སྲིད་འདིར་བྱམས་པའི་རང་གཟུགས་ཡུམ་ཆེན་མོ། །
སྐྱེ་དགུའི་སྙིང་རྗེ་སྟོང་གི་མ་མ་ཡིས། །
ཡུན་རིང་དྲིན་གྱིས་སྐྱོང་བའི་མ་ཡུམ་གྱིས། །
བྱས་པར་གཟོ་བའི་དྲིན་ལན་ཇི་ལྟར་འཇལ། །
ཆུང་ཆུང་ཆོར་པ་གང་གི་ཚད་ཙམ་ཉིད། །
ཁྱེད་ཀྱིས་ནུ་ཞོ་གཅིག་པུའི་སྐྱེད་བསྲིང་གྱིས། །
ཉིན་མོར་ཟས་འཕྲི་མཚན་མོར་གཉིད་གཅག་ནས། །
ཉིན་མཚན་ཁོར་མོར་དཀའ་སྡུག་ཐོད་དུ་བཏེགས། །
ལག་མགོ་འཁྱག་པས་ལུས་ལ་རེག་མ་བྲ། །
མཆིལ་མ་མངར་མོ་མིད་པར་མ་བྲ་བའི། །
བུ་ངའི་དོན་དུ་ལྟོ་སྐྱ་གོས་ཧྲུལ་གྱིས། །
མི་ཚེའི་ལྷག་མར་བརླགས་པར་མ་གྱུར་ཏམ། །
ཡུམ་ཆེན་ཁྱོད་ཀྱིས་འཚོ་བའི་གོམ་ཁ་ནས། །
བུ་རུལ་ང་ཡི་དོན་དུ་དཀའ་སྡུག་གིས། །
ལག་མགོ་སེར་ཁ་རྐང་རྗེན་ཚེར་མའི་ཟུག །
ས་སྟེང་དམྱལ་བར་འགྲིམ་པ་མ་ཚོར་རམ། །
སྙིང་རྗེ་ཆེན་པོའི་སེམས་པ་རྒྱུན་བསྐྱེད་པའི། །
ས་སྟེང་སངས་རྒྱས་གཉིས་པ་མ་ཡུམ་ལགས། །
ཁྱེད་ཉིད་ད་ལྟའི་ལུས་ལ་བདེ་སྡུག་གིས། །
ཚོར་བར་སྟངས་འཛིན་ཇི་ལྟར་མཛད་བཞིན་ལགས། །
ཐོག་མར་ཟས་དང་སྐོམ་གྱིས་སྐྱེད་པར་བྱས། །
བར་དུ་སྨྲ་བརྗོད་སྐད་ཀྱིས་བསླབ་པ་བསྩལ། །
ཐ་མ་བླང་དོར་འབྱེད་པའི་ཤེས་རབ་ཀྱིས། །
སྨྲ་ཤེས་དོན་གོ་མི་ལུས་རིན་ཆེན་སྦྱིན །
བྱམས་པའི་ཐུགས་རྒྱུད་བརླན་པའི་རྗེ་བཙུན་མ། །
འགྲོ་བའི་སྡུག་བསྔལ་སྒྲོལ་བའི་འཕགས་མ་ཁྱེད། །
བྱིས་པའི་གདོན་ཆེན་བཅོ་ལྔ་བཟློགས་མཛད་མ། །
ཁྱེད་ནི་ངེས་པར་དོན་གྱི་ཏཱ་རེ་མ། །
བཞིན་བཟང་ཉ་རྒྱས་ཟླ་བའི་དཀྱིལ་འཁོར་ལས། །
ཐུགས་རྗེའི་སྤྱན་རས་ཟུམ་པར་མི་འགྱུར་བའི། །
བུ་གཅིག་པོ་ལ་བརྩེ་བའི་རྒྱལ་ཡུམ་མ། །
དབྱངས་ཅན་དགྱེས་པའི་ལྷ་མོ་ཁྱེད་ཉིད་ལགས། །
མཁའ་འགྲོ་སྟོང་གི་དགོངས་ཉམས་རིག་པའི་རྩལ། །
གསང་ཆེན་ཌཱཀྐིའི་སྙན་རྒྱུད་མངའ་བདག་རྗེ།།
གཟུང་འཛིན་འཁྲུལ་པ་དམིགས་མེད་དབྱིངས་སུ་དེངས། །
ཡེ་ཤེས་མཚོ་རྒྱལ་སྤྲུལ་པ་ཁྱེད་ཉིད་ལགས། །
རྟོག་མེད་ཡིད་མཁར་ཡུམ་ཆེན་ཟླ་གཞོན་གཟུགས། །
བརྩེ་བས་བསྐྲུན་པའི་རྫིང་བུར་འཕོས་པའི་མོད། །
དྲན་པའི་འདབ་བརྒྱ་གྲོལ་བའི་སྐྱེད་ཚལ་དུ། །
གཅིག་པུ་ལུས་པའི་སེམས་ཀྱི་བུ་ཆུང་སྐྱོ།།
དེ་སྐད་རང་བྱུང་རིག་པའི་ཁྱེའུ་འདི།།
ཡུན་རིང་ཨ་མས་སྟོར་བའི་སྐྱོ་ཤས་ཀྱིས།།
ངལ་གསོ་བསྟི་གནས་ཨ་མའི་པང་ཞུགས་ནས། །
སྒྲིབ་བྲལ་དབྱིངས་ཕྱུག་མ་འདིས་རྟག་ཏུ་སྐྱོངས།
