ཁྲོ་ཆུ་རྫོང་བྷ་དབོ་ཡུལ་ཚོའི་རྒྱལ་དབོ་སྡེ་བའི་ཐུན་མོང་དཔལ་འབྱོར་ཏེ་བོད་ཕག་གསོ་སྤེལ་ཁང་གི་མཐོང་ཐོས།  

      བོད་ཕག་ནི་ཁྲོ་ཆུ་རྫོང་གི་སྐྱེ་ཁམས་ཞིང་ཕྱུགས་ཐོན་རྫས་གྲགས་ཆེན་ཞིག་ཏུ་གྱུར་ཡོད་ལ། བྷ་དབོ་ཡུལ་ཚོའི་རྒྱལ་དབོ་སྡེ་བའི་བོད་ཕག་ནི་ལྷག་པར་སྐད་གྲགས་ཆོད་ཡོད། རྒྱལ་དབོ་སྡེ་བའི་བོད་ཕག་གསོ་སྤེལ་ནི་རྫོང་གི་ཐུན་མོང་དཔལ་འབྱོར་གྱིས་ཞིང་བའི་ཡོང་སྒོ་འཕར་བར་རམ་འདེགས་བྱས་པའི་མིག་དཔེ་གསོན་པོ་ཞིག་ཡིན།
       ཟླ3པའི་ཚེས9ཉིན་གསར་འགོད་པས་རྒྱལ་དབོ་སྡེ་བའི་ཐུན་མོང་དཔལ་འབྱོར་བོད་ཕག་གསོ་སྤེལ་རྟེན་གཞི་ནས་མཐོང་བར། རྟེན་གཞིའི་རྨང་གཞིའི་སྒྲིག་ཆས་འཐུས་ཚང་བ་དང་གསོ་ར་ལེགས་པར་གྲུབ་ཡོད་ལ། བོད་ཕག་རྣམས་ལ་ཤ་ཤེད་རྒྱས་འདུག གསོ་མཁན་མཁའ་འགྲོས་གང་ཉུལ་བའི་ཕག་རྣམས་ཕྱོགས་གཅིག་ཏུ་བསྡུས་ནས་མ་རྨོས་ལོ་ཏོག་སྟེར་གྱི་འདུག
      གསར་འགོད་པས་མཐོང་ཚེ་མཁའ་འགྲོས་ལས་ཀ་བསྐྱུར་ཏེ་དུག་སེལ་སྒམ་ཆུང་རྒྱབ་ཏུ་ཁུར་ནས་ང་ཚོའི་མདུན་ཕྱོགས་སུ་དུག་སེལ་ཆུ་བཏབ་བྱུང་། དུག་སེལ་ཡམས་འགོག་ནི་གསོ་སྤེལ་ཁང་གོང་དུ་སྤེལ་བའི་ཐོག་མའི་ཆ་རྐྱེན་ཡིན།
      མཁའ་འགྲོ་ནི་རྒྱལ་དབོ་སྡེ་བའི་ཐུན་མོང་དཔལ་འབྱོར་བོད་ཕག་གསོ་སྤེལ་རྟེན་གཞིའི་འགན་བླངས་ཁྱིམ་ཚང་ཡིན་ལ། 2016ལོར་རྒྱལ་དབོ་སྡེ་བའི་དབུལ་སྐྱོར་སྲིད་ཇུས་སྣ་ཚོགས་དང་རོགས་དངུལ་གྱི་རྒྱབ་སྐྱོར་ཀྱིས་བོད་ཕག་གསོ་སྤེལ་རྟེན་གཞི་བཙུགས་ཏེ་ཐུན་མོང་དཔལ་འབྱོར་གོང་དུ་སྤེལ་བ་རེད། ཕག་ཕྲུག337དང་ཕག་མ40། ཕག་གསེབ8བཅས་ཉོས་ཏེ་རང་ཡུལ་གྱི་ལས་གཏོད་པ་མཁའ་འགྲོར་འགན་བཞེས་སུ་བཅུག མོས་ལོ་རེར་སྡེ་བའི་ཐུན་མོང་དཔལ་འབྱོར་དུ་སྒོར་ཁྲི6སྤྲོད་དགོས་པ་རེད།
      2016ལོར་གསར་དུ་མགོ་རྩོམ་སྐབས་གྲུབ་འབྲས་དེ་འདྲ་མངོན་གསལ་མིན་ཡང་། ན་ནིང་བོད་ཕག600ལྷག་བཙོང་བ་དང་སྒོར་ཁྲི20ལྷག་ལོན་ཞེས་མཁའ་འགྲོས་གསར་འགོད་པར་བཤད། ད་ལྟའི་གོང་འཕེལ་གྱི་གནས་ཚུལ་ལ་གཞིགས་ན་གསོ་སྤེལ་རྟེན་གཞིས་ལོ་རེར་བོད་ཕག600འཚོང་ཐུབ་པར་དཀའ་ཁག་མི་འདུག་ཟེར།
      གསོ་སྤེལ་ལས་རིགས་གོང་དུ་འཕེལ་ཚེ་བོད་ཕག་གི་འཚོང་ལམ་ཇི་ལྟར་ཁག་ཐེག་བྱ་ཞེ་ན། རྒྱལ་དབོ་སྡེ་བའི་བོད་ཕག་ནི་ལྗང་མདོག་སྐྱེ་ཁམས་གསོ་སྤེལ་ལས་ཐོན་པས་རྒྱུ་སྤུས་བཟང་བས། འཚོང་ལམ་ལ་དཀའ་ཐག་ཁྱོན་ནས་མེད་ཅེས་རྒྱལ་དབོ་སྡེ་བའི་ཧྲུའུ་ཅི་དང་པོ་ཝང་ཧྲའོ་ཡིས་བཤད།
