སྤྱི་ཟླ་2ཚེས་18ཉིན་ནི་ལུགས་རྙིང་གི་ཟླ་བ་དང་པོའི་ཚེས་3ཉིན་ཡིན་ཞིང་། ཀན་སུའུ་ཞིང་ཆེན་ཀན་ལྷོ་བོད་ཁུལ་མཚོ་སྟེང་གྲོང་ཚོར་ལོ་རེར་ཆོས་སྐོར་ཐེངས་རེ་བྱེད་པའི་དུས་ཆེན་ཤར་བ་རེད། གྲོང་ཚོ་ཡོངས་ཀྱི་ཕོ་མོ་རྒན་གཞོན་ཚང་མ་གྲོང་ཚོའི་དགོན་པར་ཕྱིན་ཏེ་དགེ་འདུན་གྱིས་བརྒྱུད་སྤྲོད་གནང་བའི་དཔེ་ཆ་པོ་ཏི་རེ་ཕྲག་པར་ཁུར་ཏེ་གྲལ་རིང་པོ་བསྒྲིགས་ནས་གྲོང་ཚོར་བསྐོར་ཞིང་། ངག་ནས་མཉམ་དུ་མ་ཎིའི་ཡིག་དྲུག་བཏོན་ནས་ལོ་གསར་པར་ལོ་ཆུ་ལམ་ལྷོང་ཡོང་བའི་གཡང་གསོལ་ཞུས་པ་དང་། གྲོང་ཚོར་སྐོར་བ་ཞིག་བསྐོར་རྗེས་ཚང་མས་དཔེ་ཆ་པོ་ཏི་གོ་རིམ་ལྡན་པའི་ངང་དགོན་པར་སྐྱེལ་གྱི་ཡོད་པ་རེད།།