ཉེ་ཆར། བྲག་འགོ་རྫོང་ཡར་སྡེ་ཤང་ལྕམ་བླ་གྲོང་སྡེའི་འདེབས་འཛུགས་བྱ་ཡུལ་གྱི་ཞིང་པའི་མཚན་མོའི་སློབ་གྲྭའི་ནང་གྲོང་མི་ཉི་མས་སེམས་འགུལ་ཐེབས་པའི་ངང་དགེ་རྒན་གྱིས་ཡུལ་དངོས་སུ་འགྲེལ་བཤད་དང་འཕེལ་རིམ་གསལ་སྟོན་བྱས་པར་བརྒྱུད། ང་ཚོས་ཏང་གི་དབུལ་སྐྱོར་སྲིད་ཇུས་དང་དབུལ་སྐྱོར་ལས་གཞི། དེ་མ་ཟད་ཐུན་མོང་དཔལ་འབྱོར་འཕེལ་རྒྱས་གཏང་རྒྱུའི་འབྲེལ་ཡོད་སྲིད་ཇུས་ལ་གོ་བ་དེ་བས་ཟབ་མོ་ལོན་ཡོད་པར་བརྟེན། དབུལ་ཕོངས་ལས་ཐར་ཏེ་འབབ་སྒོ་འཕར་སྣོན་གཏོང་བའི་ཡིད་ཆེས་ཇེ་དྲག་ཏུ་ཕྱིན་པ་རེད། དངོས་སུ་བཤད་ན་ཆེས་ཡོང་འབབ་ཡག་པོ་ནི་སློབ་ཁང་ནང་ལ་ཡོད་པ་ཤེས་སོང་ཞེས་བཤད་པ་རེད།
      ད་ལོ་ནས་བཟུང་བྲག་འགོ་རྫོང་གིས་སློབ་སྦྱོང་ཆེན་པོ་དང་། གྲོས་བསྡུར་ཆེན་པོ། བརྟག་ཞིབ་ཆེན་པོའི་བྱེད་སྒོ་སྤེལ་ནས་དབུལ་ཐར་འགག་སྒྲོལ་གྱི་ལས་ཀར་ཁྲིད་སྟོན་བྱས་ཤིང་། ཤང་དང་གྲོང་སྡེ་སོ་སོས་དོན་དངོས་དང་ཟུང་འབྲེལ་བྱས་ནས་ཡོངས་ཁྱབ་ཏུ་མི་སེར་གྱི་བསམ་འཆར་ལ་ཉན་འཇོག་བྱས་པ་དང་། དམིགས་བསལ་རང་བཞིན་གྱིས་ཞིང་ལས་ལག་རྩལ་གྱི་ཆེད་རམས་པ་དང་ཕྱུག་འབྲོག་གི་འཇོན་ནུས་མི་སྣ་གདན་འདྲེན་ཞུས་ནས།ཉིན་མོ་དང་མཚན་མོ། གཏན་འཇགས་དང་སྐོར་སྐྱོད།གཅིག་བསྡུས་དང་ཐར་ཐོར། དུས་ཚོད་ངེས་ཅན་དང་ངེས་མེད་སོགས་ཀྱི་སློབ་ཁྲིད་བྱེད་སྟངས་སྤྱད་ནས་གཅིག་བསྡུས་སློབ་ཁྲིད་དང་། སྐོར་སྐྱོད་སློབ་ཁྲིད། ཞིང་ཁར་སློབ་ཁྲིད། འབྲོག་སྡེར་སློབ་ཁྲིད་སོགས་བྱས་ནས་ཞིང་འབྲོག་མང་ཚོགས་ཚོས་གདེང་འཇོག་ཡག་པོ་བྱས་པ་རེད།།