ཧྲང་ཧའེ་ནས་ཁུན་མེང་བར་གྱི་མྱུར་བགྲོད་གཞུང་ལམ་ཧྲོའུ་ཧེའུ་དུམ་བུའི་དུམ་མཚམས་སུ་སྤྱི་ཚེས་19ཉིན་རླངས་འཁོར་རྒྱབ་ཀྱིས་རླངས་འཁོར་མདུན་ལ་བརྡུངས་པའི་དོན་རྐྱེན་ཐོན་ཡོད།འབར་སླ་བའི་དངོས་ཟོག་བླུགས་ཡོད་པའི་ཟོག་འདྲེན་རླངས་འཁོར་ཆུང་གྲས་ཅིག་དང་འགྲུལ་སྐྱེལ་རླངས་འཁོར་ཆེ་གྲས་གཅིག་ཕན་ཚུན་རྡུངས་ཁ་བརྒྱབ་སྟེ།འབར་གས་དོན་རྐྱེན་ཐོན་པས།མི་སྣ་ཤི་རྨས་ཚབས་ཆེན་བཟོས།དོན་རྐྱེན་ཐོན་རྗེས།ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ཚད་མཐོའི་མཐོང་ཆེན་གནང་།རྒྱལ་སྲིད་སྤྱི་ཁྱབ་ཁང་གིས་ཆོག་མཆན་གནང་བ་བརྒྱུད།བདེ་འཇགས་ཐོན་སྐྱེད་ལྟ་སྐུལ་དོ་དམ་སྤྱི་ཁྱབ་ཅུད་དང་སྤྱི་བདེ་པུའུ།འགྲིམ་འགྲུལ་སྐྱེལ་འདྲེན་པུའུ་བཅས་སྡེ་ཁག་གསུམ་གྱིས།འཕྲལ་མར་མཉམ་འབྲེལ་ལས་དོན་ཚོགས་ཆུང་སྒྲིག་འཛུགས་བྱས་ཏེ།དོན་རྐྱེན་ཐོན་ཡུལ་དངོས་ལ་ཐག་གཅོད་ལས་དོན་མཛུབ་ཁྲིད་བྱེད་པར་བསྐྱོད།མིག་སྔར་དོན་རྐྱེན་ནང་མི་43རྐྱེན་ལམ་དུ་ཤོར་བ་དང་།དེའི་ནང་འགྲུལ་སྐྱེལ་རླངས་འཁོར་ཐོག་གི་མི་41ཡོད།མི་དྲུག་ལ་རྨས་སྐྱོན་ཕོག་ཡོད་པས།ས་གནས་དེ་གའི་སྨན་ཁང་དུ་སྐྱོབ་བཅོས་བྱེད་པར་སྐྱེལ་པ་དང་།དེའི་ནང་གི་རྨས་སྐྱོན་ཆུང་ཙམ་ཕོག་མཁན་གཉིས་ལུང་ཧུལ་རྫོང་མི་དམངས་སྨན་ཁང་དུ་སྨན་བཅོས་བྱེད་ཀྱི་ཡོད་པས།ཚེ་སྲོག་ལ་ཉེན་ཁ་མེད་པ་རེད།གཞན་རྨས་སྐྱོན་ཚབས་ཆེ་ཙམ་ཕོག་མཁན་དེ་ཧྲོའུ་ཡང་གྲོང་ཁྱེར་ལྟེ་བའི་སྨན་ཁང་དུ་སྨན་བཅོས་བྱེད་པར་སྐྱེལ།