སློབ་རའི་རིག་གནས་འཚོ་བ་ཕུན་སུམ་ཇེ་ཚོགས་དང་། སློབ་མའི་བསླབ་ཕྱིའི་བྱ་འགུལ་སྣ་མང་ཅན་དུ་བསྒྱུར་བ། སློབ་མ་ཚོའི་ཡིག་གཟུགས་ལ་དགའ་བའི་བསམ་བློ་སྐྱེད་སྲིང་དང་བོད་ཀྱི་ཡིག་གཟུགས་ལ་སྤྲོ་བ་ཡོད་པའི་སློབ་བུ་དག་ལ་རང་རང་གི་འཇོན་ནུས་ངོམས་སའི་སྟེགས་བུ་ཞིག་བསྐྲུན་ཆེད་དང་ལྷག་པར་དུ་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྐབས་གཉིས་པའི་གོ་སྐབས་དང་བསྟུན་ནས། སྡེ་དགེ་རྫོང་སློབ་འབྲིང་གི་བོད་ཀྱི་ཡིག་གཟུགས་རྒྱུན་འཛིན་པ་དགེ་རྒན་བསོད་ནམས་བཀྲ་ཤིས་ཀྱི་ཡིག་གཟུགས་འཛིན་གྲྭ་དང་། སྡེ་དགེ་རྫོང་རྩོམ་རིག་མཐུན་ཚོགས་གཉིས་མཉམ་འབྲེལ་གྱིས་བོད་ཀྱི་ཡིག་གཟུགས་དུས་ཆེན་བསུས།
ཐེངས་འདིའི་བྱ་འགུལ་ལ་སློབ་གྲོགས་ལྔ་བཅུ་ལྷག་ཞུགས་ཤིང་། སློབ་གྲོགས་ཚོའི་སྨྱུག་རྩེ་ལས་འཁྲུངས་པའི་ཚུགས་རིང་དང་འབྲུ་ཚ་སོགས་ཀྱི་ཡིག་གཟུགས་བརྩམས་ཆོས་དག་སློབ་གྲྭར་འགྲེམ་སྟོན་བྱས་ཤིང་ཡིག་གཟུགས་དགེ་རྒན་གྱིས་དཔྱད་བརྗོད་དང་མཛུབ་སྟོན་མཛད།
གཞན་ཡང་རྫོང་སློབ་འབྲིང་གིས་བོད་ཡིག་ཡིག་གཟུགས་སྲུང་སྐྱོབ་དང་རྒྱུན་འཛིན་བྱེད་ཆེད། ལོ་མང་སྔོན་ནས་ཡིག་གཟུགས་འཛིན་གྲྭ་བཙུགས་པ་དང་། སྔ་རྗེས་སུ་ཡིག་གཟུགས་འགྲན་བསྡུར་དང་ཡིག་གཟུགས་འགྲེམ་སྟོན་གྱི་བྱ་འགུལ་གང་མང་སྤེལ་བ་མ་ཟད། སྤྱི་ཚོགས་དང་ལས་ཁུངས་ཁག་གིས་རྒྱབ་སྐྱོར་དང་དགའ་བསུ། གཟེངས་བསྟོད་སོགས་ཀྱིས་བསྔགས་བརྗོད་ཀྱི་མེ་ཏོག་གང་མང་ཐོབ།
རྗེས་སུ་ཡང་བོད་ཡིག་ཡིག་གཟུགས་ཀྱི་གོང་འཕེལ་ལ་ཞིབ་འཇུག་དང་གྲོས་མོལ། བོད་ཡིག་ཡིག་གཟུགས་ཀྱི་ཤེས་ལྡན་པ་སྔོག་འདོན། བོད་ཡིག་ཡིག་གཟུགས་ཀྱི་སྒྱུ་རྩལ་གཤོམ་སྟོན་བཅས་ཀྱི་དམིགས་ཡུལ་གཞིར་བཟུང་ནས། ལོ་རེར་བོད་ཡིག་ཡིག་གཟུགས་ཀྱི་ཞིབ་གྲོས་དང་བོད་ཡིག་ཡིག་གཟུགས་འགྲན་བསྡུར་སོགས་སྔར་ལས་ལྷག་པར་གོང་སྤེལ་གཏང་འཆར་འདུག
