༄༅།། རིག་འཛིན་བསྟན་སྲུང་།

དགེ་འདུན་ཕུན་ཚོགས། རྩོམ་སྒྲིག་པ།དབང་ཆེན།ཡོང་ཁུངས།ངེད་དྲ་བ། སྤེལ་དུས། 08-12


       དགེ་རྒན་ཆེན་མོ་རིག་འཛིན་བསྟན་སྲུང་ནི་བོད་རབ་བྱུང་བཅུ་དྲུག་པའི་ས་ཁྱི་ལོ་་སྟེ་སྤྱི་ལོ༡༩༥༨ལོར་མི་ཉག་རབ་སྒང་དུ་གཏོགས་པ་ས་ལ་དགེ་བཅུ་ཚང་བ།ཡུལ་ལ་བཀྲ་ཤིས་མང་བ།ས་གཞི་ཐམས་ཅད་བདེ་ལ་ཁོད་ཡངས་པ་སྤང་ལྗོངས་དང་མེ་ཏོག་གི་སྐྱེད་ཚལ་བཀྲ་བ།ཚད་པའི་ངད་ཆུང་བ།བྱ་རིགས་སྣ་ཚོགས་ཀྱིས་སྙན་པའི་སྒྲ་འབྱིན་པ་སོགས་ཕྱི་རོལ་ཡུལ་གྱི་བཀོད་པ་འོད་གསལ་ལྷ་ལ་འགྲན་པ་ལྟ་བུའི་མཛེས་ལྗོངས་ཕུན་སུམ་ཚོགས་པའི་དབུས་སུ་ཤར་བཞག་བྲ་ལྷ་རྩེ་ཞེས་གངས་རི་ཤེལ་དཀར་གྱི་མཆོད་རྟེན་འདྲ་བའི་གནས་མདུན་གྱི་ཉེ་ཞོལ་དཔལ་ལྷ་སྒང་གུ་རུ་ཐང་དུ་འབྲོག་སྡེ་གོ་རོ་མ་ཞེས་པར་སྤྱིར་བཏང་གི་འབྲོག་ཁྱིམ་ཞིག་ཏུ་སྐུ་འཁྲུངས་པ་རེད།དགུང་ལོ༨ཀྱི་ཐོག་ཏུ་མཚན་གྱི་སྙན་པ་ཤར་མི་ཉག་རབ་སྒང་དུ་གྲགས་པའི་གསེར་རྒྱ་སྒོ་བླ་མ་བསོད་བཟང་མཆོག་ཀློག་སློབ་པའི་དགེ་རྒན་བསྟེན་ནས་ཡི་གེ་འབྲི་ཀློག་གི་ལམ་དུ་གོམ་པ་སྤོ་འགོ་ཚུགས།ཁོང་ནི་སློབ་སྦྱོང་ལ་སྙིང་རུས་ཆེ་ཞིང་ལྷན་སྐྱེས་ཤེས་རབ་ཀྱི་དཔལ་འབར་བ།དགེ་རྒན་གྱིས་བསླབ་པ་ཐམས་ཅད་ཚེགས་མེད་དུ་མཁྱེན་པས།དགེ་རྒན་ཀྱང་ཁོང་ལ་ཐུགས་རབ་ཏུ་མཉེས།དབྱར་ཟླ་འབྲིང་པོའི་ཉིན་ཞིག་ལ།དགེ་རྒན་གྱིས་ཁོང་སྐུ་གམ་དུ་བོས་ནས་ང་ནི་མི་རྒན་ལ་མགོའི་ཉི་མ་རེད།ཁྱེད་ནི་རིག་པ་ཡག་ཅིག་སྙིང་རུས་ཀྱང་ཆེ་བས།  