ཡོད་མེད་བློ་ཡིས་བཞག་པའི་ཤེས་བྱ་དང་། །བདེན་རྫུན་ཡུལ་ལ་ལྟོས་པའི་ཚད་མ་གཉིས། །གཅིག་གི་རྫུན་ཁུངས་གཅིག་ལ་གཏད་མཐོང་ནས། །ཐ་སྙད་ཚད་གྲུབ་འཇོག་ལ་བློ་མ་བདེ། །མ་བརྟག་མ་དཔྱད་འཇིག་རྟེན་རྣམ་བཞག་དང་། །བརྟགས་ཤིང་དཔྱད་པའི་གྲུབ་མཐའི་གཞུང་ལུགས་གཉིས། །གཅིག་གི་རྩ་བ་གཅིག་ལ་ཐུག་མཐོང་ནས། །ཐ་སྙད་ཚད་གྲུབ་འཇོག་ལ་བློ་མ་བདེ། །བློ་ལ་སྣང་བ་ཙམ་གྱི་སྒྱུ་མ་དང་། །དོན་ལ་ཡིན་པར་ངེས་པའི་གཤིས་ལུགས་གཉིས། གཅིག་ཤོས་བདེན་ན་གཅིག་ཤོས་རྫུན་མཐོང་ནས། །ཐ་སྙད་ཚད་གྲུབ་འཇོག་ལ་བློ་མ་བདེ། །རང་སྐྱོན་རི་བོ་འགེབ་པའི་སྔ་རྒོལ་དང་། །གཞན་སྐྱོན་ཁབ་ཀྱིས་འཚོལ་བའི་ཕྱི་རྒོལ་གཉིས། །གཅིག་ལས་གཅིག་རྒྱལ་རེས་སུ་བྱེད་མཐོང་ནས། །ཐ་སྙད་ཚད་གྲུབ་འཇོག་ལ་བློ་མ་བདེ། །གྲོགས་པོ་ཚད་མར་ཞེན་པའི་བདེན་འཛིན་དང་། །གྲོགས་ཀྱི་ཕན་པར་རྟོགས་པའི་ཚད་མ་གཉིས། །སྲེད་པ་སྐྱེད་ལ་ཁྱད་པར་མི་འདུག་པས། །ཐ་སྙད་ཚད་གྲུབ་འཇོག་ལ་བློ་མ་བདེ། །དགྲ་བོ་བདེན་པར་ཞེན་པའི་དངོས་འཛིན་དང་། །དགྲ་ཡིས་གནོད་པ་ངེས་པའི་བདེན་འཛིན་གཉིས། །ཞེ་སྡང་སྐྱེད་ལ་ཁྱད་པར་མ་མཐོང་ནས། །ཐ་སྙད་ཚད་གྲུབ་འཇོག་ལ་བློ་མ་བདེ། །རྗེས་དཔག་ཚད་མ་མངོན་སུམ་བློ་ལས་སྐྱེས། །མངོན་སུམ་བདེན་རྫུན་རྗེས་སུ་དཔག་པས་དཔྱད། །ཕ་ཡི་དཔང་པོ་བུ་ཡིས་བྱས་པ་འདིས། །ཐ་སྙད་ཚད་གྲུབ་འཇོག་ལ་བློ་མ་བདེ། །རིག་པས་དཔྱད་ན་ཤིང་རྟའི་སྲོལ་ལ་བརྟེན། །ཤིང་རྟ་ཆེན་པོ་རིག་པའི་སྟོབས་ཀྱིས་སྒྲུབ། །རང་ཐག་ཆོད་ན་སུ་ཡིས་རྗེས་སུ་འབྲང་། །རང་ཐག་མ་ཆོད་སུ་ལ་ཡིད་རྟོན་བྱེད། །ཡང་དག་རིགས་པ་ངེས་དོན་ལུང་ལས་རྙེད། །དྲང་ངེས་ཁྱད་པར་དྲི་མེད་རིགས་པས་འབྱེད། །རིག་པས་ཤེས་ན་ངེས་དོན་ཅི་ལ་འཚོལ། །རིགས་པས་མ་ཤེས་ངེས་དོན་ག་ལ་རྙེད། །བྱམས་མགོན་ཁྱི་མོ་མཐོང་བའི་ངང་ཚུལ་འདིས། །མ་བརྟགས་ལྷན་སྐྱེས་བློ་ལ་ཡིད་མ་ཆེས། །དབུ་སེམས་མཁན་པོའི་ལྟ་གྲུབ་འགལ་ལུགས་འདིས། །དཔྱོད་ལྡན་མཁས་པའི་བློ་ལ་ཡིད་མ་ཆེས། །ཕལ་པ་དྲང་པོའི་རྗེས་སུ་འབྲང་འབྲང་ནས། །རྒུད་པའི་རྩ་བ་ལྷན་སྐྱེས་བདེན་འཛིན་རྙེད། །མཁས་པ་དྲང་པོའི་རྗེས་སུ་འབྲང་འབྲང་ནས། །དེ་ལས་སྡུག་པའི་ཀུན་བརྟགས་བདེན་འཛིན་རྙེད། །ཡོད་མེད་ཡིན་མིན་བདེན་རྫུན་ལ་སོགས་པའི། །རྩོད་པའི་འུར་སྒྲ་སྒྲོག་པའི་འཇིག་རྟེན་འདིར། །རྟག་ཏུ་ཀུན་མཐོང་ཤེས་བྱ་ཡིན་པ་སྣང་། །རྒྱུན་དུ་གང་གོམས་ཚད་མ་ཡིན་པར་སྣང། །མི་མང་གང་ལ་དགའ་བདེ་བདེན་པ་དང་། །ཁ་མང་གང་ལ་མཐུན་དེར་གྲུབ་མཐར་སྣང་། །མི་རེའི་ཁོང་ན་མི་མཐུན་ཚད་མ་རེ། །དེ་ཡི་རྒྱབ་སྐྱོར་རྡོ་རྗེའི་བཀའ་ལུང་རེ། །ལ་རེའི་རྒྱབ་ན་མི་མཐུན་ཆོས་ལུགས་རེ། །དེ་ཡི་རྗེས་འབྲང་མཁས་བླུན་སྟོང་ཕྲག་རེ། །འདི་ཉིད་བདེན་ལ་འདི་ཡིས་མི་བསླུ་ཞེས། །རང་གི་བདེན་ཁ་རང་ལ་སྦྱིན་པ་འདི། །རིགས་མཐུན་སྐྱེ་བོའི་ཚོགས་རྣམས་ཉམས་རེ་དགའ། །མི་མཐུན་ཚོགས་ལ་སྨྲ་ན་ཞེ་རེ་ཁྲེལ། །མི་མཐུན་རིགས་དྲུགས་འགྲོ་བའི་རྒྱལ་ཁམས་འདིར། །བཅུ་ཡིས་འདོད་པ་བརྒྱ་ཡིས་མི་འདོད་ཅིང་། །མི་ཡིས་མཐོང་བར་ལྷ་ཡིས་མི་མཐོང་བས། །བདེན་རྫུན་ཚད་མའི་ཁྲིམས་ཐག་སུ་ཡིས་ཆོད། །ཤེས་རབ་སྦྱངས་བས་མི་ཚེ་ཟད་བྱས་ཏེ། །གྲུབ་མཐའ་རྒན་པོའི་བློ་ཡང་འཁྲུལ་གྱུར་ན། །འཇིག་རྟེན་བླུན་པོའི་རྫུན་གྱི་སྣང་བ་ལ། །ཐ་སྙད་ཚད་མར་ཡིད་རྟོན་བྱེད་པར་འཁྲུལ། །མཁོ་ཚད་བཟང་ཚད་སེམས་ཀྱི་འཆར་སྒོ་རུ། །གུད་དུ་ཕྱེས་ནས་ཚད་མ་འདོད་པ་དེས། །སྒྱུ་མའི་གྲོང་ཁྱེར་ཞིག་པའི་ཐང་སྟོང་དུ་། །མིག་འཕྲུལ་ནོར་བུའི་ཕུང་པོ་སླར་ཡང་རྙེད། །བཞིན་རས་ཅུང་ཟད་འགྱུར་ཡང་འགྱུར་བྱེད་ཅིང་། །མེ་ལོང་ཅུང་ཟད་འགྱུར་ཡང་འགྱུར་བྱེད་པའི། །མི་བརྟན་འགྱུར་བའི་ཤེས་བྱའི་གཟུགས་བརྙན་འདི། །ནམ་ཞིག་མཐའ་ལ་གཏད་དུ་ཡལ་བར་ངེས། །དཔྱད་པ་འདི་ལ་ཐུག་པས་མེད་དོ་སྙམ། །ལག་པ་ཁབ་ལ་འཕྲད་པས་ཡོད་དོ་སྙམ། །མྱོང་བ་མངོན་སུམ་ལག་པས་ཡིན་ནམ་སྙམ། །སྣང་བ་འཁྲུལ་པ་སྲིད་པས་མིན་ནམ་སྙམ། །ཡོད་པའི་རྩ་བ་བཙལ་བས་མེད་དོ་སྙམ། །མེད་པའི་རྩེ་མོ་མཐོང་བས་ཡོད་དམ་སྙམ། །བདེན་པའི་ས་བོན་བཏབ་ན་རྫུན་པར་ཤེས། །རྫུན་པའི་འབྲས་བུ་མྱོང་ཚེ་བདེན་པར་སྣང་། །ཡིད་ཀྱིས་མེད་པར་ཐག་ཚོད་ཅིང་། །མིག་གིས་ཡོད་པར་མཐོང་བའི་ཚེ། །ཞྭ་སེར་མཁན་པོས་མ་བསླབ་ཀྱང་། །སྒྱུ་མའི་བློ་ལས་གཞན་ཅི་འབྱུང་།།
