་རྒྱུད་འབྲིང་རྒྱུད་གསུམ། །
ཚ་ཞང་ཤོག་ཆེན་སུམ་ཅུ་གདའ། །
གཡས་རུ་སྒ་དང་གཡོན་རུ་འབྲུ། །
བཙན་ལ་སྟག་རོང་སྐྱ་ལོ་ཕྱུག །
སྒ་བ་རིན་ཆེན་ཚོ་དྲུག་གདའ། །
རྟ་འུ་མི་ཚོ་དམར་པོ་གདའ། །
དམག་བུ་རྟ་ཅི་འདྲ་བསྡུ་རྒྱུ་ཡིན། །
དམག་དཔོན་སུ་ཡིས་བྱེད་རྒྱུ་ཡིན། །
སྣ་ཁྲིད་སུ་འདྲ་འགྲོ་རྒྱུ་ཡིན། །
དཔུང་སྒྲིག་ལུགས་ཅི་འདྲ་བྱེད་རྒྱུ་ཡིན། །
དགྲ་དུ་སོད་ཡིན་ནམ་དེ་གསོད་ཡིན། །
མདའ་སྤྱི་འཕེན་ཡིན་ནམ་སྒེར་འཕེན་བྱེད། །
རྟ་ཁྲོམ་རྒྱུག་བྱེད་དམ་ཁེར་རྒྱུག་བྱེད། །
ཕོ་ཁེར་འགྲོས་བྱེད་དམ་མང་འགྲོས་བྱེད། །
ལས་ཅི་བྱེད་ཨེ་ཤེས་གླིང་རུའི་སྡེ། །
ཕོ་ང་ཡི་བསམ་ཚུལ་འདི་འདྲ་ཡིན། །
རྨ་ཆུ་ཁམ་པའི་རབ་སོ་གསུམ། །
དཔའ་བརྟུལ་གང་དྲག་རྒོད་གསུམ་ཞོག །
ཕུ་ནུ་རེས་མོས་གར་བབ་དེ། །
ཉིན་རེར་རྟིང་མ་རེ་རེ་ལེན། །
ཕོ་རེ་རེ་ཡན་ལ་མི་འགྲོ་ལོ། །
རྟིང་མ་ཅི་ལོན་ཅི་འཁྱོལ་བྱེད། །
ལོ་གསུམ་ཕ་ཆོས་ཨེ་ཟིན་ལྟ། །
དེ་ནས་སེང་ཆེན་ཨེ་འབྱོན་ནམ། །
སྐྱེས་མཆོག་བྱང་ནས་བྱོན་པ་ན། །
ཐབས་དང་ཤེས་རབ་ཁོང་ལ་ཡོད། །
རྩལ་གྲུབ་རྟགས་དགོས་ན་འཛད་མེད་ཡོད། །
རེད་ཨེ་བསམ་ཚོ་ཆེན་གླིང་གི་སྡེ། །
ང་དཔོན་པོ་སོང་བའི་རྟིང་མ་ལ། །
དེ་བྱས་དཔའ་གཏམ་ཡོད་ལེ་བྱེད། །
མཐོང་མཐོང་མིག་གིས་ལྟད་མོ་ལྟོས། །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འགྲེལ་བ་ཞུ། །
གླིང་ཕུ་ནུའི་ཐུགས་ལ་དེ་ལྟར་ཞོག །