མ་འོངས་པར་ལྷ་སྒང་རྩྭ་ཐང་གི་ཕར་མཐའ་བརྒལ་ཞིང་རྒྱལ་ཁམས་རིས་མེད་དུ་འགྲིམས་ནས་རིག་གནས་གང་མང་བརྩོན་ན་ཕན་པ་ཆེ་ཞེས་གསུངས་བས་དུས་ཡུན་མི་རིང་བར་དགེ་བའི་བཤེས་གཉེན་ཆེན་པོ་བསོད་བཟང་མཆོག་སྐུ་མྱ་ངན་ལས་འདས་པའི་ཚུལ་བསྟན།ཡིན་ན་ཡང་ཁོང་གི་གསུང་མཆིད་ནི་རིག་འཛིན་བསྟན་སྲུང་གི་སེམས་ངོས་སུ་རྡོ་རྐོས་རི་མོ་ཇི་བཞིན་ནམ་ཡང་བརྗེད་མ་མྱོང་པ་དང་།དུས་དེ་ནས་བཟུང་།དགེ་རྒན་ཆེན་མོ་ཞིག་ཏུ་འགྱུར་བའི་སྨོན་འདུན་ནི་ཁོང་གི་སེམས་དབུས་སུ་དོར་མ་མྱོང་།  ལོ་ཟླའི་འཁོར་འགྲོས་བར་མེད་དུ་མདུན་དུ་བསྐྱོད་ནས༡༩༦༦ལ་སླེབས།སྟབས་མ་ལེགས་པར་ཞིག་ལ།སྐྱེས་སྦྱོང་གཉིས་ཀྱི་རྒྱུ་ལ་བརྟེན་ནས་རིག་གནས་ཀྱི་ཆུ་ཚད་ནི་ཡར་ངོའི་ཟླ་ལྟར་འཕེལ་བཞིན་པའི་སྒང་ལ།གློ་བུར་དུ་རིག་གནས་གསར་བརྗེ་ཆེན་པོའི་དུག་རླུང་ཡང་ལྷ་སྒང་རྩྭ་ཐང་ཏུ་གཡོས་པས་བོད་ཡིག་ནི་རྙིང་བཞིའི་གྲས་སུ་བཞག་ནས་རེ་ཞིག་ཁོང་ཉིད་སློབ་སྦྱོང་ནང་ཞུགས་པའི་གོ་སྐབས་དབེན།ཡིན་ན་ཡང་།དེའི་སྐབས་སུ་རིག་འཛིན་བསྟན་སྲུང་གིས་རྐྱེན་ངན་ཐམས་ཅད་མཐུན་རྐྱེན་དུ་བསྒྱུར་ནས་ཉིན་མོ་གཞུང་ལས་ཁང་གི་ལས་ཀ་ལས་ཤིང་མཚན་མོར་སྒྲོན་མེའི་འོད་ལ་བརྟེན་ནས་སྐོམ་པས་ཆུ་འདོད་ལྟར་དཔེ་ལྟ་བྱས་པས།མི་རིང་བར་ཁོང་ནི་སྡེ་མི་སེར་གྱིས་མངོན་ལྐོག་གཉིས་སུ་གླེང་བའི་རིག་གནས་བར་ཆུང་ཆུང་ཞིག་ཏུ་གྱུར། ༡༩༧༦ལ་ལོ་བཅུའི་གོད་ཁ་མཇུག་བསྒྲིལ་ནས་རྒྱལ་ཡོངས་ཀྱི་ས་ཁུལ་གཞན་དག་དང་འདྲ་བ་ལྷ་སྒང་རྩྭ་ཐང་དུ་ཡང་དཔྱིད་ཀྱི་དཔལ་ཡོན་ཤར།དེའི་དུས་སུ་ལྷ་སྒང་ཤང་ཏང་ཨུ་དང་སྲིད་གཞུང་ཁོང་གི་རིག་གནས་རྐང་རྩ་བཟང་ཞིང་མི་དམངས་ཀྱི་སློབ་གསོར་བློ་སེམས་དཀར་བར་ཤེས་རྟོགས་བྱུང་རྗེས་གོ་རོ་མ་སྡེ་བའི་དམངས་སྒྲུབ་དགེ་རྒན་དུ་བསྐོས།ལོ༢༠ལ་མ་སོན་པའི་རིག་འཛིན་བསྟན་སྲུང་ནི་ཚད་ལྡན་གྱི་སློབ་གྲྭར་འགྲིམ་མྱོང་མེད་མོད།འོན་ཀྱང་དཔེ་ཁྲིད་དང་སློབ་མ་དོ་དམ་བྱ་རྒྱུ་ཚང་མར་ཐབས་མཁས་ཤིང་ངང་རྒྱུད་རིང་བས་ཤང་ཏང་ཨུ་དང་སྲིད་གཞུང་།སྡེ་མི་ཀུན་གྱིས་མགྲིན་གཅིག་ཏུ་བསྟོན་བསྔགས་བྱས།དེས་ཁོང་ལ་ངར་ཤུགས་ཀྱང་མི་དམན་བ་ཞིག་བསྣན་པས་རང་སྦྱོང་གི་ལས་ལ་ཡང་སེམས་དུབ་རྒྱུ་མེད་ལ་ལུས་ཐང་ཆད་རྒྱུ་མེད།སྐབས་འགར་དོགས་གཞི་རེ་འགའ་ཙམ་སེལ་བའི་ཆེད་དུ་ལེ་དབར་བཅུ་ཁའི་ལམ་ཐག་ལ་མ་འཛེམས་པ་དགེ་རྒན་སར་ཕྱིན་པ་དང་།དེའི་སྐབས་སུ་བླ་མ་པདྨ་ཆོས་དར་དང་སྤྲུལ་སྐུ་ཨ་དཔལ་གཉིས་ནི་ཁོང་གི་དོགས་གཅོད་ཀྱི་དགེ་མཆོག་ཏུ་གྱུར།ཞོར་དུ་རྡོ་ཡང་མང་པོ་བརྐོས་པས་རྡོ་རྐོར་མཁས་པར་གྱུར།དེས་ཁོང་རྗེས་སུ་ཡིག་གཟུགས་འབྲི་རྒྱུར་སྒྱུ་རྩལ་གྱི་བག་ཆགས་མི་དམན་པ་ཞིག་འཇོག ༡༩༨༢ལོའི་སྟོན་ཀར་རིག་འཛིན་བསྟན་སྲུང་གི་ལས་དབང་ལ་འགྱུར་ལྡོག་ཆེན་པོ་ཞིག་བྱུང་ཞིང་།ལོ་དེར་སི་ཁྲོན་ཞིང་ཆེན་བོད་ཡིག་སློབ་གྲྭ་སྡེ་དགེ་རྫོགས་ཆེན་དུ་བཙུགས་ཤིང་སློབ་མ་བསྡུས་པས།ཁོང་ནི་རྒྱུགས་སྤྲོད་ནང་ཞུགས་བཞིན་དུ་བདེ་བླག་ངང་སློབ་གྲྭ་དེའི་ཐོག་མའི་སློབ་མར་གྱུར།སློབ་གྲྭ་ནང་ལོ༤ཡི་རིང་དུ་མཁན་པོ་དིས་ཆུང་བློ་ཆོས་དང་།ཀ་ཐོག་མཁན་རྒན་རྒྱལ་མཚན་འོད་ཟེར།ཨ་རིག་རྫའི་ཆོས་རྗེ་མཁན་པོ་པད་ཚེ་ཡར་ལུང་མཁན་པོ་བསོད་རིག ར་སྐོར་མཁན་པོ་ཐུབ་ནོར།བྲག་འགོ་དགེ་བཤེས་བློ་བཟང་དོན་འགྲུབ།གཟན་དཀར་སྤྲུལ་སྐུ་ཐུབ་བསྟན་ཉི་མ།དགེ་མང་མཁན་པོ་དབང་མོ།སྐུ་ནུབ་མཁན་པོ་འོད་ཟེར།མདོ་སྒར་ཟླ་གསལ།ཁྱུང་པོ་བླ་མ་བདུད་འདུལ།རྩིས་མཁན་ཐུབ་དབང་སོགས་སྤྱོད་ཤེས་གཉིས་ལྡན་གྱི་དགེ་བའི་བཤེས་གཉེརན་དུ་མ་ཞིག་བསྟེན་ནས་བཅུ་ཕྲག་རིག་གནས་ལ་སློབ་གཉེར་མཛད་པས་ཕྱིན་ཆད་དགེ་རྒན་ཆེན་མོ་ཞིག་ཏུ་འགྱུར་རྒྱུར་རྨང་གཞི་བརྟན་པོ་ཞིག་འདིང་།ཞིང་ཆེན་བོད་ཡིག་སློབ་གྲྭ་ནས་སློབ་མཐར་ཕྱིན་རྗེས།ཁོང་དར་མདོ་མི་རིགས་དགེ་