གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
གླུ་རེ་རེ་མི་ལེན་ཀ་མེད་མེད། །
རེ་རེ་མ་བླངས་ཚོད་ཡོད་རེད། །
སྐྱིད་ན་ཇ་ཆང་མཚར་གླུ་རེད། །
སྡུག་ན་རང་སེམས་སྐྱོ་གྲོགས་རེད། །
ས་འདིའི་ས་ངོ་མ་ཤེས་ན། །
ཤར་ཇ་མཁར་རིང་མོའི་ཡང་ཐོག་རེད། །
ང་དང་ང་ངོ་མ་ཤེས་ན། །
གླིང་བཟའ་སེང་ལྕམ་འབྲུག་མོ་ཡིན། །
གླུ་འདི་གླུ་ངོ་མ་ཤེས་ན། །
སེར་མོའི་ན་རམ་ཁུགས་འགྱུར་རེད། །
ཧོར་ལྟས་ངན་ནང་གི་སོ་བ་ལ། །
སྡིག་གཅོད་ཤན་པ་རྨེ་རུ་རྩེ། །
ཁྱོད་གང་གི་ལམ་ལ་འགྲོ་རྒྱུ་ཡིན། །
ཕ་ཤི་ར་མདའ་ག་ན་ཡིན། །
མ་ཤི་མོ་གྱོད་སུ་ལ་ཐུག །
བྱང་ཨ་ཆེན་ལྷགས་པས་རྒྱབ་ནས་དེད། །
ཡུལ་གྲུ་བཞིའི་མུ་གེ་སྔོན་ལ་ཁྱེར། །
ཁ་ཆག་ག་ནས་ཡོང་བ་ཡིན། །
ཉོན་དང་ཚིག་གསུམ་འདྲ་མ་ཡོད། །
ང་གླིང་བཟའ་སེང་ལྕམ་འབྲུག་མོ་འདི། །
ཤར་སྒྲོལ་མ་དཀར་མོའི་སྐྱེ་བ་ཡིན། །
འཛམ་གླིང་སེང་ཆེན་གེ་སར་དང་། །
ཆོས་བྱ་བ་གཅིག་ལ་སྨོན་ལམ་བཏབ། །
ལྷ་ཤཱཀྱའི་བསྟན་པ་ཨེ་ཚུགས་བསམས། །
བོད་དབུ་ནག་གི་བདེ་སྐྱིད་ཨེ་དར་བསམས། །
ལུས་ཤ་ཁྲག་སྦུམས་སུ་འཁྲུངས་ལེ་ཡིན། །
སྒེར་ཇུས་མ་ཡིན་སྤྱི་དོན་ཡིན། །
ཁྱོད་ཧོར་ངན་གུར་དཀར་རྒྱལ་པོ་དེ། །
གོང་མ་ལྷ་ནས་སྨོན་ལམ་ལོག །
ཤཱཀྱའི་ཆོས་ལ་བསམ་པ་ནག །
འཛམ་གླིང་བོད་ལ་ཞེ་ཁ་རྩུབ། །
གནམ་ཐེལ་དཀར་པོའི་སྐྱེ་བ་རེད། །
དམ་ཚིག་བཀའ་བསྒོ་མཐའ་ནས་ལོག །
དེས་མི་ཚད་གླིང་དཀར་མཐོང་སྨོན་འདི། །
ལྷ་ཡི་དཀྱིལ་འཁོར་བཞེངས་འདྲ་ལ། །
རྔམ་ནག་སེར་བས་བརྡུངས་འདྲ་བྱས། །
ལས་རྔན་ཆེན་མ་བཏོན་ཅི་ཡང་མེད། །
ང་གླིང་བཟའ་སེང་ལྕམ་འབྲུག་མོ་འདི། །
འགྲོ་མི་དགོས་རྐང་མཐིལ་མི་སྟོན་ངེས། །
བརྒྱ་ལ་མི་འཇོག་འཁྲིད་བསམས་ན། །
དག་པ་རྒྱལ་བའི་ཞིང་ཁམས་ན། །
ཆོས་ལོངས་སྤྲུལ་སྐུའི་སངས་རྒྱས་བཞུགས། །
དེ་ལ་དགོངས་པ་ཁྱོད་རང་ཞུས། །
ལྷ་ཆེན་དུང་གི་ཐོར་གཙུག་ཅན། །
གཉན་རྒོད་ཟུར་ཕུད་ལྔ་པ་དང་། །
