ཟླ་8པའི་ཚེས་28ཉིན་ཀྲུང་གོའི་ཤར་ཕྱོགས་མཁའ་འགྲུལ་ཀུང་སིའི་A319གནམ་གྲུ་གསར་དུ་བསྐྲུན་པའི་མཚོ་སྔོན་མདོ་ལའི་གནམ་གྲུ་ཐང་དུ་བབས་པ་དང་། དེ་ལས་མཚོ་སྔོན་མདོ་ལའི་གནམ་གྲུ་ཐང་དངོས་སུ་སྤྱོད་འགོ་ཚུགས་ཡོད་པ་རེད།
མདོ་ལའི་གནམ་གྲུ་ཐང་ནི་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་མདོ་ལ་རྫོང་མཁར་དམར་གྲོང་རྡལ་དུ་གནས་ཤིང་། མདོ་ལའི་རྫོང་བར་སྤྱི་ལེ་38ཡོད་པ་དང་། རྒྱ་མཚོའི་ངོས་ལས་མཐོ་ཚད་ལ་སྨི་3163ཡོད་ལ། རྒྱལ་ནང་གི་4Cརིམ་པའི་མཐོ་སྒང་གནང་གྲུ་ཐང་ཡིན་པ་རེད ། རྣམ་གྲངས་དེའི་ཐད་སྤྱིའི་མ་དངུལ་སྒོར་ཐེར་འབུམ་གཅིག་དང་དུང་ཕྱུར་གཅིག་དང་བྱེ་བ་བདུན་ས་ཡ་གསུམ་བཏང་ཞིང་། གནམ་གྲུ་ཐང་སྤྱི་ལོ་2025ལོར་འགྲུམ་སྐྱེལ་མིའི་ཐེངས་གྲངས་ཆིག་འབུམ་བརྒྱད་ཁྲི་དང་དངོས་ཟོག་སྐྱེལ་འདྲེན་ཏུན་400ཡི་དམིགས་འབེན་ལྟར་ཇུས་འགོད་བྱས་ཡོད་པ་རེད།
འདི་ནི་རྒྱལ་ཁབ་དམངས་སྤྱོད་མཁའ་འགྲུལ་ཅུས་དང་མཚོ་སྔོན་ཞིང་ཆེན་གྱི་ལོ་ལྔ་ཚན་གྱི་འཆར་འགོད་བཅུ་གཉིས་པའི་ནང་གཏན་འཁེལ་བྱས་པའི་གཙོ་གནད་འཛུགས་སྐྲུན་རྣམ་གྲངས་ཀྱི་གྲས་ཤིག་ཡིན་པ་དང་། སྤྱི་ལོ་2014ལོའི་ཟླ་༨པའི་ནང་རྒྱལ་སྲིད་སྤྱི་ཁྱབ་ཁང་གིས་ཆོག་མཆན་གནང་ཞིང་སྤྱི་ལོ་2016ལོའི་ཟླ་4པའི་ནང་དངོས་སུ་ལས་འགོ་ཚུགས་པ་རེད། དུས་ཡུན་ལོ་གཉིས་དང་ཟླ་གཉིས་རིང་གི་འབད་བརྩོན་བྱས་པ་བརྒྱུད། བཀོད་སྒྲིག་ཚད་ལྡན་དང་ནུས་པ་འཐུས་ཚང་། ཁྱད་ཆོས་ཀུན་ལྡན་གྱི་གནམ་གྲུ་ཐང་འདི་ལེགས་འགྲུབ་བྱུང་ཡོད་ལ། ད་ལོའི་ཟླ་བ་གསུམ་པའི་ནང་གནམ་གྲུ་ཐང་གིས་ཚོད་ལྟའི་ཚུལ་གྱིས་གནམ་གྲུ་འཕུར་གཏོང་བྱས་ཡོད་པ་རེད།
མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་དུ་བོད་རིགས་དང་སོག་རིགས། ཧུའེ་རིགས། ཧོར་སོགས་མི་རིགས་མང་པོ་འདུས་སྡོད་བྱས་ཡོད་ལ། གྲངས་ཉུང་མི་རིགས་ཀྱིས་མི་གྲངས་སྤྱིའི་བརྒྱ་ཆ་༦༧ཟིན་གྱི་ཡོད། མདོ་ལ་རྫོང་གི་ཆ་སྙོམས་ཀྱི་མཐོ་ཚད་ནི་སྨི་༣༥༠༠ཡིན་ཞིང་ད་ལྟའི་བར་དུ་འཛམ་གླིང་ཐོག་གདོད་མའི་སྐྱེ་ཁམས་ཉར་ཚགས་ཆེས་ཆ་ཚང་བའི་ས་ཁུལ་གྱི་གྲས་ཤིག་ཡིན་པ་ལས་གཞན་མི་རྣམས་ཀྱིས་མདོ་ལ་ལྷ་ཡི་ཞིང་ཁམས་ཞེས་འབོད་ཀྱི་ཡོད་པ་རེད།
ཤེས་རྟོགས་བྱུང་བར་གཞིགས་ན། མདོ་ལའི་གནམ་གྲུ་ཐང་ནི་མཚོ་སྔོན་ཞིང་ཆེན་གྱི་དམངས་སྤྱོད་གནམ་གྲུ་ཐང་བདུན་པ་དེ་ཡིན་པ་རེད།
