སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནག་སེལ་གཤེད་བཅོམ་གྱི་ཆེད་དོན་འཐབ་རྩོད་བྱེད་པའི་སྐོར་གྱི་མཛུབ་སྟོན་གལ་ཆེན་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་འཐབ་ཇུས་བཀོད་སྒྲིག་གྱི་དགོངས་དོན་ཁག་ལག་བསྟར་གཏིང་ཟབ་དང་དོན་འཁྱོལ་ཡོང་ཆེད། ཉེ་ཆར། ཀྲུང་དབྱང་ནག་སེལ་གཤེད་བཅོམ་གྱི་ལྟ་སྐུལ་ཁྲིད་སྟོན་ཚན་ཆུང་10པ་སི་ཁྲོན་ཞིང་ཆེན་དུ་བཅའ་སྡོད་བྱས་ནས། ནག་སེལ་གཤེད་བཅོམ་ཆེད་དམིགས་འཐབ་རྩོད་ཀྱི་ལྟ་སྐུལ་ཁྲིད་སྟོན་གྱི་ལས་ཀ་སྤེལ།  ཟླ་8པའི་ཚེས་29ཉིན། ཀྲུང་དབྱང་ནག་སེལ་གཤེད་བཅོམ་ལྟ་སྐུལ་ཁྲིད་སྟོན་བྱེད་པའི་ཚན་ཆུང་10པས་སི་ཁྲོན་ཞིང་ཆེན་གྱི་བྱ་བར་ལྟ་སྐུལ་ཁྲིད་སྟོན་བྱེད་པའི་སྐུལ་སློང་ཚོགས་འདུ་ཁྲིན་ཏུའུ་ནས་བསྡུ་འཚོགས་བྱས།  ཀྲུང་དབྱང་ལྟ་སྐུལ་ཚན་ཆུང་10པའི་ཚོགས་གཙོ་ཧན་ཡུང་དང་། ཚོགས་གཙོ་གཞོན་པ་ཅང་ཝེ་ཡིས་ལྟ་སྐུལ་ཁྲིད་སྟོན་བྱ་བ་ལེགས་པོར་བསྒྲུབ་པའི་ཐད་ནས་གཏམ་བཤད་གནང་བ་དང་། སི་ཁྲོན་ཞིང་ཆེན་ཏང་ཨུའི་ཧྲུའུ་ཅི་ཕིང་ཆིང་ཧྭ་ཡིས་སྐུལ་སློང་གསུང་བཤད་གནང་། སི་ཁྲོན་ཞིང་ཆེན་ཏང་ཨུའི་ཧྲུའུ་ཅི་གཞོན་པ་ཏེང་ཞའོ་ཀང་གིས་གྲོས་ཚོགས་ལ་གཙོ་སྐྱོང་གནང་བ་རེད།
         ཕིང་ཆིང་ཧྭ་ཡིས་ཞིང་ཆེན་ཡོངས་ཀྱི་རིམ་པ་སོ་སོ་དང་སྡེ་ཁག་སོ་སོའི་འདུ་ཤེས་བཞི་སྲ་བརྟན་དུ་བཏང་ཐོག  བློ་བརྟན་འགྱུར་མེད་ཀྱིས་བསམ་བློ་དང་བྱ་སྤྱོད་གཉིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་དང་ཏང་ཀྲུང་དབྱང་གི་འཐབ་ཇུས་བཀོད་སྒྲིག་ཐོག་གཅིག་གྱུར་ཡོང་བར་བྱས་ཐོག  ཀྲུང་དབྱང་གི་ལྟ་སྐུལ་ཁྲིད་སྟོན་ཚན་ཆུང་གི་བྱ་བར་ཧུར་ཐག་གིས་རྒྱབ་སྐྱོར་དང་གཞོགས་འདེགས་བྱས་ཏེ། བཙན་གཉོམ་གྱི་དབྱེ་བ་མེད་པར་གནད་དོན་བཅོས་སྒྲིག་བྱེད་པ་དོན་འཁྱོལ་ཡོང་བ་དམ་འཛིན་བྱས་ནས། གཅིག་ཤེས་ཀུན་གྲོལ་དང་རྩ་ལག་མཉམ་བཅོས་བྱེད་པ་དང་། ནག་སེལ་གཤེད་བཅོམ་གྱི་ཆེད་དོན་འཐབ་རྩོད་དང་ཞི་བདེའི་སི་ཁྲོན་འཛུགས་སྐྲུན་བྱེད་པ་གཏིང་ཟབ་དུ་བཏང་ཐོག  སི་ཁྲོན་བཅོས་སྐྱོང་དང་སི་ཁྲོན་དར་རྒྱས་སུ་གཏོང་བ་དེ་ཡང་བསྐྱར་སྐས་རིམ་གསར་པ་ཞིག་ལ་སླེབས་པར་བདེ་འཇགས་བརྟན་བརླིང་གི་སྤྱི་ཚོགས་ཁོར་ཡུག་ཞིག་བསྐྲུན་དགོས་ཞེས་བསྟན།།