ཉེ་ཆར། དཀར་མཛེས་རྫོང་གེ་སར་རིག་གནས་གནད་འཕིགས་དབུལ་སྐྱོར་གྲོང་བརྒྱ་ཐོན་ལས་རྟེན་གཞིའི་འཛུགས་སྐྲུན་རྣམ་གྲངས་ཀྱི་ཨར་ལས་ཚ་ཚ་འུར་འུར་ངང་སྤེལ་སྐྲུན་བཞིན་ཡོད་པ་དང་། འདི་ནི་མིག་སྔའི་བར་ས་གནས་དེ་གའི་མ་རྩ་འཇོག་མང་ཤོས་ཀྱི་འཛུགས་སྐྲུན་རྣམ་གྲངས་དེ་ཡིན་པ་རེད།

དཀར་མཛེས་རྫོང་གི་ཡུལ་ལྗོངས།

        དཀར་མཛེས་རྫོང་གི་གེ་སར་རིག་གནས་ཀྱི་མཁར་གྲོང་འཛུགས་སྐྲུན་བྱེད་ཡུལ་ནི་དཀར་མཛེས་རྫོང་གི་ཤར་ལྷོའི་རྒྱུད་ཀྱི་སྲིབ་ངོ་ཤང་དུ་ཡིན་ཞིང་། ལྷོ་ཉག་ཆུ་དང་འབྲེལ་ཞིང་བྱང་ལ་རྒྱལ་ལམ་༣༡༧དང་ཉེ་བ་དང་། རྒྱལ་ལམ་༣༡༧བརྒྱུད་ནས་སྤྱི་ལེ་༤༥བསྐྱོད་ན་བསྐྲུན་ཚར་གྲབས་ཡོད་པའི་གེ་སར་གནམ་ཐང་དུ་སླེབས་ཐུབ་པ་དང་། གང་དེ་མ་འོངས་པར་བོད་ཁུལ་ཙམ་མ་ཚད་རྒྱལ་ཁབ་ཕྱི་ནང་གི་ཡུལ་སྐོར་བའི་ཡིད་དབང་ཅིག་ཅར་དུ་འཕྲོག་ཐུབ་པའི་ཡུལ་སྐོར་གྱི་གནས་མཆོག་ཅིག་ཏུ་འགྱུར་བའི་རེ་བ་ཡོད་པ་རེད།

