ཤིན་ཧྭ་གསར་འགྱུར་ཁང་པེ་ཅིང་ནས་ཟླ་9ཚེས་22ཉིན་གློག་འཕྲིན་འབྱོར་གསལ།　ཟླ་9ཚེས་23ཉིན་གྱི་སྟོན་ཉིན་མཚན་མཉམ་པའི་དུས་ཚིགས་སུ།　རང་རྒྱལ་གྱིས་ཀྲུང་གོའི་ཞིང་པའི་ལོ་ལེགས་དུས་ཆེན་ཐེངས་དང་པོ་བསུ་རྒྱུ་ཡིན་པས།　ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་།　རྒྱལ་ཁབ་ཀྱི་ཀྲུའུ་ཞི།　ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་ཏང་ཀྲུང་དབྱང་གི་ཚབ་ཞུས་ནས་རྒྱལ་ཡོངས་ཀྱི་ཞིང་པ་དུང་ཕྱུར་དུ་མར་དུས་ཆེན་གྱི་འཚམས་འདྲི་དང་སྨོན་འདུན་བཟང་པོ་ཞུས་གནང་བ་རེད།
            ཞི་ཅིན་ཕིང་གིས་ཀྲུང་གོའི་ཞིང་པའི་ལོ་ལེགས་དུས་ཆེན་ནི་ཏང་ཀྲུང་དབྱང་གིས་ཞིབ་འཇུག་གཏན་འཁེལ་གནང་བ་ཞིག་ཡིན་ཞིང་།　　དེ་ལས“ཞིང་གསུམ”ལས་དོན་གྱི་གལ་ཆེའི་ནང་གི་འགངས་ཆེའི་གཞི་རྩའི་གནས་བབ་སྔར་བས་གསལ་པོར་མཚོན་ཡོད་ལ།　དེ་ནི་ཤུགས་རྐྱེན་གཏིང་ཟབ་ལྡན་པའི་དོན་ཆེན་ཞིག་རེད།　སྟོན་ཉིན་མཚན་མཉམ་པའི་དུས་ཚིགས་སུ་རྒྱལ་ཡོངས་ཀྱི་ས་ཆ་གང་སར་འབྲུ་རིགས་སྣ་ལྔར་ལོ་ལེགས་བྱུང་བ་དང་ཀྭ་རིགས་ཀྱི་འབྲས་བུའི་དྲི་ཞིམ་འཐུལ་ནས་རྒྱ་ཆེའི་ཞིང་པས་ལོ་ལེགས་བྱུང་བར་མཉམ་དུ་རྟེན་འབྲེལ་ཞུ་བ་དང་མཉམ་དུ་དགའ་སྤྲོའི་དཔལ་ལ་རོལ་བཞིན་ཡོད་པས།　ཀྲུང་གོའི་ཞིང་པའི་ལོ་ལེགས་དུས་ཆེན་དུས་འདིར་བཏང་ན་ཤིན་ཏུ་འཚམ་པོ་ཡོད་ཅེས་མཛུབ་སྟོན་གནང་བ་རེད།
            ཞི་ཅིན་ཕིང་གིས་རང་རྒྱལ་ནི་ཞིང་ལས་སྟོབས་ཆེན་གྱི་རྒྱལ་ཁབ་ཞིག་ཡིན་པས།　ཞིང་ལས་ལ་མཐོང་ཆེན་དང་གཞི་རྩ་བརྟན་དུ་གཏོང་རྒྱུ་ནི་མི་དམངས་བདེ་བར་འཁོད་པའི་རྩ་བ་དང་རྒྱལ་སྐྱོང་གི་འགག་གནད་ཅིག་རེད།　རྒྱ་ཆེའི་ཞིང་པས་རང་རྒྱལ་གྱི་གསར་བརྗེ་དང་།　འཛུགས་སྐྲུན།　སྒྱུར་བཅོས་སོགས་ལོ་རྒྱུས་ཀྱི་དུས་སྐབས་སོ་སོར་ལེགས་སྐྱེས་གལ་ཆེན་ཕུལ་ཡོད།　འདི་ལོ་ནི་གྲོང་གསེབ་སྒྱུར་བཅོས་བྱས་ནས་ལོ་40འཁོར་བའི་ལོ་རེད།　ལོ་40ཡི་རིང་རང་རྒྱལ་གྱི་ཞིང་ལས་དང་གྲོང་གསེབ་འཕེལ་རྒྱས་ཐད་ལོ་རྒྱུས་རང་བཞིན་གྱི་གྲུབ་འབྲས་ཐོབ་པ་དང་ལོ་རྒྱུས་རང་བཞིན་གྱི་འཕོ་འགྱུར་བྱུང་ཡོད་ཅེས་ནན་བཤད་གནང་བ་དང་།　ཁོང་གིས་རྒྱ་ཆེའི་ཞིང་པ་དང་སྤྱི་ཚོགས་ལས་རིགས་ཁག་གིས་ཀྲུང་གོའི་ཞིང་པའི་ལོ་ལེགས་དུས་ཆེན་གྱི་བྱེད་སྒོར་ཧུར་ཐག་ཞུགས་ཏེ་སྤྱི་ཚོགས་ཡོངས་ཀྱིས་ཞིང་ལས་ལ་དོ་ཁུར་དང་།　གྲོང་གསེབ་ལ་ཐུགས་ཁུར།　ཞིང་པར་དགའ་གཅེས་བཅས་བྱེད་པའི་རྣམ་པ་ཟབ་མོ་གཏོད་པ་དང་།　ཞིང་པ་དུང་ཕྱུར་ཁ་ཤས་ཀྱིས་ཞིང་ལས་ལ་མཐོང་ཆེན་དང་ཞིང་ལས་བྱེད་པའི་ཧུར་བརྩོན་རང་བཞིན་དང་།　རང་འགུལ་རང་བཞིན།　གསར་གཏོད་རང་བཞིན་བཅས་སྐོང་འཐེན།　གྲོང་གསེབ་དར་རྒྱས་གཏོང་བའི་འཐབ་ཇུས་ཕྱོགས་ཡོངས་ནས་ལག་བསྟར་དང་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་པ།　ཞིང་ལས་དང་གྲོང་གསེབ་དེང་རབས་ཅན་ལ་སྐུལ་འདེད་མགྱོགས་པོ་གཏོང་བ་བཅས་བྱས་ཏེ་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་གཏོང་བ་དང་།　“ལོ་བརྒྱ་གཉིས”ཀྱི་འབད་འཐབ་དམིགས་ཚད་མངོན་འགྱུར་ཡོང་བའི་རྒྱང་སྐྱོད་ཀྱི་ལམ་གསར་དུ་རང་རྒྱལ་གྱི་ཞིང་ལས་དང་གྲོང་གསེབ་སྒྱུར་བཅོས་འཕེལ་རྒྱས་ཀྱི་འོད་སྟོང་འཕྲོ་བའི་ལེའུ་གསར་པ་ཞིག་རྩོམ་རྒྱུའི་ཐུགས་རེ་གནང་བ་རེད།