སྤྱི་ཟླ3པའི་ཚེས28ཉིན་གྱི་སྔ་དྲོར། རྒྱལ་ཡོངས་དམངས་ཆེན་གྱི་འཐུས་མི། སི་ཁྲོན་ནང་བསྟན་སློབ་གླིང་གི་སློབ་གཙོ། དཀར་མཛེས་ཁུལ་ནང་བསྟན་མཐུན་ཚོགས་ཀྱི་ཚོགས་གཙོ་རྒྱལ་བསྟན་བློ་བཟང་བྱམས་པས་གཙོ་འགན་བཞེས་ནས་དཀར་མཛེས་ཁུལ་ནང་བསྟན་མཐུན་ཚོགས་སྐབས་བརྒྱད་པའི་ལས་འཛིན་ལྷན་ཚོགས་ཀྱི་རྒྱས་འཛོམས་གྲོས་ཚོགས་ཐེངས་གསུམ་པ་འཚོགས་ཏེ་རྒྱལ་ཡོངས་ཚོགས་ཆེན་གཉིས་ཀྱི་དགོངས་དོན་བརྒྱུད་བསྒྲགས་མཛད་པ་རེད།
          ཁུལ་སྲིད་གྲོས་ཀྱི་ཀྲུའུ་ཞི་གཞོན་པ། ཁུལ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་སྐུ་བཅར་ཡོན་ཏན་རྒྱ་མཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་སི་ཁྲོན་དུ་རྟོག་ཞིབ་ཕེབས་སྐབས་གནང་བའི་གལ་ཆེ་བའི་གསུང་བཤད་ཀྱི་དགོངས་དོན་བརྒྱུད་བསྒྲགས་མཛད་པ་རེད།
          རྒྱལ་ཡོངས་ཚོགས་ཆེན་གཉིས་ཀྱི་དགོངས་དོན་བརྒྱུད་བསྒྲགས་མཛད་སྐབས་རྒྱལ་བསྟན་བློ་བཟང་བྱམས་པས་གསུངས་དོན། སྐབས་བཅུ་གསུམ་པའི་རྒྱལ་ཡོངས་དམངས་ཆེན་གྱི་གྲོས་ཚོགས་ཐེངས་དང་པོ་ནི་རྒྱལ་ཡོངས་མི་རིགས་སོ་སོའི་མི་དམངས་ཚོས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་དོན་ལག་ལེན་བསྟར་བ་དང་། ཁྱོན་ཡོངས་ནས་ཏང་གི་ཚོགས་ཆེན་བཅུ་དགུ་པའི་ཚང་འཛོམས་གྲོས་ཚོགས་རབ་དང་རིམ་པའི་དགོངས་དོན་ལག་ལེན་བྱས་ཏེ་ཁྱོན་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པར་རྒྱལ་ཁ་ཕུ་ཐག་ཆོད་པ་དང་། ཁྱོན་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྱོང་བྱེད་པར་རྒྱང་སྐྱོད་གསར་པ་བྱེད་འགོ་འཛུགས་པའི་འགག་རྩའི་དུས་སུ་འཚོགས་པའི་ཚོགས་ཆེན་ཧ་ཅང་གལ་ཆེན་ཞིག་རེད།   