འཛུགས་སྐྲུན་རྣམ་གྲངས་ལས་འགོ་འཛུགས་པའི་མཛད་སྒོ།

ཨར་ལས་བྱེད་བཞིན་པའི་རྣམ་པ།

        དཀར་མཛེས་རྫོང་གི་གེ་སར་རིག་གནས་མཁར་གྲོང་འཛུགས་སྐྲུན་གྱི་རྣམ་གྲངས་འདིའི་འཆར་འགོད་རྒྱ་ཁྱོན་སྤྱི་ཆིང་༩༧ཡིན་ཞིང་། སྔོན་དཔག་བྱས་ན་མ་རྩ་འཇོག་ཚད་སྒོར་དུང་ཕྱུར་༥ཟིན་རྒྱུ་དང་། སྤྱི་ལོ་༢༠༡༨ལོར་ཁྱོན་ཡོངས་ནས་འཆར་གཞི་ལྟར་ཡོངས་སུ་བསྐྲུན་ཚར་བ་བྱ་རྒྱུ་རེད། རྒྱུས་ལོན་བྱུང་བར་ལྟར་ན། གེ་སར་རིག་གནས་ཀྱི་མཁར་གྲོང་དུ་ཕོ་བྲང་རིག་གནས་ཁུལ་དང་། བརླན་སའི་ངལ་གསོ་ཁུལ། རྩྭ་ཐང་ཉམས་ཞིབ་ཁུལ་སོགས་ཁག་དུ་མར་བགོས་ཡོད་པ་དང་། དེའི་ནང་གེ་སར་རིག་གནས་ཀྱི་མཁར་གྲོང་གི་དཔེ་མཚོན་ཅན་གྱི་འཛུགས་སྐྲུན་ཏེ་སེང་འབྲུག་སྟག་རྩེ་ཕོ་བྲང་དང་། གྲོང་ཁྱེར་གྱི་རྨང་གཞིའི་སྒྲིག་བཀོད། རིག་གནས་མཁར་གྲོང་ནང་ཁུལ་གྱི་ཆུ་རྒྱུད་བཟོ་བཀོད། ཡུལ་ཁོངས་ལྗང་འགྱུར་བཟོ་བཀོད། གླིང་གི་དཔའ་རྟུལ་སུམ་ཅུའི་གྲོང་སྡེ། ཆུ་ཚན་གསར་འབྱེད་ཀྱི་རྣམ་གྲངས། འབྲོག་པའི་རིག་གནས་ཉམས་ཞིབ་ཁུལ་གྱི་རྣམ་གྲངས། གེ་སར་རིག་གནས་ཉམས་ཞིབ་ཁུལ་དང་དེ་བཞིན་འཁྲབ་སྟོན་ཁང་དང་ཆུ་ཐོག་ལུས་རྩལ་སོགས་རྣམ་གྲངས་ཁག་མང་པོ་ཡོད་པ་རེད། གཞན་ཡང་། འཛུགས་བསྐྲུན་ས་ཆའི་བདག་དབང་གཅིག་གྱུར་ཐོག་རྫོང་གཞུང་ཁོངས་རྒྱུ་ནོར་ཀུང་སིའི་མིང་འོག་ཏུ་ཐོ་འགོད་བྱ་རྒྱུ་དང་། ས་ཐོག་འཛུགས་སྐྲུན་དངོས་པོའི་བདག་དབང་དབུལ་ཕོངས་གྲོང་ཚོ་ཁག་གི་མིང་འོག་ཏུ་ཐོ་འགོད་བྱ་རྒྱུ་རེད། དེར་ཟས་རིགས་དང་། སྡོད་ཁང་། ཡུལ་སྐོར། ཉོ་ཚོང་། རོལ་རྩེད་བཅས་ལྷན་གཅིག་ཏུ་འདུས་པའི་བོད་ཀྱི་རིག་གནས་ཉམས་ཞིབ་ཁུལ་ཞིག་བསྐྲུན་རྒྱུ་ཡིན་པས། དབུལ་ཕོངས་གྲོང་ཚོའི་མི་སྣའི་ལས་ཞུགས་གནད་དོན་ཐག་གཅོད་ཐུབ་རྒྱུ་མ་ཟད། ད་དུང་རྩ་བའི་ཆ་ནས་དབུལ་ཕོངས་གྲོང་ཚོའི་གོང་འཕེལ་གྱི་དཀའ་གནད་སེལ་ཐུབ་རྒྱུ་ཡིན་ཞིང་། དེས་དབུལ་སྒྲོལ་འགག་གཏོར་ལ་སྐུལ་འདེད་བཏང་ནས་ཁྱོན་ཡོངས་ནས་འབྱོར་འབྲིང་སྤྱི་ཚོགས་ལ་མཉམ་དུ་སྐྱོད་ཐུབ་རྒྱུར་འགན་ལེན་ཏན་ཏིག་བྱས་ཡོད་པ་རེད། འཆར་འགོད་ལ་གཞིགས་ན། མཁར་གྲོང་འདི་གླིང་སེང་འབྲུག་སྟག་རྩེ་ཕོ་བྲང་གིས་ལྟེ་བ་བྱས་ཤིང་། གླིང་དཔའ་རྟུལ་སུམ་ཅུའི་གྲོང་སྡེ་གོ་རིམ་ལྡན་པའི་ངང་མཐའ་ནས་བསྐོར། གྲོང་སྡེ་ཁག་བར་ཆུ་ཡིས་བཅད་ལ་ལམ་གྱིས་སྦྲེལ་བའི་རྣམ་པ་མངོན་རྒྱུ་ཡིན་པ་རེད།