       མཁའ་འགྲོས་མཚམས་སྦྱོར་བྱས་པ་ལྟར་ན། གསོ་སྤེལ་རྟེན་གཞིའི་བོད་ཕག་གི་གཟན་ཆས་ནི་ས་གནས་རང་གི་མ་རྨོས་ལོ་ཏོག་ཡིན་ལ། བཏུང་ཆུ་ནི་རྫ་ཆུ་དྭངས་མོ་ཡིན། བོད་ཕག་གི་འཚར་ལོངས་ནི་ལོ་གཅིག་ཡས་མས་ཡིན་པས་ཕག་ཤ་བཟང་བ་དང་། འཚོ་བཅུད་འཛོམས་པས་ཀུན་གྱིས་དགའ་བསུ་ཐོབ་ཀྱི་ཡོད།
      གསོས་སྤེལ་གྱི་མ་རྩ་ཇེ་ཆུང་དུ་གཏང་ཕྱིར་གསོ་སྤེལ་རྟེན་གཞིས་རང་དགར་བཞག་པའི་ས་རྒོད་དུ་མ་རྨོས་ལོ་ཏོག་བཏབ་ཏེ་རྟེན་གཞིའི་བོད་ཕག་གི་གཟན་ཆས་སུ་བཀོལ་བཞིན་ཡོད། ད་ལྟ་ནས་སློག་རྒྱག་བཞིན་ས་བོན་འདེབས་པར་གྲ་སྒྲིག་བྱེད་ཀྱིན་ཡོད། བོད་ཕག་གསོ་སྤེལ་རྟེན་གཞི་དང་མ་རྨོས་ལོ་ཏོག་བཏབ་པས་ས་གནས་མང་ཚོགས་ལ་ལས་ཞུགས་ཀྱི་གོ་སྐབས་སྤྲོད་ཐུབ་པར་གྱུར་བས། རང་གི་སྒོ་འགྲམ་ནས་ལས་ཀར་ཞུགས་ནས་ཡོང་སྒོ་འཚོལ་ཐུབ་པར་གྱུར་ཡོད། གསར་འགོད་པས་རྒྱུས་ལོན་པ་ལྟར་ན། 2015ལོར་རྒྱལ་དབོ་སྡེ་བར་ཡིག་ཚགས་བཀོད་ཅིང་བྱང་བུ་བཟོས་པའི་ཁྱིམ་ཚང28དང་མི101ཡོད་ལ། 2016ལོར་སྡེ་བ་འདི་ཞིང་ཆེན་གྱིས་གཏན་ལ་ཕབ་པའི་དབུལ་ཕོངས་སྡེ་བའི་ཞྭ་མོ་ཕུད་ཐུབ་པ་བྱུང་ཡོད། སྡེ་བའི་ཐུན་མོང་དཔལ་འབྱོར་གྱི་བོད་ཕག་གསོ་སྤེལ་ནི་དབུལ་སྒྲོལ་གྱི་གྲུབ་འབྲས་སྲ་བརྟན་དང་། མང་ཚོགས་ཀྱི་ཡོང་སྒོ་འཕར་བ་བྱས་ཏེ་རིམ་གྱིས་འབྱོར་འབྲིང་གི་ལམ་དུ་བསྐྱོད་པའི་ཐབས་ལམ་གལ་ཆེན་ཞིག་ཡིན་པས། སྡེ་བའི་མང་ཚོགས་ཀྱིས་རྒྱབ་སྐྱོར་བླ་མེད་ཐོབ་ཡོད།
      ན་ནིང་ཁྲོ་ཆུ་རྫོང་གི་ལུང་ཁོངས་དཔལ་འབྱོར་དང་ཐོན་ལས་ཆེན་པོ་དྲུག་བཅས་ཀྱི་ལས་ཀའི་རེ་འདུན་གཞིར་བཟུང་ཞིང་། ཡུལ་ཚོ་ཡོངས་ཀྱི་ཏང་འཛུགས་ནུས་པ་གཅིག་བསྒྲིལ་དང་། ཐོན་ལས་ཡོང་འཕར། ཁྲིམས་སྐྱོངས་བརྟན་བརླིང་། དབུལ་ཕོངས་ལས་བསྒྲལ་ཏེ་འབྱོར་འབྲིང་དུ་བསྐྱོད་པའི་ལས་ཀའི་བསམ་ཕྱོགས་གཞིར་བཟུང་སྟེ། བྷ་དབོ་ཡུལ་ཚོའི་རྒྱལ་དབོ་སྡེ་བ་རུ་ཡུལ་ཚོ་ཡོངས་ཀྱི་དབུལ་སྐྱོར་ཐོན་ལས་གསར་སྤེལ་གྱི་བཀོད་སྒྲིག་ལྟར། རི་མ་སྐེད་ཀྱི་ས་བབ་དང་ཉི་འོད་ཀྱི་མཐུན་རྐྱེན་གཞིར་བཟུང་སྟེ་བོད་ཕག་གསོ་སྤེལ་དང་། སྨན་རྩྭ་འདེབས་པ། ལི་སོབ་དམར་སྔོན་གྱི་ཐོན་ལས་གསར་དུ་སྤེལ་བ་དང་། མཉམ་ལས་ཁང་བཙུགས་པ་དང་ཏང་ཡོན་དཔེ་སྟོན་སོགས་ཀྱི་རྣམ་པས་དབུལ་ཕོངས་ཁྱིམ་ཚང་ཕྱུག་པོར་བསྒྱུར་བར་སྣེ་ཁྲིད་དེ་སྡེ་དམངས་རྣམས་ཀྱི་ཕྱུག་སྒྱུར་གྱི་སྤོབས་པ་ཆེས་ཆེར་བསླངས་ཡོད་དོ།།