རྒྱུས་ལོན་བྱུང་བ་ལྟར་ན། ད་ལོ་ནས་བཟུང་། དཀར་མཛེས་ཁུལ་གྱིས་ཤུགས་ཆེན་པོས་“ལས་གྲྭ་ཆེན་པོ་གསུམ”དོན་འཁྱོལ་བྱས་ནས་བོད་སྨན་སྡེབ་སྦྱོར་གྱི་རྒྱུ་སྤུས་བདེ་འཇགས་ལ་འགན་སྲུང་བྱས། དཀར་མཛེས་ཁུལ་གྱི་ཁུལ་བོད་སྨན་ཁང་དང་སྡེ་དགེ། དཔལ་ཡུལ་སོགས་གཞུང་བཙུགས་བོད་སྨན་ཁང་བཅུ་སོགས་ཀྱི་ཚད་ལྡན་ཅན་གྱི་སྨན་རྫས་སྡེབ་སྦྱོར་ཁང་འཛུགས་སྐྲུན་བྱས་ཤིང་། དེའི་ཁྲོད་ཀྱི་བོད་སྨན་ཁང་དགུ་ཡིས་《སྡེབ་སྦྱོར་ཐོན་སྐྱེད་ཀྱི་ཆོག་མཆན་དཔང་ཡིག》བླངས་ཤིང་། སྡེབ་སྦྱོར་ཆོག་མཆན་གྱི་ཨང་རྟགས་892བླངས་ནས་བོད་སྨན་སྡེབ་སྦྱོར་ཐོན་སྐྱེད་ཀྱི་ཆ་རྐྱེན་གོམ་གང་མདུན་སྤོས་ཀྱིས་ལེགས་བཅོས་བྱས། 
        “དཀར་མཛེས་ཁུལ་གྱི་རྒྱུན་སྤྱོད་ཀྲུང་ལུགས་དང་བོད་ལུགས་སྨན་རྩྭའི་མ་དཔེའི་གྲངས་མཛོད”དང་“ཟུར་ལུགས་བོད་སྨན་གྱི་མ་དཔེའི་གྲངས་མཛོད”སྒྲིག་འཛུགས་བྱས་པ་དང་། “དཀར་མཛེས་ཁུལ་གྱི་རྒྱུན་སྤྱོད་བོད་སྨན་སྨན་རྩྭའི་རྒྱུ་སྤུས་ཚོད་འཛིན་ཚད་གཞིའི་ལེགས་སྒྲིག་ཞིབ་འཇུག”དང་“དཀར་མཛེས་ཁུལ་གྱི་རྒྱུན་སྤྱོད་བོད་སྨན་སྡེབ་སྦྱོར་ཚད་གཞིའི་རིམ་འཕར་ཞིབ་འཇུག”གི་ལས་གཞི་སྤེལ་བར་མ་ཟད། 《དཀར་མཛེས་ཁུལ་གྱི་རྒྱུན་སྤྱོད་བོད་སྨན་སྨན་རྩྭའི་ཚད་གཞི་ཕྱོགས་བསྒྲིགས།》སོགས་ཉེར་སྤྱོད་དཔེ་དེབ་ལེགས་གྲུབ་བྱུང་ནས་ཁུལ་ཡོངས་ཀྱི་བོད་སྨན་སྡེབ་སྦྱོར་ཐོན་སྐྱེད་ལ་ལག་རྩལ་གྱི་ཚད་གཞི་དང་གཞུང་ལུགས་ཀྱི་རྨང་གཞི་འདོན་སྤྲོད་བྱས།