དབྱངས་ཅན་ལྷ་མཛེས་ནི་བོད་ཀྱི་མིང་དུ་གྲགས་པའི་གླུ་མ་ཞིག་ཡིན་ལ། གླུ་གར་གྱི་ཕ་སར་འབོད་པའི་ཁམས་ཡུལ་ཤུལ་སྐྱེ་དགུ་མདོ་ནས་སྐྱེས། ཆུང་དུས་ནས་གླུ་གར་སྒྱུ་རྩལ་ལ་དུང་ཞེན་ཆེ་ལ། ལྷན་སྐྱེས་སུ་སྐད་ངག་སྙན་མོ་ཞིག་ལྡན་པས་སློབ་གྲྭར་འགྲིམས་པའི་རིང་། དགེ་རྒན་གྱིས་མོ་རང་དགའ་སྟོན་དང་མགྲོན་པོ་བསུ་ལེན་གྱི་སྐབས་སུ་གླུ་ལེན་དུ་འཇུག སྐབས་དེ་ནས་བཟུང་མོས་གླུ་དབྱངས་སྒྱུ་རྩལ་གྱི་ལམ་དུ་གོམ་པ་དང་པོ་སྤོས། སློབ་འབྲིང་ནས་མཐར་ཕྱིན་པའི་ལོ་དེར་ཞིང་ཆེན་སྒྱུ་རྩལ་སློབ་གྲྭ་ཡུལ་ཤུལ་དུ་སློབ་མ་བསྡུ་བར་སླེབས། མོའི་ཨ་ཅེ་ཡི་སྐུལ་མ་དང་སེམས་ཤུགས་འོག་སྤོབས་པ་ཆེན་པོས་ཞིང་ཆེན་སྒྱུ་རྩལ་སློབ་གྲྭར་མིང་ཐོ་བཀོད། མོའི་ཨ་ཅེ་ནི་རྣོ་སྦྲང་གཏོང་མཁན་ཞིག་ཡིན་པས་མོས་ཀྱང་ཨ་ཅེ་ནང་བཞིན་རྣོ་སྦྲང་བཏང་ན་བསམ། འོན་ཀྱང་རྣོ་སྦྲང་གི་འཇམ་ལྷོད་རན་ཞིང་སྐྱོ་བ་འདྲེན་པའི་དབྱངས་རྟ་དེ་ནི་མོའི་རྣམ་རིག་རྒོད་ཅིང་བརྩེ་དགས་ཁེངས་པའི་གཤིས་ཀ་དང་ལྡོག་ཟླར་སོང་གཤིས། འདེགས་འཇོག་གསལ་ཞིང་སྤྲོ་དགས་བརྟས་པའི་མི་རིགས་ཀྱི་རོལ་ཆས་ནི་རང་ཉིད་ལ་ཀུན་ནས་འཚམས་པ་ལྟར་སྣང་མོད། མོས་ཨུ་ཚུགས་ངང་རྣོ་སྦྲང་ཆེད་ལས་རང་གི་སྦྱང་བྱ་གཙོ་བོར་བདམས།

        སྒྱུ་རྩལ་སློབ་གྲྭ་ནས་སློབ་མཐར་ཕྱིན་རྗེས། མོ་རང་ཕྱིར་ཕ་ཡུལ་དུ་ལོག་ནས་ཡུལ་ཤུལ་ཁུལ་གྱི་གླུ་གར་ཚོགས་པ་ནས་རྣོ་སྦྲང་བའི་འགན་འཁུར། དེའི་རིང་དུ་ཁོ་མོ་ཞིང་ཆེན་ཕྱི་ནང་གི་གར་སྟེགས་ཆེ་མ་ཆུང་གསུམ་མང་པོར་ཞུགས་ནས། གླུ་གར་སྒྱུ་རྩལ་གྱི་འཇོན་ཐང་ངོམ་ཞིང་འཁྲབ་སྟོན་གྱི་ཉམས་མྱོང་བསགས། སྤྱི་ལོ་2005ལོར་《ཁྱོད་དང་འཕྲད་པ་ལས་བསོད་རེད།》ཅེས་པའི་གླུ་གཞས་ལ་བརྟེན་ནས་རྒྱལ་ནང་དུ་སྐད་གྲགས་རྒྱས་པ་དང་། དེ་ནས་བཟུང་དབྱངས་ཅན་ལྷ་མཛེས་ཟེར་ན་མི་ཀུན་གྱི་ཡིད་ལ་《ཁྱོད་དང་འཕྲད་པ་ལས་བསོད་རེད།》ཅེས་པའི་གླུ་དབྱངས་དེ་ཝ་ལེར་དྲན་པར་གྱུར།

