ཟླ་10ཚེས་25ཉིན་གློག་འཕྲིན་འབྱོར་གསལ། ཚེས་25ཉིན། གསར་འགོད་པར་སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་པུའུ་ནས་ཤེས་རྟོགས་བྱུང་བར། མིག་སྔའི་གྲོང་གསེབ་འཛུགས་སྐྲུན་དང་སྡོད་མལ་ཁོར་ཡུག་གི་མངོན་གསལ་དོད་པའི་གནད་དོན་ལ་དམིགས་ནས། སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་པུའུ་ཡིས་གྲོང་གསེབ་ཀྱི་འཛུགས་སྐྲུན་འཆར་འགོད་ལ་སྔར་བས་ཤུགས་སྣོན་དང་གྲོང་གསེབ་ཏུ་འཆར་འགོད་བྱ་རྒྱུར་ཁྲིད་སྟོན་དང་རྒྱབ་སྐྱོར་བྱ་རྒྱུའི་སྐོར་གྱི་བརྡ་ཐོ་གཉིས་པར་འགྲེམས་བྱས་པ་དང་། ལས་རིགས་ཀྱི་ཆེད་ལས་ལག་རྩལ་མི་སྣ་གྲོང་གསེབ་ཏུ་གཤམ་སྐྱོད་བྱ་རྒྱུར་སྐུལ་སློང་རྒྱ་ཁྱབ་བྱས་ནས་མཉམ་དུ་ཇུས་འགོད་དང་། མཉམ་དུ་འཛུགས་སྐྲུན། མཉམ་དུ་དོ་དམ། མཉམ་དུ་དཔྱད་དཔོག མཉམ་སྤྱོད་བཅས་ཀྱི་ལས་ཀའི་ལམ་སྲོལ་བཏོད་ནས། གྲོང་གསེབ་ཀྱི་འཛུགས་སྐྲུན་འཆར་འགོད་དང་གྲོང་གསེབ་ཀྱི་འཆར་འགོད་འཛུགས་སྐྲུན་གྱི་ཆུ་ཚད་སྔར་བས་མཐོ་རུ་གཏོང་རྒྱུའི་བླང་བྱ་བཏོན་ཡོད།
        གྲོང་གསེབ་ཀྱི་འཛུགས་སྐྲུན་འཆར་འགོད་ལས་ཀར་སྔར་བས་ཤུགས་སྣོན་དང་གྲོང་གསེབ་ཀྱི་འཆར་འགོད་འཛུགས་སྐྲུན་དོ་དམ་གཞི་རྩའི་ཆར་ཁྱོན་ཡོངས་ལ་ཁྱབ་པའི་དམིགས་ཚད་དོན་འཁྱོལ་བྱ་ཆེད། བརྡ་ཐོའི་ནང་བླང་བྱ་ཁག་3བཏོན་ཡོད་པ་སྟེ། གཅིག་ནས་བྱ་བ་ཐམས་ཅད་དོན་དངོས་དང་བསྟུན་པ་དང་ཡུལ་བབ་དང་བསྟུན་ཏེ་གྲོང་གསེབ་ཀྱི་འཛུགས་སྐྲུན་འཆར་གཞི་བཟོ་རྒྱུར་སྐུལ་འདེད་གཏོང་དགོས་པ་དང་། གཉིས་ནས་མཉམ་དུ་ཇུས་འགོད་དང་། མཉམ་དུ་འཛུགས་སྐྲུན། མཉམ་དུ་དོ་དམ། མཉམ་དུ་དཔྱད་དཔོག མཉམ་སྤྱོད་བཅས་ཀྱི་ལས་ཀའི་ལམ་སྲོལ་ཕྱོགས་ཡོངས་ནས་ཁྱབ་གདལ་གཏོང་དགོས་པ། གསུམ་ནས་གྲོང་གསེབ་ཀྱི་འཛུགས་སྐྲུན་འཆར་འགོད་ཀྱི་ཆོག་འཐུས་དོ་དམ་སྔར་བས་གསལ་བཟོ་དང་འཐུས་སྒོ་ཚང་དུ་གཏོང་བ་དང་། གཞི་རིམ་གྱི་འཆར་འགོད་འཛུགས་སྐྲུན་ལ་དོ་དམ་བྱ་ཤུགས་ཆེ་རུ་གཏོང་བ། གྲོང་གསེབ་ཀྱི་དོན་དངོས་དང་འཚམ་པའི་འཛུགས་སྐྲུན་གྱི་མཆན་འགོད་གོ་རིམ་རིམ་བཞིན་འཚོལ་ཞིབ་ཀྱིས་བཟོ་དགོས་པ་སོགས་ཀྱི་བླང་བྱ་བཏོན་ཡོད།