འོས་སློབ་གྲྭར་ལས་བགོས་བྱས་ནས་དགེ་རྒན་གྱི་འགན་དངོས་སུ་བཞེས་པ་དང་ཁོང་ནི་ཤེས་རྒྱ་ཆེ་ཞིང་སློབ་ཁྲིད་ཀྱི་ཐབས་ལ་མཁས་པས་སློབ་མ་རྣམས་ཀྱི་དགའ་བསུ་ཚད་མེད་ཐོབ།དེ་ནི་ཁོང་གི་ཆུང་དུས་ནས་སེམས་དབུས་སུ་བཅངས་པའི་དགེ་རྒན་ཆེན་མོ་ཞིག་ཏུ་འགྱུར་རྒྱུའི་འདུན་པ་མངོན་པར་འགྱུར་ཉེ་མཆིས།ཡིན་ན་ཡང་དགེ་རྒན་ཆེན་མོ་ཞིག་ཏུ་འགྱུར་དགོས་ན།སློབ་ཁྲིད་ཙམ་ཁོ་ན་ལ་མཁས་པས་མི་ཆོག་ལ།ད་རུང་རིག་གཞུང་ཞིབ་འཇུག་གི་ནུས་པ་ཡོད་དགོས་པའི་ངེས་ཤེས་ཀྱང་ཁོང་ལ་སྐྱེས། ༡༩༩༠ལོར་གོང་རིམ་གྱིས་ཁོང་མཚོ་སྔོན་སློབ་གསོ་སློབ་གླིང་ད་ལྟའི་མཚོ་སྔོན་དགེ་འོས་སློབ་གྲྭ་ཆེན་མོའི་ཕྱི་གླིང་སྐད་ཡིག་ཚན་ཁག་དུ་དབྱིན་ཡིག་སྦྱོང་སར་ལོ༣མངགས་ནས་དབྱིན་ཡིག་ཅུང་མཁས་པར་གྱུར།

      ༡༩༩༤ལོར་ལྷོ་ནུབ་མི་རིགས་སློབ་གྲྭ་ཆེན་མོའི་བོད་རིག་པའི་སློབ་གླིང་རྒྱུགས་འཕྲོད་དེ་ལོ༢ལ་སློབ་གཉེར་བྱས་པས་དངོས་གཞིའི་མཐར་ཕྱིན་ལག་ཁྱེར་ལོན་པ་དང་སེམས་ཁམས་རིག་པ་དང་སློབ་གསོ་རིག་པ་སོགས་དེང་རབས་ཀྱི་རིག་ཚན་མང་པོ་ཞིག་དཔྱིས་ཕྱིན་པར་བསླབས།༢༠༠༣ལོར་དར་མདོ་མི་རིགས་དགེ་འོས་སློབ་གྲྭ་དང་དར་མདོ་མི་རིགས་མཐོ་རིམ་དགེ་འོས་ཆེད་སྦྱོང་སློབ་གྲྭ་གཉིས་སློབ་གྲྭ་གཅིག་ཏུ་བསྒྱུར་པས་ཁོང་ནི་ཡང་སློབ་གྲྭ་དེའི་དགེ་རྒན་དུ་ གྱུར། རིག་འཛིན་བསྟན་སྲུང་དགེ་རྒན་གྱི་ལས་ཀའི་ནང་དུ་ཞུགས་པའི་ཉིན་དེ་ནས་བཟུང་།སློབ་ཁྲིད་བྱེད་ཞོར་དུ་རིག་གཞུང་དང་ཚན་རིག་ཞིབ་འཇུག་གི་ལྡིངས་ཀར་མི་འཇིགས་པའི་ནུས་སྟོབས་ངོམས་པ་རེད།  