༄༅།། འབྲུ་སྒ་སྡེའི་མཆོང་མཁར་སྨུག་པོའི་གནའ་ཤུལ།

བསྟན་འཛིན་ཕུན་ཚོགས། རྩོམ་སྒྲིག་པ།ཚེ་དཔལ། ཡོང་ཁུངས།ངེད་དྲ་བ། སྤེལ་དུས། 08-23


བསྟན་འཛིན་ཕུན་ཚོགས། འཇམ་དབྱངས་དབང་པོས་པར་བླངས།

        འབྲུ་སྒ་སྡེ་ཆོས་སྐྱོང་བེར་ནག་ཞེས་པ་གླིང་དཔའ་རྟུལ་སུམ་བཅུའི་ནང་ཚན། ཡང་རྟུལ་དམ་པ་མི་བདུན་དང་ཞེ་ཐུལ་ཁྲ་གླག་སྤྱང་གསུམ་ལས་གླག་རྒོད་པོ་ལྟ་བུའི་དཔའ་རྩལ་ཡོངས་སུ་གྲགས་པ། གླིང་གེ་སར་རྒྱལ་བོའི་བཀའ་བློན། སྒ་པ་རིན་ཆེན་ཚོ་དྲུག་དང་འབྲུ་པ་ཉིན་སྲིབ་གཉིས་ཀྱི་མངའ་བདག་ཡིན། འབྲུ་སྒ་སྡེ་ཆོས་སྐྱོང་བེར་ནག་ཞེས་པའི་མཚན་གྱི་གོ་དོན་ནི། འབྲུ་ཞེས་པ་ཨ་ལྕག་འབྲུའི་གདུང་རྒྱུད་ལས་ཆད་པ། སྒ་སྡེ་ཞེས་པ་སྒ་པ་རིན་ཆེན་ཚོ་དྲུག་གི་མངའ་བདག་ཡིན་པའི་དོན། ཆོས་སྐྱོང་བེར་ནག་ཞེས་པ་ནི་ལྷ་ཆོས་སྐྱོང་མགོན་པོ་བེར་ནག་གི་རྣམ་སྤྲུལ་ཡིན་པས་སོ། ། འབྲུ་སྒ་སྡེ་ཆོས་སྐྱོང་བེར་ནག་ཁོང་ནི་རྩལ་ཆེན་འགྲན་ཟླ་བྲལ་བ། འཛམ་བུ་གླིང་གི་རྩལ་ཆེན་མི་གསུམ་གྲལ་ལས་ཆེས་ལྷག་པ་ཏེ། གླང་ཆེན་ཁུ་ཚུར་གྱིས་བསྒྲིལ་བ་དང་། རི་བོ་དཔུང་པས་ཁུར་བ་ཡིན། ཁོང་ནི་འཕྲུལ་སྒྱོགས་ལ་རང་དབང་ཐོབ་ཤིང་། སྔགས་དང་མཐུའི་ནུས་པ་མཐའ་ཡས་པས། གླིང་མཐུ་ཆེན་མི་གསུམ་གྱི་གྲལ་དུ་གྲགས་ཅན་ཡིན་ཏེ། ཧོར་གླིང་གཡུལ་འགྱེད་སྐབས། ཧོར་དམག་རྩལ་ཆེན་ནམ་མཁར་སྤར་འཛིན་གྱིས་རྡོ་ཕ་བོང་གཡག་རོ་སུམ་འགྱུར་ཙམ་ཞིག་གླིང་ལ་འཕངས་པའི་ཚེ། འབྲུ་སྒ་སྡེས་ཕར་ལ་དེ་ལས་ཉིས་འགྱུར་ཙམ་གྱི་སྒྱོགས་རྡོ་འཕངས་པས་བར་སྣང་ནས་ཧོར་རྡོ་བཀག་སྟེ་ཧོར་སྒར་ལ་དེད་ནས་གཏོང་བས། ཧོར་དམག་མང་དུ་བསྒྲིལ། སོག་གླིང་གཡུལ་འཁྲུག་སྐབས། སོག་གི་འབྲོང་རྒོད་རྭ་ཅོ་ནས་བཟུང་སྟེ་བྲག་ལ་བརྡབས་པས་གླིང་དམག་གི་འགྲོ་ལམ་སེལ། འཇང་གླིང་གཡུལ་འཁྲུག་སྐབས། མཐུ་ནུས་ཀྱིས་འཇང་གི་དུག་མཚོ་ནག་པོ་ཕྱེད་ཀ་གཉིས་ལ་ཕྱེས་ཏེ་གླིང་དམག་བགྲོད་པའི་ལམ་ཆེན་གཏོད། གླིང་དམག་གཡུལ་ལས་རྒྱལ་བའི་ཆ་རྐྱེན་བསྐྲུན།