གཙུག་ན་མལ་གྲོ་གཟི་ཅན་བཞུགས། །
དེ་ཚོར་དགོངས་པ་ཁྱོད་རང་ཞུས། །
མ་ཅིག་གྲུབ་པའི་རྒྱལ་མོ་ནས། །
ནེ་ནེ་གཡུ་ཡི་སྒྲོན་མས་གཙོས། །
མ་རྒྱུད་མཁའ་འགྲོ་འབུམ་ཚོགས་ལ། །
འབྲུག་མོ་ཧོར་ལ་གནང་དགོས་ཞུས། །
ད་དུང་དེ་ཡིས་མི་ཚད་པའི། །
ཡར་ཁམས་བྱང་མའི་རི་བརྒྱད་ལ། །
འཛམ་གླིང་གེ་སར་དགྲ་འདུལ་བཞུགས། །
དཔོན་མོ་ཧོར་ལ་གནང་དགོས་ཞུས། །
འབུམ་པའི་ཞལ་ལུ་དཀར་པོ་གཅིག །
དར་འཕེན་དུག་གི་སྡོང་བོ་གཉིས། །
གསེར་པའི་ཉི་འབུམ་དར་ཡག་གསུམ། །
གླིང་དཀར་རྒྱལ་པོ་ཆེ་གསུམ་ལ། །
ཞུ་བ་ཕྱག་འབུལ་ཁྱོད་རང་གྱིས། །
ཡབ་ཆེན་སེང་བློན་རྒྱལ་པོ་དང་། །
ཁུ་བོ་སྤྱི་དཔོན་ཁྲ་རྒན་གཉིས། །
ཕ་ཁུ་སྟག་གཟིག་ཁ་སྤྲོད་ལ། །
ཨ་འབྲུག་ཧོར་ལ་དགོས་ཏོ་གྱིས། །
དགོངས་གནང་མི་འགྲོ་ཀ་མེད་ཡིན། །
དེ་མིན་ཇ་མཁར་རིང་མོ་འདི། །
དམའ་འབེབས་རྩ་ནས་ཕབ་རྟིང་ནས། །
འབྲུག་མོ་དབང་མེ་འཁྲིད་བསམས་ཀྱང་། །
དར་མདུང་ཁྲ་མོས་གཤོག་གུར་ཕུབ། །
ཚེ་གོས་སྨུག་པོས་གཤོག་འགྱུར་བརྒྱབ། །
གོང་མ་ལྷ་ལ་མི་འཕུར་རི། །
མ་མཁའ་འགྲོ་ཚོགས་ལ་མི་འགྲིམ་རི། །
རྩོད་པའི་རྡོ་ལུ་དཀར་ཆུང་དེ། །
གཉིས་མེད་གཡང་ལ་མི་སྒྲིལ་རི། །
ཡང་ན་ཧོར་ལ་འགྲོ་བ་ལས། །
སྔོན་མོ་ཆུ་ལ་མི་མཆོང་རི། །
དམར་མོ་མེ་ལ་མེ་ལྕེབ་རི། །
དེ་ཚེ་གུར་དཀར་བཤད་རྒྱུ་ཅི། །
ཧོར་རྒོད་པོའི་ར་མདའ་དེ་ནས་གྱིས། །
ཤན་རྩལ་ཆེན་ཡོད་ན་རྒྱབ་འདེད་ཀྱིས། །
ཉིན་གསུམ་རྟགས་ལམ་ངན་དང་གཅིག །
མཚན་གསུམ་རྨི་ལམ་ངན་དང་གཉིས། །
ཁྱོད་ཤན་ནག་གི་གླུ་ལེན་ངག་འགུགས་གསུམ། །
ལྟས་ངན་པ་གུར་དཀར་མགོ་ལ་སྒྱུར། །
བསྒྱུར་ནས་སྙིང་ཁྲག་ས་ལ་འཕོ། །
ང་སེང་ལྕམ་ན་ཆུང་འབྲུག་མོ་འདི། །
རང་ཇུས་གཞི་བརླིང་ཟིན་པར་ཤོག །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འགྲེལ་བ་ཞུ། །
ཤན་པའི་ཡིད་ལ་དེ་ལྟར་ཞོག །
ཅེས་ཟེར་ནས། གླུ་ཐུང་ཐུང་དེ་ལྟར་བླངས་པ་དང་།
