ཏང་དང་རྒྱལ་ཁབ་ཀྱི་སྒྲིག་གཞི་བཅོས་སྒྱུར་བྱ་རྒྱུའི་ཇུས་གཞི་ལྟར། དེ་སྔའི་རྒྱལ་ཁབ་ནགས་ལས་ཅུས་ཀྱི་ལས་འགན་དང་། དེ་སྔའི་ཞིང་ལས་པུའུ་ཡི་རྩྭ་ཐང་ལྟ་སྐུལ་དོ་དམ་གྱི་ལས་འགན། དེ་སྔའི་རྒྱལ་དབང་ས་ཞིང་ཐོན་ཁུངས་པུའུ་དང་། སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་པུའུ། ཆུ་བེད་པུའུ། དེ་སྔའི་ཞིང་ལས་པུའུ། དེ་སྔའི་རྒྱལ་ཁབ་ཀྱི་རྒྱ་མཚོ་ཅུས་བཅས་སྡེ་ཚན་གྱི་རང་བྱུང་སྲུང་སྐྱོང་ཁུལ་དང་། ལྗོངས་ཁུལ་གྲགས་ཅན། རང་བྱུང་ཤུལ་བཞག་རྒྱུ་ནོར། ས་གཤིས་སྤྱི་གླིང་ལ་སོགས་པའི་དོ་དམ་ལས་འགན་དག་སྡེབ་སྒྲིག་བྱས་ནས་རྒྱལ་ཁབ་ནགས་ལས་དང་རྩྭ་ཐང་ཅུས་སྒྲིག་འཛུགས་བྱས་ཤིང་། རྒྱལ་ཁབ་སྤྱི་གླིང་དོ་དམ་ཅུས་ཀྱི་སྒོ་བྱང་ཁ་སྣོན་བརྒྱབ་པ་དང་། རང་བྱུང་ཐོན་ཁུངས་པུའུ་ཡིས་དེ་དག་ལ་དོ་དམ་བྱེད་པ་ཡིན། གཙོ་བོ་ནགས་ཚལ་དང་། རྩྭ་ཐང་། འདམ་ར། ཐང་རྒོད། སྐམ་སའི་བདག་ཏུ་མ་བཟུང་བའི་སྲོག་ཆགས་དང་རྩི་ཤིང་གི་ཐོན་ཁུངས་གསར་སྤེལ་དང་བེད་སྤྱོད། སྲུང་སྐྱོང་བཅས་ཀྱི་སྐོར་ལ་ལྟ་སྐུལ་དོ་དམ་བྱེད་དགོས་པ་དང་། སྣོད་བཅུད་སྲུང་སྐྱོང་དང་སྣོད་བཅུད་ཉམས་གསོ་བྱ་བ་རྩ་འཛུགས་དང་། ནགས་འདེབས་སྔོ་བསྒྱུར་ལས་ཀ་གཉེར་སྐྱོང་། རྒྱལ་ཁབ་སྤྱི་གླིང་དོ་དམ་ལ་སོགས་པའི་རང་བྱུང་སྲུང་སྐྱོབ་བྱེད་ཡུལ་དག་ལ་དོ་དམ་བྱེད་དགོས་པ་ཡིན།   དེ་ལྟར་བྱ་བའི་དམིགས་ཡུལ་ནི་སྣོད་བཅུད་མ་ལག་སྲུང་སྐྱོང་ལ་ཤུགས་སྣོན་དང་། ནགས་ཚལ་དང་རྩྭ་ཐང་། འདམ་ར། ཐང་རྒོད་བཅས་ལ་གཅིག་གྱུར་ཐོག་ལྟ་སྐུལ་དོ་དམ་བྱ་ཆེད་དང་། རྒྱལ་ཁབ་སྤྱི་གླིང་གཙོ་བྱས་པའི་རང་བྱུང་སྲུང་སྐྱོང་བྱེད་གནས་ཀྱི་མ་ལག་མགྱོགས་པོར་བཙུགས་ནས་རྒྱལ་ཁབ་ཀྱི་སྣོད་བཅུད་བདེ་འཇགས་ལ་འགན་སྲུང་བྱ་ཆེད་རེད། 