འབྲུ་སྒ་སྡེའི་ཆུ་རྫོང་གི་མཁར་ཤུལ།
        སྒྲུང་མཁན་གྲགས་ཅན་ཟླ་བ་གྲགས་པས་ཕབ་སྒྲུང་མཆོང་མཁར་སྨུག་པོའི་གནམ་རྫོང་ལས། འབྲུ་སྒ་སྡེ་ཆོས་སྐྱོང་བེར་ནག་ཁོང་ནི། ལྷ་ཆོས་སྐྱོང་མགོན་པོའི་རྣམ་སྤྲུལ་ཡིན་པ་དང་། ཕ་སྐལ་ལ་མ་ཧཱ་ཁྲག་འཐུང་བེར། མ་སྐལ་ལ་དུད་སོ་ལྷ་མོ་ཡིན། ཁོང་གི་མི་རབས་གསུམ་གྱི་ཡར་ངོས་སུ། དང་པོ་ལ་སྒ་ཡི་ཆོས་འཕེལ་རྒྱལ། དེའི་སྲས་ལ་མི་ཆེན་སེར། དེའི་སྲས་ལ་ཉི་མ་རྒྱལ། འབྲུ་སྒ་སྡེའི་སྲས་ལ་འབྲུ་སྲས་ཐོག སྲས་མོ་ལ་ནི་ཀླུ་མོ་མཚོ་ཟེར་བ་དེའི་རྒྱུད་པ་ད་དུང་བརྗོད་དུ་ཡོད་ཀྱང་འདིར་མ་བཀོད། འབྲུ་སྒ་སྡེའི་ཆིབས་པ་ནི་འདོ་བ་འབྲོང་འདུར་སྨུག་པོ་ཟེར། ཁོང་གི་ཕྱག་མཚན་ལ་བཙན་མདུང་གནམ་ལྕགས་ཕྲ་རིང་བཅས་འཁོར་གསུམ་དང་། ད་དུང་། གཏོར་ཟོར། སྒྱོགས་ཐག འཕྲུལ་ཞགས་སོགས་ཁྱད་པར་གྱི་མཚོན་ཆ་ཡང་ཐོགས་ཡོད། ཡང་ན་ཁོང་ཉིད་ཀྱིས་གོ་མཚོན་ཅིའང་མི་དགོས་པར་སྤར་འཛིང་རྐྱང་པས་དགྲ་ལས་རྣམ་པར་རྒྱལ་ཐུབ་པའི་ཁྱད་འཕགས་ཅན་གྱི་དཔའ་ཐུལ་ཞིག་ཀྱང་ཡིན།

