དཀར་མཛེས་ཁུལ་ནི་ཀྲུང་གོ་གསར་པ་དབུ་བརྙེས་རྗེས་སུ་བཙུགས་པའི་ཐེངས་དང་པོའི་ཆེད་གཏོགས་རིམ་པའི་གྲངས་ཉུང་མི་རིགས་ཀྱི་རང་སྐྱོང་ཁུལ་ཞིག་ཡིན་ལ། ཏང་གི་དབུ་ཁྲིད་འོག་ཏུ། ཚ་ཚ་འུར་འུར་ངང་དམངས་གཙོ་བཅོས་སྒྱུར་དང་སྤྱི་ཚོགས་རིང་ལུགས་ཀྱི་བསྒྱུར་བཀོད་བྱས་པས། སྤྱི་ཚོགས་རིང་ལུགས་འཛུགས་སྐྲུན་གྱི་ལོ་རྒྱུས་འཐབ་ལམ་དུ་གོམ་སྟབས་བསྒྱུར་ཞིང་། བཅིངས་འགྲོལ་དང་ཐོན་སྐྱེད་ནུས་ཤུགས་འཕེལ་རྒྱས་ཀྱི་རླབས་ཆེའི་གསར་བརྗེ་ཞིག་གི་ཡོལ་རིས་ཕྱེས། བཅོས་སྒྱུར་སྒོ་འབྱེད་བྱས་ནས་བགྲང་བྱ་བཞི་བཅུ་འཁོར་བའི་དེ་རིང་ནི། ཁམས་པའི་ཡུལ་གྲུ་ཀུན་ལ་དཔལ་འབྱོར་མགྱོགས་མྱུར་འཕེལ་བ་དང་། དམངས་འཚོ་ཉིན་བཞིན་ཇེ་ལེགས། སྤྱི་ཚོགས་འཆམ་མཐུན་བརྟན་བརླིང་གི་དགའ་འོས་པའི་རྣམ་པ་མངོན། དཀར་མཛེས་ཁུལ་གྱི་གནམ་ས་བླ་འོག་བརྗེས་ཤིང་། རྨང་ནས་བཅོས་སྒྱུར་བྱས་པའི་འགྱུར་ལྡོག་ཆེན་མོ་འདི་ནི། རང་རྒྱལ་གྱི་རྒྱ་ཆེ་བའི་མི་རིགས་ས་ཁུལ་གྱིས་ཏང་གི་དབུ་ཁྲིད་དང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བགྲོད་ལམ་ལ་རྒྱུན་འཁྱོངས་བྱས་ནས། མཆོང་བརྒལ་རྣམ་པའི་འཕེལ་རྒྱས་མངོན་འགྱུར་བྱུང་བའི་གསོན་ཉམས་ལྡན་པའི་ལོ་རྒྱུས་རགས་རིམ་ཞིག་རེད།