རིག་འཛིན་བསྟན་སྲུང་གིས་རྒྱུན་པར་ངའི་ནུས་སྟོབས་ཀྱིས་མི་རིགས་རིག་གནས་ལ་འོད་སྣང་སྲིན་འབུའི་མེ་ཙམ་སྦྱིན་ཐུབ་ན།རང་གི་ལུས་ཕུང་ནི་སྣུམ་མར་དུ་འགྱུར་ཀྱང་བློ་ཕངས་མེད་ཅེས་སྨྲས།ལོ༢༠ལྷག་ཙམ་གྱི་ནང་དུ།ཁོང་གིས་རིག་གནས་དང་སློབ་གསོའི་ཕྱོགས་སུ་སྟོབས་ཤུགས་ཆེན་པོ་ཕུལ།ཁོང་གིས་བསྐྱངས་པའི་སློབ་མ་ནི་མདོ་དབུས་ཁམས་གསུམ་དུ་ཁྱབ་ཡོད།སློབ་ཁྲིད་ཀྱི་ཞོར་དུ་ཁོང་གིས་སྔོན་རྗེས་སུ་དཔེ་ཆ་དང་སློབ་དེབ༨བརྩམས་ནས་དཔར་སྐྲུན་བྱས་ཡོད་པ་དང་།མི་གཞན་དང་མཉམ་དུ་དཔེ་ཆ་དང་སློབ་དེབ༡༠ཙམ་བསྒྲིགས་ནས་དཔར་སྐྲུན་བྱས།རྩོམ་གཞུང་དེ་དག་ལས་ཁོང་ཉིད་ཀྱིས་ཉེ་ཆར་བརྩམས་པའི་༼ཡིག་གཟུགས་ཀྱི་གཞུང་ལུགས་དང་ལག་ལེན་གྱི་རྣམ་བཤད་དུང་གི་ཟླ་བ༽དང༼གངས་ལྗོངས་དམ་ཆོས་རིན་ཆེན་གཏེར་བུམ༽ ༼མངོན་བརྗོད་ལ་འཇུག་པའི་སྒོ༽ ༼ས་པཎ་དག་འགྲེལ་མུན་སེལ་སྒྲོན་མེ༽སོགས་ལ་ཆེད་རམས་པ་རྣམས་ཀྱིས་གདེང་འཇོག་ཡག་པོ་གནང་བ་དང་ཀློག་པ་པོ་རྣམས་ཀྱིས་དགའ་བསུ་ཆེན་པོར་བྱས་ཡོད་པ་རེད།ཁྱད་པར་དུ༼བྲིས་ཀྱི་གཞུང་ལུགས་ཀྱི་རྣམ་བཤད་དུང་གི་ཟླ་བ༽དཔར་སྐྲུན་བྱས་ཟིན་རྗེས།ལྷོ་ནུབ་མི་རིགས་སློབ་གྲྭ་ཆེན་མོའི་སློབ་དཔོན་ཆེན་མོ་ཐོགས་མེད་ལགས་ཀྱིས་གསུང་པར་ལྟར།ཞིབ་འཇུག་ལས་གཞི་འདིས་ད་སྔོན་བོད་གངས་ཅན་ལྗོངས་ལ་བོད་ཡིག་བྲིས་གཟུགས་ཀྱི་རིག་གཞུང་དང་ལག་ལེན་ཟུང་འབྲེལ་བྱེད་པའི་གཞུང་མེད་པའི་སྟོང་ཆ་ཁ་བསྐངས་ཡོད་པ་རེད་ཅེས་གསུངས།ལོ༢༠ལྷག་གི་ནང་ཁོང་གིས་ད་རུང༼བོད་ལྗོངས་ཞིབ་འཇུག༽དང༼མི་རིགས༽༼དར་མདོ་མི་རིགས་མཐོ་རིམ་དགེ་འོས་ཆེད་སྦྱོང་སློབ་གྲྭའི་རིག་གཞུང་དུས་དེབ༽སོགས་རྒྱལ་ཁབ་དང་ཞིང་ཆེན་རིམ་པའི་རིག་གཞུང་དུས་དེབ་ཐོག་དཔྱད་རྩོམ༢༠ལྷག་ཙམ་སྤེལ་ཡོད་ཅིང་།ལྷག་པར་དུ་༡༩༩༥ལོར་ཀྲུང་གོ་བོད་རིག་པའི་ཞིབ་འཇུག་ལྟེ་གནས་དང་ཀྲུང་གོ་བོད་བརྒྱུད་ནང་བསྟན་སློབ་གླིང་གིས་རྩ་འཛུགས་བྱས་པའི༼ཀྲུང་གོའི་བོད་བརྒྱུད་ནང་བསྟན་གྱི་དགོན་པའི་ལོ་རྒྱུས༽རྩོམ་སྒྲིག་ཚོ་ཆུང་དུ་ཞུགས་ནས་དར་མདོ་རྫོང་དང་ཉག་ཆུ་རྫོང་གཉིས་ཀྱི་དགོན་སྡེ་ཁག་གི་ལོ་རྒྱུས་བྲིས་པ་རེད།དེ་མིན་ཁོང་ནི་ཡིག་གཟུགས་འགྲན་བསྡུར་ནང་བཞུགས་ཏེ་ཞིང་ཆེན་རིམ་པའི་བྱ་དགས་ཨང་དང་པོ་༢དང་ཁུལ་རིམ་བྱ་དགའ༥ཐོབ་མྱོང་པ་དང་།ད་ལྟ་ཁོང་ནི་དཀར་མཛེས་ཁུལ་གྱི་སློབ་གྲྭ་ཆུང་འབྲིང་དགེ་རྒན་གྱི་གཞི་རྩའི་ནུས་རྩལ་ཞིབ་དཔྱད་ཚད་ལེན་ལྟེ་གནས་ཀྱི་ཡིག་གཟུགས་ཞིབ་དཔྱད་པའི་འགན་བཞེས་བཞིན་ཡོད།  རིག་འཛིན་བསྟན་སྲུང་ནི་མི་རིགས་ལ་ཤ་ཚ་བ་དང་རྒྱལ་ཁབ་ལ་དགའ་ཞེན་ཆེ་བའི་གུས་སུ་འོས་པའི་ཕུལ་བྱུང་དགེ་རྒན་དང་རིག་གནས་པ་གྲགས་ཅན་ཞིག་རེད།མི་ལོ༢༠ལྷག་གི་རིང་དུ།གཞན་པས་བག་ཡངས་ཀྱིས་ཇ་ཆང་ལ་རོལ་ནས་བསམ་པ་རྒྱ་ཡུན་དུ་གཏོང་བའི་དུས་སུ།ཁོང་ནི་ཁང་མིག་གྲུ་བཞི་ཞིག་གི་ཟུར་ཁུག་ཏུ་བསམ་པ་རྩེ་གཅིག་ཏུ་བསྒྲིམས་ནས་སུག་བྲིས་སུ་བགྱིས་པའི་སྒང་ཡིན།གཞན་པ་ནི་གུང་གསེང་གི་དུས་སུ་མལ་ཆས་འཇམ་པོའི་ནང་དུ་རྨི་ལམ་སྐྱིད་པོར་རོལ་བའི་སྐབས་སུ།ཁོང་ནི་རྒྱལ་ཁམས་འགྲིམས་ནས་རྒྱུ་ཆ་འཚོལ་སྡུད་ཀྱི་དཀའ་སྡུག་མྱོང་བའི་དུས་ཡིན་ཞིང་།སྤྱིར་བཏང་གི་འཁོར་བའི་མི་ཞིག་ལ་མཚོན་ནས་བཤད་ན་དེ་ནི་ཧ་ཅང་བཟོད་དཀའ་བ་རེད།ཁྱད་པར་དུ་བགྲང་བྱ་ཉི་ཤུ་ལྷག་ཙམ་དུ་རྒྱུན་འཁྱོངས་བྱེད་ཐུབ་པ་ནི་དེ་བས་ཀྱང་དཀའ་ཁག་ལྡན་པ་ཞིག་རེད་མོད།ཡིན་ན་ཡང་།ཁོང་གིས་དེ་དག་ཚང་མ་བསྒྲུབས་ཐུབ་སོང་བས།ཁོ་ལ་གཞན་གྱིས་འགྲན་དུ་མེད་པའི་འབྲས་བུ་སྨིན་པ་ནི་ལུགས་དང་མཐུན་ཞིང་འོས་པ་ཞིག་མ་རེད་དམ།




རྩོམ་ཡིག་སྔོན་མ།
རྩོམ་ཡིག་རྗེས་མ།
༄༅།།དྲང་སྲོང་རྣམ་རྒྱལ།

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1