ཟླ་4བར། ནོར་འཛིན་བུ་མོས་ལྗང་མདོག་གོས་གསར་ལུས་ལ་བགོས་ཤིང་ཚེ་སྲོག་གསར་བའི་མྱུ་གུ་འབུས། སྐབས་འདི་ནི་མཐོ་སྒང་འཛམ་ཐང་རྫོང་གི་ཆེས་མཛེས་སྡུག་ལྡན་པའི་དུས་ཚིགས་ལ་དབུ་ཁྱུད་འབྲི་བའི་དུས་ཡིན་ལ། ཚེས་9ཉིན་གྱི་ཕྱི་དྲོར། དྲིན་གཟོ་དང་། དཔའ་མཛངས་རྟུལ་ཕོད་ཀྱིས་མདུན་དུ་སྐྱོད་པ། འཆམ་མཐུན། གོང་འཕེལ་བཅས་བརྗོད་བྱ་གཙོ་བོར་བྱས་པའི་ཛམ་བྷ་ལའི་སྐོར་བྲོ་འགྲན་ཚོགས་ཆེན་པོ་འཛམ་ཐང་རྫོང་གི་རིག་གནས་ཐང་ཆེན་དུ་འགྲན་མགོ་ཚུགས། 

        རྫོང་ཡོངས་ཀྱི་ཡུལ་ཚོ་དང་གྲོང་རྡལ་12ཀྱི་ཞིང་འབྲོག་མང་ཚོགས་མི་སྟོང་གཉིས་དང་དྲུག་བརྒྱ་ལྷག་འཁྲབ་སྟོན་ལ་ཞུགས་ཡོད། 

        འགྲན་ཞུགས་ཚོགས་པ་སོ་སོས་གྲལ་འགྲིག་པའི་རུ་དཔུང་བསྒྲིགས་ཤིང་གདོང་ལ་འཛུམ་མདངས་རྒྱས་ནས། ཚད་མེད་པའི་ཡིད་ཆེས་ཀྱིས་བརྟས་ཏེ་ཚོགས་ར་རུ་ཕེབས་བྱུང་། 

        འཁྲབ་ཚན25དང་འཁྲབ་ཡུན་ཆུ་ཚོད5ལྷག་གི་རིང་ལ། དགའ་སྐྱིད་ཀྱིས་བརྟས་པའི་ཛམ་བྷ་ལའི་རོལ་དབྱངས་དང་སྦྲགས་ཏེ། ཞིང་འབྲོག་དམངས་ཚོགས་ཀྱིས་ལག་རྡང་སྦྲེལ་ཏེ་དྭངས་གཙང་མཐོ་སྒང་གི་ཡུལ་ནས།བཀྲ་ཤིས་པའི་སྐོར་བྲོ་འཁྲབ་བྱུང་། འཛམ་ཐང་མི་དམངས་ཀྱིས་སྙན་པའི་དབྱངས་རྟ་དང་མཛེས་པའི་སྟངས་སྟབས་རེ་རེ་རྣ་བའི་བཅུད་དང་མིག་གི་དགའ་སྟོན་དུ་འདྲེན་པར་བྲེལ་བཞིན་གདའ། 

        འཁྲབ་སྟོན་པ་རྣམས་ཀྱིས་དབྱངས་རྟའི་འགྱུར་བག་དང་བསྟུན་ཏེ་ཡིད་དུ་འོང་པའི་གར་གྱི་གར་སྟབས་ལས་ཛམ་བྷ་ལའི་སྐོར་བྲོའི་ཐུན་མིན་ཁྱད་ཆོས་མངོན་པར་བྱས་ཤིང་། བདེ་ལྕག་འཁྱུག་པའི་གོམ་སྟབས་ལས་ཛམ་བྷ་ལའི་རིག་གནས་འཕེལ་རྒྱས་དང་རྒྱུན་འཛིན་གྱི་ཡིད་ཆེས་ཀྱང་བསྟན་བྱུང་། 

        འཛམ་ཐང་ནི་སྔར་བཞིན་གསོན་ཤུགས་རྒྱས་ཤིང་གཟི་དཔལ་འབར་བཞིན་ཡོད། འཛམ་ཐང་རྫོང་གིས་སྒྱུ་རྩལ་གྱི་ཕུགས་བསམ་དང་འཚོ་བ་གཉིས་གཞི་གཅིག་ཏུ་སྦྲེལ་ཞིང་། རིག་གནས་ཀྱི་སྟོབས་ཤུགས་ལ་བརྟེན་ནས་ཕྱོགས་བཞིའི་མགྲོན་པོའི་ཡིད་སེམས་བཀུག་དང་འགུག་བཞིན་མཆིས།