འབྲུ་སྒ་སྡེའི་དཔུང་རྡོ།
        འབྲུ་སྒ་སྡེ་ཁོང་དང་ཁོང་གི་མི་རབས་ཀྱིས་སྐྱོང་བའི་མངའ་ཁོངས་དང་བཞུགས་པའི་གདན་ས་ནི། བསིལ་ལྡན་འབྲི་ཆུ་སྔོན་མོའི་རྒྱུད་དུ་ས་སྒ་ལུང་པདྨ་གཡས་འཁྱིལ་དུ། རི་མཎྜལ་མཆོད་པ་ལྟ་བུའི་གླིང་ལ། མཁར་མི་འགྱུར་མཆོང་མཁར་སྨུག་པོ་བཞེངས་ཏེ། མཁར་ཡིད་འོང་མཛེས་སྡུག་ལྡན་པ། སྨུག་པོ་མཆོང་གི་གྲུབ་གཞི། གདུང་ཆུང་པདྨ་ར་གཱ་ཅན། ཨ་ག་ཤིང་གི་ལེབ་དྲུག་ཡོད། སྒང་བཞི་གནམ་ལྕགས་ཁྲོ་ལས་གྲུབ་པ་དང་། འབྱུང་བཞི་ས་སིནདྷུ་ར་བཅས་ཀྱི་རིན་པོ་ཆེ་སྣ་ཚོགས་ཀྱིས་རྒྱན་སྤྲས་ཡོད། མཁར་དེའི་སྒོ་བཞིའི་གཏད་ཕྱོགས་སུ། ཤར་ལ་འབྲུ་མཁར་སྟག་མོ་གསེར་རྫོང་། སྒ་ཇོ་བོའི་གསེར་གྱི་ས་དཔྱད་ལྡན། ལྷོ་ལ་གོ་རྫོང་འབུམ་ཐུབ་ཡོད། གོ་མཚོན་འབུམ་གྱི་གཏེར་ཁ་གནས། ནུབ་རྫོང་རྨ་བྱ་ར་ག་ཟེར། དེའང་གནས་དེར་ས་དབྱིབས་རྨ་བྱའི་སྒྲོ་ལྟར་མཛེས། བྱང་རྫོང་ཆུ་སྲིན་ཁ་འཐབ་ཞེས་ཆུ་བོ་རྨ་འབྲི་རྫ་གསུམ་བཅས་པའི་འབྱུང་གཞི་ཆུ་སྲིན་འདུས་པ་ལྟ་བུ་མཁར་བཞིར་ཕྱོགས་བཞིར་བཞེངས། ལྟེ་བའི་མཁར་རྫོང་མཆོང་མཁར་སྨུག་པོའི་རྩ་བ་རྡོ་རྗེ་བྲག་རི་ལ་བརྟེན་ཏེ། ཤིན་ཏུ་སྲ་བརྟན་གྱི་རང་བཞིན་དུ་ཆགས། ཉེ་འདབས་སུ་སྒ་སྡེ་ཆུའི་གཏེར་མཛོད་ཆུ་རྫོང་སྨུག་པོ་ཞེས་པ་ཡོད། མཆོང་མཁར་སྨུག་པོའི་ཉེ་འཁོར་རུ། སྣང་རྩེ་རི་དང་། གཡུ་རི། ཨ་མྱེ་གཡུ་རྒན། སྒྱོགས་རི་དང་། བྱ་གདོང་གཡུ་བཀྲ་རྫ་བཀྲ་བཅས་པའི་རི་བོ་གནམ་ལ་འགྱིང་འདྲ་དང་། རི་བརྒྱུད་མ་ཆད་རིང་དུ་ཡོད། སྒ་སྡེ་མཆོང་མཁར་སྨུག་པོའི་ཉེ་འཁོར་སུ་འབྲུ་སྒ་སྡེ་ཤེད་སྦྱང་གི་དཔུང་རྡོ་དང་། མཆོང་མཁར་སྨུག་པོའི་ཤར་བྱང་ཕྱོགས་སུ། ཕྱི་བྲག་རྡོའི་ར་བ་བསྐོར་བ། ནང་བྲག་དིལ་རྟའི་རྨིག་ར་ལྟ་བུ་ཞིག་ཡོད་པའི་གནས་དེ་ལ་སྒ་སྡེའི་རྟ་ར་ཟེར། ད་དུང་ཉེ་འཁོར་རུ་སྒ་སྡེའི་དམག་གིས་མདའ་གོ་མཚོན་བཟོ་བར་ངར་ཕབ་སའི་མཚོ་འཁྱིལ་དམག་ཏིག་མཚོ་བཅས་རང་བྱུང་གི་གནའ་ཤུལ་མང་པོ་ཞིག་དངོས་སུ་མཚོན་དུ་ཡོད།

