དབང་ཆེན།

 

བོད་མིའི་གོས་ཀྱི་རིགས་ལ་ཆེ་ས་ནས་དབྱེ་ན་ཕོ་ཆས་དང་མོ་ཆས་གཉིས་སུ་མ་འདུས་པ་མེད་ལ།ཡང་གྱོན་མཁན་གང་ཟག་གི་རྟེན་གྱི་སྒོ་ནས་དབྱེ་ན་སྐྱ་ཆས་དང་གྲྭ་ཆས་གཉིས།ས་གནས་ཀྱི་སྒོ་ནས་དབྱེ་ན་དབུས་ཆས།ཁམས་ཆས།ཨམ་ཆས་ཏེ་གསུམ།བྱེད་ལས་ཀྱི་སྒོ་ནས་དབྱེ་ན་དབྱར་ཆས་དང་དགུན་ཆས་གཉིས།བཟོ་རྒྱུའི་སྒོ་ནས་དབྱེ་ན་སློག་པ།སྣམ་བུ།ཚ་རུ།བར་ཕྱིང་།གོས་ལྭ་སོགས་མཐའ་ཡས་པ་དང་།ཡང་ཐོབ་དང་གོ་གནས་ཀྱི་སྟེང་ནས་རྒྱ་ལུ་ཆས།ལྷ་ལྕམ་ཆས།ཕྱག་མཛོད་ཆས།བློན་ཆས་སོགས་དང་།དར་ཡུལ་གྱི་ཆ་ནས་སོག་ཆས།ཧོར་མོའི་ཆས་སོགས་མང་པོ་ཞིག་ཡོད། དེ་ལས་གྱོན་མཁན་གང་ཟག་གི་རྟེན་གྱི་སྒོ་ནས་དབྱེ་ཚུལ་དེ་ལ་རྣམ་གྲངས་གཞན་དག་འདུ་ནུས་པས།སྐྱ་ཆས་ལ་བོད་ཆོལ་ཁ་གསུམ་གྱི་ཡུལ་སོ་སོར་གོས་ཀྱི་གྱོན་སྟངས་དང་།རྣམ་པ།ཆ་ལུགས་སོགས་མི་འདྲ་བ་མཐའ་ཡས་པ་ཞིག་བྱུང་ཡོད་པ་དང་།དེ་དག་རེ་རེ་ནས་བརྗོད་ཐབས་བྲལ་ཡང་ཆེ་ས་ནས་བལྟས་ན་ཕོ་ཆས་རྣམས་ལྭ་བའི་ཁོབ་ཐུང་།སྐྱེས་པ་རྣམས་ཀྱིས་ལྭ་བ་ཅུང་བསྡོམས་ཏེ་ལྭ་འདབས་པུས་ཚིགས་སུ་སླེབས་ཙམ་ནས་སྐ་རགས་བཅིངས་པ་དང་།བུད་མེད་རྣམས་སྤྱིར་བཏང་དུ་ལྭ་འདབས་རྐང་པའི་བོལ་ལ་རེག་ཙམ་ནས་སྐ་རགས་འཆིང་། （1）ཞྭའི་རིགས་ལ།བོད་ཞྭའི་བྱེ་བྲག་རྨོག་རིལ་ཨམ་ཅོག་ཅན།མགོ་སྐྱོབ་ཀྱི་རྨོག་ཞྭ།རྒྱ་ལུགས་ཀྱི་ཞྭ་མོ་སྲུབ་ཟན་སུམ་བརྩེགས་ཅན་གྱི་རྨོག་ཞུ།བྱང་འབྲོག་གི་གཟབ་ཞྭ་ཨར་ཞྭ།འབྲོག་པའི་ཕྱིང་ཞྭ།དོམ་ལྤགས་ཀྱིས་བཟོས་པའི་གཟི་དོམ།ཆང་ས་རྒྱག་དུས་མནའ་མར་བསྐོན་རྒྱུའི་སོག་ཞྭ།ཝ་ལྤགས་ཀྱིས་བཟོས་པའི་ཝ་ཞྭ།རྣ་བཞི།རྒྱ་ཞྭ་ལི་མོ།རྩྭ་ཞྭ།ཐང་ཞུ།ཚར་ཞུ།གོར་ཞྭ།བསིལ་ཞྭ།ཅ་ལ།འཕུར་ཞྭ།གཞན་ཡང་སྔར་བོད་ཀྱི་རྩེ་དྲུང་གིས་མཛད་སྒོར་གྱོན་རྒྱུའི་ཞྭ་དཀར།ཝ་ཞྭ་རྣ་བཞི།ཚེ་རིང་སྐྱིན་ཁེབས།ཚ་རུའི་ལེབ་ཞྭ།སྲིད་གཞུང་གི་རིམ་པ་བཞི་པའི་ཡན་གྱི་དབྱར་ཞྭ་ཞྭ་མོ་ལྕགས་མདའ།རས་བསེ་ལས་བཟོས་པའི་བསེ་ཐེབས་སོགས་མང་པོ་ཡོད།（2）སྟོད་གོས་ཀྱི་རིགས་ལ།ཕྱུ་པའི་འོག་ཏུ་གྱོན་རྒྱུའི་ནང་འཇམ།སྟོད་ཀོར།ཚི་ལེན།ཁམས་འཇམ།ཁོག་ཚེ་སོགས་རྒྱུ་སྣ་ཚོགས་ལས་བཟོས་པའི་བྱེ་བྲག་མང་པོ་དང་།གཡུལ་གྱི་གོ་ཁྲབ།ལྕགས་ཁྲབ་སོགས་སོ།།
（3）དོར་མའི་རིགས་ལ།རྒྱུ་རས་དང་།སྣམ་བུ།གོས་ཆེན།པགས་པ།དར་ཟབ་སོགས་ལས་བྱས་པའི་དོར་ཐུང་།དོར་རིང་།དོར་མ་ནང་ཚངས་ཅན།གསང་ཁེབས་ཏེ་དོར་རྟ།དོར་ལྷུག་མ།འབུ་རས་དོར་ཁྲ་བཅས་སོ།།
（4）ལྷམ་གྱི་རིགས་ལ།བཟོ་རྒྱུ་མི་འདྲ་བའི་སྒོ་ནས་ཕོ་ཟོམ།མོ་ཟོམ།རས་ཟོམ།ཀོ་ལྷམ།འཇའ་ཆེན།སག་ལྷམ།སྦལ་ཁ།ལྷམ་སྣེ་འཁྱིལ།རྒྱ་ལྷམ།ཕྱིང་འབོབ།ཐིག་འབོབ།ལྷམ་རྟ་ཟོན་མ།ལྷམ་སྤུ་མ།གཞན་ཡང་འཁོར་ལོས་བསྒྱུར་པའི་རྒྱལ་པོའི་ལྷམ་དུ་གྲགས་པའི་ལྷམ་ཉེ་བའི་རིན་པོ་ཆེའི་རིགས་སུ་གཏོགས་པ་སོགས་སོ།།
（5）ལྭ་རིང་གི་རིགས་ལ།ས་གནས་ཀྱི་དབང་དུ་བྱས་ན་དབུས་ཆས།ཨམ་ཆས།ཁམས་པའི་ཆས་དང་།དེ་དག་ལ་ཕོ་ཆས་དང་མོ་ཆས།བཟོ་བྱེད་རྒྱུའི་ཆ་ནས་སྣམ་བུ་སྤུ་མས་བཟོས་པའི་ལྭ་བ།ལྭ་ཤག་སྟེ་ཕྱུ་ཆེན།གོས་ལྭ།རྒྱུ་པགས་པས་བྱས་པའི་སློག་པ།ལུ་གུའི་པགས་པས་བྱས་པའི་ཚ་རུ།ཝ་སླག །སྲམ་སླག །གཡི་སླག །ཤྭ་ཚར།གླ་ཚར།ཕྲུགས་ལྭ།སྣམ་བུའི་ལྭ།ཕྱིང་ལྭ།ཐེར་མས་བཟོས་པའི་ཐེར་ལྭ།དབུས་མོའི་དབུས་ལྭའམ་བོད་ལྭ།རས་ལྭ།བར་ཕྱིང་།གཡོགས་མ།གཞན་ཡང་ཡུལ་གཞན་ནས་དར་བའི་སོག་ཆས།སོག་སླག །ཧོར་མོའི་ཆས།རྩེ་དྲུང་ཚོའི་ལས་གོས་ཏེ་གོས་སྟོད།རྒྱ་ལུའི་ཆས་ཏེ་བོད་ཀྱི་དྲུང་འཁོར་ཚོས་གྱོན་རྒྱུའི་གཟབ་ཆས་སོགས་སོ།། ཕྱི་གོས་རྒྱན་དང་བཅས་ལ་རྒྱལ་སྲིད་སྣ་བུདན་ཚང་ལུགས་ནི།གཟན་གྱི་གླང་ཆེན།ཀོང་རྣས་འཁོར་ལོ།པན་ཏོག་གིས་བཙུན་མོ།སྐེད་གྲིས་དམག་དཔོན།ཁུག་ཁྲ་ཐིག་ཤུབས་ཀྱིས་རྟ་མཆོག །ཨར་ཀོང་གིས་བློན་པོ།རིན་ཆེན་སྤྱིས་ནོར་བུ་རིན་ཆེན་བཅས་མཚོན་ཅིང་དེ་དང་ལྷ་ལྕམ་ཆས་སོགས་གོས་ཀྱི་བྱེ་བྲག་ཧ་ཅང་མང་པོ་ཞིག་དར་ཡོད་དོ།།