༄༅།། སྤྲེལ་ལོ་གསར་ཚེས་ལ་ཕུལ་བའི་ཀ་རྩོམ།

མགར་ཐར་ཐུབ་བསྟན། རྩོམ་སྒྲིག་པ།དབང་ཆེན།ཡོང་ཁུངས།གངས་ལྗོངས་ཉི་གཞོན་དྲ་བ། སྤེལ་དུས། 03-01


ཀ་གདུང་ཤིང་གིས་བྱས་པའི་བོད་ཁྱིམ་དུ།།

ཁ་དོག་སྣ་མང་ཟས་ཀྱིས་སྡེར་ཁ་བཤམས།།

ག་ལེའི་ལོངས་སུ་སྤྱད་དེ་སྤྲོ་འཛུམ་ཁེངས།།

ང་ཅག་སྐྱིད་པའི་གནམ་ལོ་གསར་པ་རོལ།།

ཅ་ནེའི་ཆང་སྐྱེམས་བཏུང་བས་ངག་སྒོ་ཕྱེ།།

ཆ་ལུགས་བོད་ཆས་དག་མའི་སྲོལ་དུ་འཛིན།།

ཇ་མར་རྩམ་དྲི་འཐུལ་བའི་ཁ་བ་ཅན།།

ཉ་གང་ཡར་ཚེས་གནམ་ལོ་གསར་པ་རོལ།།

ཏ་ལའི་ལྗོན་བཞིན་དུས་རབས་ཉེར་གཅིག་ནང་།།

ཐ་ཆུང་མི་ཚེ་སྐྱིད་སྡུག་རེས་མོ་བརྒལ།།

ད་ལོ་མེས་པོ་སྤྲེལ་གྱི་རང་ལོ་ཚེས།།

ན་རྒས་ཕོ་མོས་གནམ་ལོ་གསར་པ་རོལ།།

པ་ཊ་རི་མོ་མཛེས་པའི་གདན་ཐོག་ཏུ།།

ཕ་ཁུ་རི་རྒྱལ་ལྷུན་པོ་གྲལ་ལ་བཞུགས།།

བ་འབྲིའི་འོ་ཞོ་མར་ལོ་ལྷོད་ཀྱིས་བཞེས།།

མ་སྲུ་མིང་སྲིང་གནམ་ལོ་གསར་པ་རོལ།།

ཙ་རི་གནས་ཀྱི་ལྷ་ལ་ལྷ་བསང་གཏོང་།

ཚ་བུ་ཞང་པོའི་སྲོལ་གྱིས་གཉེན་སྟོན་སྤེལ།།

ཛ་དྲག་སྟོབས་ཀྱིས་འདོ་བའི་བང་ཁ་འགྲན།།

ཝ་ལེའི་སྐྱིད་པའི་གནམ་ལོ་གསར་པ་རོལ།།

ཞྭ་ལྟར་གཙུག་ན་བཀུར་བའི་སྐུ་གསུང་ཐུགས།།

ཟ་འོག་དར་གྱིས་གསོལ་ཞིང་བླ་ན་གུས།།

འ་འུར་དབེན་ཞིང་ཁ་དགེ་རླང་རྟ་བསྒྲོན།།

ཡ་རབས་ལུགས་ཀྱི་གནམ་ལོ་གསར་པ་རོལ།།

ར་བ་གངས་ཀྱིས་བསྐོར་བའི་གོ་ལའི་རྩེའི།།

ལ་ཐང་ལུང་པར་གནས་པའི་རང་ཅག་པ།།

ཤ་རུས་གདུང་རྒྱུད་གཅིག་པའི་སྤུན་ཟླ་སྟེ།།

ས་ཡ་དྲུག་གིས་གནམ་ལོ་གསར་པ་རོལ།།

ཧ་ལས་མགུ་བའི་སྙན་ཚིག་མ་ིཤེས་ཀྱང་།

ཨ་མྱེས་བྱིན་པའི་རང་སྐད་གཙང་མ་དེས།།

ཧ་ཅང་དགའ་བའི་གནམ་ལོ་གསར་བའི་ནང་།།

ཨ་མ་གངས་རིའི་ལྗོངས་ལ་སྐྱེས་སུ་བྲིས།།


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1