སྒ་སྡེའི་ཚཱ་ཕུང་། 
        འབྲུ་སྒ་སྡེའི་མཆོང་མཁར་སྨུག་པོའི་མཁར་མིང་ས་ལ་ཐོགས་སྟེ། ད་ལྟར་ཁྲི་འདུ་རྫོང་མཁར་གྱི་ནུབ་བྱང་ཟུར་དུ་བྲག་རི་སྨུག་པོ་མཎྜལ་བཤམས་འདྲ་ཞིག་ཡོད་པ་དེ་ལ་མཆོང་མཁར་བྲག་རི་ཞེས་མི་ཚང་མས་བཤད་སྲོལ་ཡོད། བྲག་རིའི་སྟེང་དུ་མཆོང་མཁར་སྨུག་པོ་གྱང་ཤུལ་དང་བྲག་རིའི་འོག་ཏུ་སྒ་སྡེ་ཆུ་མཛོད་ཀྱི་གྱང་ཐོའང་དངོས་སུ་མཐོང་རྒྱུ་ཡོད། གྱང་ཐོ་གནས་པའི་བྲག་རི་འོག་ནས་གཏེར་ཆུ་དྭངས་བསིལ་རྒྱུན་མི་ཆད་པ་བཞུར་བཞིན་འདུག མཆོང་མཁར་སྨུག་པོ་གཡས་གྱི་ཡོ་གདོང་ངོས་སུ(ད་ལྟ་ཤིང་ལོའི་གདོང་ཞེས་འབོད་སྲོལ་ཡོད་པ་སྒྲ་ཟུར་ཆགས་ཡིན་ན་སྙམ།)འབྲུ་སྒ་སྡེ་རྒྱང་སོའི་མཁར་ཤུལ་ཀྱང་ལྷག་ཡོད། བྱང་ཤར་ཕྱོགས་ཀྱི་ཉེ་བའི་སར་རྟ་རའི་ཤོག་ཟེར་བའི་གདོང་ལ་གེ་སར་ཚོམས་ཁང་ཞེས་འབོད་པའི་མཁར་ཤུལ་ཡོད་པ་དེའང་སྒྲ་ཟུར་ཆགས་ནས་འབྲུ་སྒ་སྡེའི་ཚོམས་ཁང་ཡིན་པ་སྙམ། ཉེ་འཁོར་ཤར་ལྷོའི་ཕྱོགས་སུ་ཆོས་ལུང་ཞེས་པའི་འདབས་སུ། གནའ་སྔ་མོའི་ཚཱ་ཁང་ཡུན་དུ་གནས་པའི་ཤུལ་ཞིག་ཡོད་པ་དེ་འབྲུ་སྒ་སྡེ་ཚཱ་ཕུང་ཡིན་པར་སྙམ། དེ་ཡང་འབྲུ་སྒ་སྡེ་མདའ་སོགས་གོ་མཚོན་བཟོ་སའི་ས་མིང་སྡེ་ལ་ཐོགས་ཏེ་མཆོང་མཁར་འདབ་གྱི་གྲོང་སྡེ་ལ་མདའ་བ་གྲོང་སྡེ་ཞེས་མིང་འབོད་ལ། གནའ་སྔ་མོ་འབྲུ་སྒ་སྡེའི་དམག་རྩེད་ཀྱི་ཉམས་འགྱུར་དེ་ད་ལྟ་ཡང་ཉེ་མཁོར་གྱི་ཡུལ་མི་རྣམས་ཀྱིས་ཟློས་གར་གྱི་རྣམ་པ་འཁྲབ་སྟོན་དང་འཁྲབ་འཆམ་ཞེས་པའི་རྩེད་མོ་ལས་ཟུར་ཙམ་བརྒྱུད་འཛིན་བྱས་ཡོད་པ་མཐོང་། དེ་དག་མིས་བཟོས་གནའ་ཤུལ་ཀྱང་དངོས་སུ་མཐོང་ཐུབ་པ་ཡིན། མ་ཚད་ས་དེའི་མི་རྣམས་ཀྱི་ངག་རྒྱུན་དུ་མི་ཆད་པ་བརྗོད་པ་དང་། བྱ་སྤྱོད་དུ་ལྷ་མཆོད། ཀླུ་གསོལ། གནས་བསྟོད་སོགས་མི་ཉམས་པ་མཚོན་བཞིན་ཡོད་ལ། ཡུལ་སྡེ་གཞན་ལའང་གནས་དེའི་མཚན་སྙན་ཡང་ནས་ཡང་སུ་གྲགས་པ་ཡིན། །  

སྒ་སྡེའི་རྟའི་རྨིག་རྗེས།
གནའ་ཤུལ་འགྲམ་གྱི་གནའ་བོའི་བྲག་རིས། 


རྩོམ་ཡིག་སྔོན་མ།
སེམས་གཏམ།
རྩོམ་ཡིག་རྗེས་མ།
ལྷ་མོ་གསུང་འབྱོན་མ།

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1