        2006ལོར་CCTVབརྙན་ལམ་གྱི་གཞས་པའི་འགྲན་བསྡུར་ཁྲོད་མཚོ་སྔོན་འགྲན་ཁུལ་གྱི་གསེར་གྱི་རྟགས་མ་དང་ཀྲུང་དབྱང་བརྙན་འཕྲིན་ཁང་གི་ཀྲུང་གོའི་དམངས་གླུ་ཞེས་པའི་ལེ་ཚན་ལ་ཞུགས། 2014ལོའི་ཡུལ་ཤུལ་ས་ཡོམ་སྐབས་སུ་གཟི་བརྗིད་མིང་བྱང་ཐོབ་ཅིང་། ཡུལ་ཤུལ་ཁུལ་གྱི་འཐུས་ཚབ་བྱས་ནས་རྒྱལ་ཡོངས་དྲིན་བཟོའི་ཆེད་འཚོགས་འཁྲབ་སྟོན་ལ་ཞུགས། སྔ་རྗེས་སུ་ཧྲན་ཏུང་བརྙན་འཕྲིན་དང་སི་ཁྲོན་བརྙན་འཕྲིན་སོགས་རྒྱལ་ནང་གི་བརྙན་འཕྲིན་དྲྭ་ལམ་ཁག་ཏུ་སྐབས་རེར་འགྲན་ཞུགས་པའི་རྣམ་པ་དང། མཚམས་རེར་སྐུ་མགྲོན་གྱི་ཚུལ་གྱིས་ཞུགས་པར་རྒྱ་ཆེའི་གཟིགས་མོ་བ་དང་ལྟད་མོ་བས་དགའ་བསུ་ཆེན་པོ་ཐོབ་ཡོད་པ་དང་། 2015ལོར་ཨོ་སི་ཐྲི་ལི་ཡའི་ཝེ་ནེ་ཟློས་གར་གླིང་དུ་འཁྲབ་སྟོན་བྱས་པ་དེས་མོ་རང་བོད་ཁུལ་གྱི་སྒྱུ་རྩལ་མི་སྣའི་ཁྲོད་ཐེངས་དང་པོར་འཛམ་གླིང་གི་ཟློས་གར་གླིང་རྩེ་གྲ་དེར་འཁྲབ་སྟོན་བྱེད་མཁན་གྱི་གླུ་མར་གྱུར། སྐབས་དེར་བྱམས་བརྩེ་ཕོ་ཉའི་མཚན་སྙན་ཐོབ་ཞིང་རྒྱལ་ཁབ་ཕྱི་ནང་གི་གཟིགས་མོ་བ་ཚོས་གདེང་འཇོག་ཚད་མཐོན་པོ་ཐོབ།

        མ་འོངས་པར་མོས་རང་གི་ལྷན་སྐྱེས་ཀྱི་སྐད་ངག་སྙན་མོ་གནའ་དེང་ཕྱི་ནང་གི་རོལ་ཆས་སྣ་བརྒྱའི་ནང་དུ་དྲངས་ཏེ། ཕ་ཡུལ་དང་མི་རིགས་ཀྱི་ཕུན་སུམ་ཚོགས་པའི་གླུ་གར་རིག་གནས་འདི་ཉིད་འཛམ་གླིང་གི་རིགས་སོ་སོའི་སྤུན་ཟླ་ཡོངས་ཀྱི་རྣ་བའི་བཅུད་དང་སེམས་ཀྱི་ལོངས་སྤྱོད་དུ་དབུལ་རྒྱུའི་སྟ་གོན་བྱེད་བཞིན་མཆིས།

        ད་སྔའི་བར་འགྲེམ་སྤེལ་བྱེད་པའི་མི་སྒེར་གྱི་ཆེད་བསྒྲིགས་བརྩམས་ཆོས་ལ་《དབྱངས་ཀྱི་མཚོ་མོ།》དང་ 《སྐྱིད་པའི་གླུ།》《ཡུལ་ཤུལ་གྱིས་བརྗེད་མི་སྲིད།》 《བདེ་སྐྱིད་ཀྱི་ཁ་ཕྱོགས།》 སོགས་ཡོད་ཅིང་། མཉམ་སྡེབ་བརྩམས་ཆོས་《ཤེས་རབ་ཀྱི་འོད།》དང་ 《མཐོ་སྒང་གི་བུ་མོ།》 《བོད་མིའི་ལས།》 《ཚེ་སྲོག་གི་འབོད་པ།》 《དགའ་གླུ།》སོགས་ཡོད།

        ཕབ་ལེན་བྱས་པའི་གློག་བརྙན་གྱི་བརྗོད་དོན་གླུ་དབྱངས་ལ་《སངས་རྒྱས་སྒྲོལ་མ།》 དང་《བརྩེ་བའི་དྭངས་མ།》 སོགས་ཡོད། །