འཛུགས་སྐྲུན་རྣམ་གྲངས་ཀྱི་གྲུབ་རིས།

        གླིང་གེ་སར་རྒྱལ་པོ་ནི་བོད་མི་རིགས་ཀྱི་གཟི་བརྗིད་དུ་བརྩི་བའི་གཏམ་རྒྱུད་ནང་གི་དཔའ་བོ་ཞིག་ཡིན་ཞིང་། ཁོང་གིས་དགྲ་འདུལ་གཉེན་སྐྱོང་དང་ནག་ཕྱོགས་བདུད་ཚོགས་དམ་ལ་བཏགས་ཤིང་དཀར་ཕྱོགས་དགེ་བ་ཕྱོགས་བཞི་མཚམས་བརྒྱད་དུ་སྤེལ་བའི་བྱ་གཞག་དེར་བོད་རིགས་མི་དམངས་ཀུན་གྱིས་མོས་གུས་བྱས་ནས་ལོ་རྒྱུས་ཀྱི་སྙན་ངག་རིང་མོ་གླིང་སྒྲུང་ཞེས་པར་ཕབ་སྟེ་སྙན་གྲགས་ཀྱི་བ་དན་རྒྱལ་ཁབ་ཕྱི་ནང་ཀུན་ལ་གཡོ་བཞིན་ཡོད་དེ། དེ་བས་གེ་སར་རིག་གནས་དེ་བརྗོད་གཞིར་བྱས་ནས་མཁར་གྲོང་བསྐྲུན་པ་དེས་ང་ཚོར་གླིང་གི་དཔའ་བོའི་རྟོགས་པ་བརྗོད་པའི་ལོ་རྒྱུས་ཀྱི་སྙན་རྩོམ་རིང་མོ་ཞིག་གི་བྱུང་བ་ལ་རྒྱུས་ལོན་བྱེད་པའི་འདུན་པ་ཀུན་ནས་སློང་ཐུབ་པ་དང་། དེ་བས་ཀྱང་གནས་དེ་ནས་གླིང་སེང་འབྲུག་སྟག་རྩེ་ཕོ་བྲང་གི་གཟི་བརྗིད་དང་། གླིང་སེང་ལྕམ་འབྲུག་མོའི་མཛེས་སྡུག་མཐོང་ཐུབ་ལ། དཔའ་མཛངས་གཉིས་ལྡན་གྱི་དཔའ་རྟུལ་རེ་རེའི་རྔམ་བརྗིད་གཟུགས་བརྙན་མཐོང་ཐུབ་པས་རེ་སྒུག་ཆེན་པོ་བྱེད་བཞིན་ཡོད་ཅེས་ས་གནས་དེ་གའི་མང་ཡུལ་མིས་གསར་འགོད་པར་གསུངས་བྱུང་།

འཛུགས་སྐྲུན་རྣམ་གྲངས་ཀྱི་གྲུབ་རིས།

        ངོ་སྤྲོད་བྱས་པར་གཞིགས་ན། དཀར་མཛེས་རྫོང་གེ་སར་རིག་གནས་གནད་འཕིགས་དབུལ་སྐྱོར་གྲོང་བརྒྱ་ཐོན་ལས་རྟེན་གཞིའི་འཛུགས་སྐྲུན་རྣམ་གྲངས་ཀྱིས་ས་ཁུལ་གྱི་ལེགས་ཆ་འདོན་སྤེལ་གང་ལེགས་བྱས་ཐོག མི་རིགས་ཀྱི་སྲོལ་རྒྱུན་རིག་གནས་དང་དེང་རབས་སྤྱི་ཚོགས་དཔལ་འབྱོར་གོང་འཕེལ་གཉིས་ཕན་ཚུན་མཐུན་སྦྱོར་བྱས་པ་དེ་ནི་གྲོང་ཁྱེར་འཛུགས་སྐྲུན་དང་འབྱུང་ཁམས་དཔལ་ཡོན་འཛུགས་བསྐྲུན་རྒྱ་ཆེ་རུ་དང་གཏིང་ཟབ་ཏུ་བཏང་བ་ཞིག་ཡིན་ཞིང་། དབུལ་སྒྲོལ་འགག་གཏོར་གྱི་རྣམ་པའི་ཐད་ལ་འཚོལ་ཞིབ་དང་གསར་གཏོད་ཅིག་ཀྱང་ཡིན་ཏེ། ལེགས་གྲུབ་བྱུང་རྗེས་དེས་རྫོང་ཁོངས་རིག་གནས་ཡུལ་སྐོར་མཆོངས་བརྒལ་རང་བཞིན་གྱི་གོང་འཕེལ་ཡོང་བར་སྐུལ་འདེད་ཤུགས་ཆེན་ཐེབས་རྒྱུ་རེད།

འཛུགས་སྐྲུན་རྣམ་གྲངས་ཀྱི་གྲུབ་རིས།