          རྒྱལ་ཁབ་ནགས་ལས་དང་རྩྭ་ཐང་ཅུས་ཀྱི་འགན་འཁུར་བློ་མཐུན་གྱིས།  རྒྱལ་ཁབ་ནགས་ལས་དང་རྩྭ་ཐང་ཅུས་སྒྲིག་འཛུགས་བྱས་པ་ནི་བློ་མཐུན་ཞི་ཅིན་ཕིང་ལྟེ་བ་ཡིན་པའི་ཏང་ཀྲུང་དབྱང་གིས་ཏང་དང་རྒྱལ་ཁབ་ཀྱི་བྱ་གཞག་ཁྱོན་ཡོངས་ལ་དམིགས་ནས་བཏོན་པའི་ཐབས་ཇུས་གལ་ཆེན་ཞིག་ཡིན་ཞིང་།  ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ནགས་ལས་དང་རྩྭ་ཐང་གི་ལས་དོན་ལ་མཐོང་ཆེན་ཚད་མེད་དང་ཤུགས་སྣོན་ཆེན་པོ་རྒྱག་པའི་རྟགས་མཚན་རེད། ལྷག་པར་རྒྱལ་ཁབ་ཀྱི་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་པར་སྐུལ་འདེད་དང་། རང་བྱུང་སྣོད་བཅུད་མ་ལག་སྲུང་སྐྱོབ་དང་ཉམས་གསོ་ལ་ཤུགས་སྣོན།  རི་ཆུ་ནགས་ཞིང་མཚེའུ་རྩྭ་ཐང་བཅས་ལ་གཅིག་གྱུར་ཐོག་བཅོས་སྐྱོང་བྱེད་པར་དོན་སྙིང་གལ་ཆེན་ལྡན་པས་ཤུགས་རྐྱེན་གཏིང་ཟབ་མོ་ཞིག་ཐེབས་ངེས་ཡིན། རྒྱལ་ཁབ་ནགས་ལས་དང་རྩྭ་ཐང་ཅུས་ཀྱི་ངོས་ནས་དེ་ཉིད་འགོ་ཚུགས་ས་གསར་བ་ཞིག་ཏུ་བརྩིས་ཏེ། ཐོག་མའི་སེམས་འདུན་མ་བོར་ཞིང་འགན་འཁྲི་ཡིད་ལ་དམ་པོར་འཆང་ནས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་གིས་བསྩལ་བའི་འགན་འཁྲི་དང་འོས་འགན་འཁུར་དུ་འཁྱེར་ནས་རང་བྱུང་ཐོན་ཁུངས་པུའུ་ཡི་ཏང་རྩ་འཛུགས་ཀྱི་བཀོད་སྒྲིག་དང་བླང་བྱ་ལྟར།  ནགས་ཚལ་དང་རྩྭ་ཐང་། འདམ་ར། ཐང་རྒོད།   སྐམ་སའི་བདག་ཏུ་མ་བཟུང་བའི་སྲོག་ཆགས་དང་རྩི་ཤིང་གི་ཐོན་ཁུངས་གསར་སྤེལ་དང་བེད་སྤྱོད་བཅས་ལ་ཤུགས་སྣོན་དང་། སྣོད་བཅུད་སྲུང་སྐྱོང་དང་ཉམས་གསོ་བྱ་བ་ནན་བསྒྲུབ། ནགས་འདེབས་སྔོ་སྒྱུར་ལས་དོན་ཆེར་སྤེལ་བཅས་རྒྱལ་ཁབ་སྤྱི་གླིང་སོགས་རང་བྱུང་སྲུང་སྐྱོབ་བྱེད་གནས་དག་ལ་དོ་དམ་ནན་མོ་བྱས་ཁར། རང་བྱུང་སྣོད་བཅུད་མ་ལག་གི་བྱེད་ནུས་དང་སྤུས་ཚད་རྒྱུན་ཆད་མེད་པར་མཐོར་འདེགས་སུ་བཏང་སྟེ། མི་དམངས་མང་ཚོགས་ཀྱི་སྤུས་ལེགས་པའི་སྣོད་བཅུད་ཐོན་རྫས་ཀྱི་དགོས་མཁོ་བསྐང་ཕྱིར་དང་། འབྱོར་འབྲིང་སྤྱི་ཚོགས་ཕྱོགས་ཡོངས་ནས་བསྐྲུན་པར་རྒྱལ་ཁ་ཕུ་ཐག་ཆོད་པ་ཞིག་ལོན་ཕྱིར།  སྣོད་བཅུད་དཔལ་ཡོན་དང་མཛེས་སྡུག་ལྡན་པའི་ཀྲུང་གོ་འཛུགས་སྐྲུན་གྱི་ཕྱིར་དུ་ལེགས་སྐྱེས་གསར་པ་འཇོག་ངེས་རེད།