དཔྱིད་དཔལ་གསར་བའི་འགྲོས་དང་བསྟུན་ཏེ་དཔྱིད་རྨོའི་ལས་ཀྱི་སྒོ་མོ་ཕྱེས་པ་རེད་ལ། ལོ་སར་འདས་མ་ཐག་མཛོད་དགེ་རྫོང་གདོང་སྣེ་ཡུལ་ཚོའི་སྡེ་དམངས་ཀྱིས་ཞིང་རྨོའི་དུས་བཟང་དམ་འཛིན་སྒོས་དཔྱིད་རྨོར་འབད་པའི་ལས་ལ་ཞུགས་པས་ཞིང་ཁར་ལས་བྲེལ་གྱི་ཡོ་ལང་ཤིན་ཏུ་རྒོད།
        མཛོད་དགེ་རྫོང་གདོང་སྣེ་ཡུལ་ཚོ་ནི་ཀན་ཁྲོན་འབྲེལ་མཚམས་སུ་ཡོད། ས་བབ་མཐོ་ཚད་ནི་སྨི་༢༤༦༠ཡིན་ལ། མཐོ་སྒང་གི་མཛེས་ལྗོངས་ཆུང་ཆུང་ཞེས་པའི་མཚན་སྙན་ལྡན། ལོ་རེའི་ཟླ༣པའི་ཟླ་དཀྱིལ་ནི་མཛོད་དགེའི་ཐེ་བོ་ས་ཁུལ་གྱི་དཔྱིད་རྨོའི་དུས་ཚིགས་ཡིན། དཔྱིད་རྨོའི་དུས་བཟང་དམ་འཛིན་བྱས་ཏེ་ལོ་འཁོར་གྱི་ཞིང་ལས་ལ་རྨང་གཞི་གང་ལེགས་འདིང་ཕྱིར། མཛོད་དགེ་རྫོང་གདོང་སྣེ་ཡུལ་ཚོའི་ཏང་ཨུ་དང་སྲིད་གཞུང་གིས་སྔོན་ཚུད་ནས་གྲོང་ཨུ་ཁང་སོ་སོ་དང་སྡེར་སྡོད་ཧྲུའུ་ཅི་དང་བོ་སོགས་དང་མཉམ་དུ།དཔྱིད་རྨོའི་སྟ་གོན་ལས་ཀར་བཀོད་སྒྲིག་སྒོས།སྡེ་དམངས་ཀྱི་དཔྱིད་རྨོར་མཛུབ་སྟོན་དང་དབུལ་ཕོངས་ཁྱིམ་དུད་ཀྱིས་ཐོན་སྐྱེད་འཕེལ་རྒྱས་གཏོང་བར་རོགས་རམ་བྱས་ཏེ། རེ་བས་ས་བོན་བཏབ་ནས་དབུལ་འབྲེལ་གནད་སྒྲོལ་ལས་ཀར་རམ་འདེགས་གནང་།

        དཔྱིད་ཤར་བ་དང་མཉམ་དུ་ལས་ལ་བྲེལ་བའི་རོང་འབྲོག་མང་ཚོགས་གཅིག་པུ་མ་ཡིན་པར། རྫོང་ཡོངས་ཀྱི་རིམ་པ་སོ་སོའི་ལས་བྱེད་པའང་དབུལ་བྲལ་གནད་སྒྲོལ་ལས་ཀར་ཡོངས་ཁྱབ་ནས་རྒྱལ་ཁ་ལེན་པར་བྲེལ་ཏེ།འབྲེལ་ཡོད་ལས་ཀའི་སྤྱི་ཁོག་འཐབ་ཇུས་ཀྱི་དམིགས་འབེན་མངོན་དུ་འགྱུར་བར་ཤིན་ཏུ་བྲེལ་ཡོད།གདོང་སྣེ་ཡུལ་ཚོ་ནི་རྫོང་ཡོངས་ཀྱི་དབུལ་སྐྱོར་གསར་སྤེལ་ལས་ཀའི་གཙོ་གནད་ཡུལ་ཚོའི་གྲས་ཀྱི་གཅིག་ཡིན་པས།སྔོན་ཆད་ནས་འཆར་འགོད་དང་བཀོད་སྒྲིག་སྒོས།རྣམ་གྲངས་འཛུགས་སྐྲུན་དང་ཐོན་ལས་འཕེལ་རྒྱས།སྡེ་བའི་ཐུན་མོང་གི་དཔལ་འབྱོར་ཇེ་སྟོབས་སུ་བསྒྱུར་བ་སོགས་ཀྱི་ཐད་ནས།མང་ཚོགས་ལ་ཕྱུག་འགྱུར་ལམ་བུ་འཚོལ་ཞིབ་གནང་།

        དཔྱིད་ཀ་དང་སྟོན་ཁ་ནི་ལོ་གཅིག་ལས་བྲེལ་འཚུབ་དང་རེ་བ་ཆེས་ཆེ་བའི་དུས་ཚིགས་ཡིན་པས།དཔྱིད་ཀར་ལོ་ཏོག་ལེགས་པར་བཏབ་ན། སྟོན་ཁར་གཡུར་ཟས་འབྲས་བུ་ལོན་ཏེ་དབུལ་འབྲལ་མངོན་དུ་འགྱུར་ཐུབ།བརྙན་ཤེལ་ལས་ཧུར་གྱིས་ཞུགས་བཞིན་པའི་མང་ཚོགས་དང་། ངར་ཤུགས་ཀྱིས་ཁེངས་པའི་དབུལ་སྐྱོར་ལས་བྱེད་པས། དཔྱིད་རྨོའི་ལས་བྲེལ་གྱི་ཚ་རླབས་ཀུན་ནས་བསླངས་པས།ཚང་མས་གདོང་ལ་དགའ་སྤྲོའི་འཛུམ་གྱིས་ཁེངས་པའི་རྣམ་པ་ཤིན་ཏུ་གསལ།།