ཐེངས་འདིའི་ཚོགས་ཆེན་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་འདེམས་ཤོག་ཆ་ཚང་བའི་ཐོག་ནས་རྒྱལ་ཁབ་ཀྲུའུ་ཞི་དང་། ཀྲུང་དབྱང་དམག་ཨུའི་ཀྲུའུ་ཞིར་བདམས་ཐོན་བྱུང་བ་ནི་ཏང་དང་མི་དམངས། རྒྱལ་ཁབ་ཀྱི་འདུན་པ་གཅིག་གྱུར་མཐོན་པོ་གང་ལེགས་མཚོན་ལ། ཏང་ཡོངས་དང་དམག་ཡོངས། རྒྱལ་ཡོངས་མི་རིགས་སོ་སོའི་ཐུན་མོང་གི་རེ་འདུན་དང་སྙིང་གཏམ་མཚོན་པ་ཞིག་ཀྱང་རེད། ཀྲུང་གོ་གུང་ཁྲན་ཏང་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ། ཀྲུང་གོ་མི་དམངས་བཅིངས་འགྲོལ་དམག་བཅས་ཀྱི་འགོ་ཁྲིད་གནས་གསུམ་གཞི་གཅིག་གི་འགོ་ཁྲིད་སྒྲིག་སྲོལ་གྱི་ལམ་ལུགས་མཚོན་པ་ཞིག་ཀྱང་རེད། ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་གཏོང་བར་སྲ་བརྟན་གྱི་ཆབ་སྲིད་ཁག་ཐེག་དང་རྩ་འཛུགས་ཁག་ཐེག  བསམ་བློའི་ཁག་ཐེག  ལམ་ལུགས་ཀྱི་ཁག་ཐེག་བཅས་ཡོད་པས་གལ་ཆེ་བའི་དངོས་ཡོད་དོན་སྙིང་དང་ཕུགས་དོན་ཟབ་མོའི་ལོ་རྒྱུས་ཀྱི་དོན་སྙིང་ལྡན་པ་རེད།
          རྒྱལ་བསྟན་བློ་བཟང་བྱམས་པས་གསུངས་དོན། ཐེངས་འདིའི་ཚོགས་ཆེན་ཐོག་གྲོས་ཞིབ་བྱས་ནས་གྲོས་འཆམས་བྱུང་བའི་རྩ་ཁྲིམས་དག་བཅོས་འཆར་ཟིན་ནི་ཏང་ཡོངས་དང་དམངས་ཡོངས། རྒྱལ་ཡོངས་མི་རིགས་སོ་སོའི་ཐུན་མོང་གི་འདུན་པ་མཚོན་ལ།ཏང་གི་འདོད་དགོངས་དང་མི་དམངས་ཀྱི་འདུན་པ་མཚོན་པས་རྒྱལ་ཁབ་ཀྱི་འགོ་ཁྲིད་སྒྲིག་སྲོལ་ལ་ཤུགས་སྣོན་དང་འཐུས་སྒོ་ཚང་དུ་བཏང་ཡོད་པ་རེད། དེར་བརྟེན། ཆོས་ལུགས་མི་སྣ་ཡིན་ནའང་འདྲ། མི་སྐྱ་ཕོ་མོ་ཡིན་ནའང་འདྲ། ཚང་མས་རྩ་ཁྲིམས་ལ་དགའ་ཞེན་ཡོད་པ་དང་། ཡིད་ཆེས་ཡོད་པ། བརྩི་བཀུར་ཡོད་པ། ལས་ཀ་ཅི་བསྒྲུབ་ན་འགོ་ཁྲིད་ཡོད་པ། རྩ་འཛུགས་ཡོད་པ། སྒྲིག་ལམ་ཡོད་པ་བྱ་དགོས། ངའི་རེ་བ་ནི་ཚོགས་གཙོ་སོ་སོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་རབ་དང་རིམ་པའི་དགོངས་དོན་དང་། ཚོགས་ཆེན་གཉིས་ཀྱི་དགོངས་དོན། རྒྱལ་ཁབ་ཀྱི་རྩ་ཁྲིམས་སློབ་སྦྱོང་ཡག་པོ་དང་དྲིལ་བསྒྲགས་ཡག་པོ། བེད་སྤྱོད་ཡག་པོ་བཅས་བྱས་ནས་ནང་བསྟན་ཆོས་ལུགས་ཀྱི་ཁྱབ་ཁོངས་ནང་དགོན་པ་ཚད་ལྡན་དང་གྲྭ་བཙུན་ཚད་ལྡན། ཆོས་ཉམས་ལེན་ཚད་ལྡན་ཡོང་བ་བྱ་དགོས།།