སྤྱི་ཟླ་6པའི་ཚེས་12་ཉིན་གྱི་ཉིན་གུང་ཙམ་དུ།  དཀར་མཛེས་ཁུལ་ཉག་རོང་རྫོང་བརྡ་ཀུན་ཡུལ་ཚོའི་སྡེ་བ་ཞིག་གི་ཁྱིམ་ཚང་གི་ར་བའི་ནང་གཟིག་རྨས་མ་ཞིག་གློ་བུར་དུ་འཛུལ་ཡོང་བ་དང་།  གཏུམ་ཞིང་ཁྲོ་བའི་གཟིག་རྨས་མ་དེ་ར་བའི་གྱང་ངོས་དང་ཤིང་བརྩིགས་ཐོག་ཏུ་མཆོང་ནས་ངར་སྐད་བསྒྲགས་པས།  སྡེ་པའི་ཡུལ་མི་རྣམས་དངངས་སྐྲག་ཤིན་ཏུ་སྐྱེས་ཏེ་འབྲེལ་ཡོད་བདེ་སྲུང་རུ་ཁག་དང་རྫོང་འཁོར་སྲུང་ནགས་ལས་ཅུས་སོགས་ལ་འབྲེལ་བ་བྱས་ཕྲལ་ཡུལ་དངོས་སུ་སླེབས་པ་དང་།  ཡུལ་མི་རྣམས་དང་འབྲེལ་ཡོད་སྡེ་ཁག་གི་ལས་བྱེད་པས་ཐབས་བརྒྱ་ཇུས་སྟོང་གིས་གཟིག་རྨས་མ་དེ་འཛིན་བཟུང་བྱས་པ་རེད།
        གཟིག་ནི་རྒྱལ་ཁབ་ཀྱི་རིམ་པ་དང་པོའི་སྲུང་སྐྱོང་གཅན་གཟན་གྱི་རིགས་ཤིག་ཡིན་ལ། སྤུ་མདོག་སེར་སྐྱའམ་དམར་སེར་གྱི་སྟེང་དུ་ཐིག་ལེ་ཟླུམ་པོའམ་ཟུར་གསུམ་ནག་ཐིག་སོགས་ཀྱིས་ཁྱབ་པ་དང་། གཟན་དུ་ཤ་བ་དང་རི་བོང་སོགས་བཟའ་བའི་གཅན་གཟན་གཏུམ་པོ་ཞིག་ཡིན། སྐབས་འགར་བཀྲེས་ལྟོགས་བྱུང་དུས་གྲོང་སྡེ་ནང་ཡོང་ནས་སྒོ་ཕྱུགས་དང་ཁྱི་ཡང་ཟ་བ་རེད།
        སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྔོ་ལྗང་གི་རི་ཀླུང་ནི་གསེར་རི་དངུལ་རི་ཡིན་ཞེས་གསུངས་པ་དང་བསྟུན་ནས། ཉེ་བའི་ལོ་འགའི་ནང་དཀར་མཛེས་ཁུལ་གྱིས་ཁོར་ཡུག་སྲུང་སྐྱོང་ལ་མཐོང་ཆེན་ཚད་མེད་བྱས་མཐར། རང་ཁུལ་གྱི་ས་གནས་སོ་སོར་རྒྱལ་ཁབ་ཀྱི་སྲུང་སྐྱོང་རིམ་པ་དང་པོ་དང་རིམ་པ་གཉིས་པ། རིམ་པ་གསུམ་པ་ལ་སོགས་པའི་རྩ་ཆེན་གྱི་རི་སྐྱེས་སྲོག་ཆགས་དང་རི་དྭགས་མང་པོ་ཞིག་མཐོང་རྒྱུ་ཡོད་པ་རེད། རྒྱལ་ཁབ་རིམ་པའི་སྲུང་སྐྱོང་རིགས་ཀྱི་གཅན་གཟན་དང་རི་དྭགས་ལ་རྨས་སྐྱོན་གཏོང་མི་རུང་། དེ་འདྲ་ཡོད་པ་མཐོང་ན་དུས་ཐོག་ཏུ་ཡུལ་དེ་གའི་མི་སེར་ཚོས་ནགས་ལས་སྡེ་ཁག་ལ་གནས་ཚུལ་ཞུ་དགོས།།