ས་དེའི་ཚེས་ཉེར་བརྒྱད་ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་མཱ་ཏི་ལེ་ནས་སི་ཕེན་གྱི་གྲོས་ཞུགས་ཁང་དང་དམངས་གྲོས་ཁང་གི་གྲོས་མི་གཙོ་བོར་གསུང་གླེང་མཛད།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ས་དེའི་ཚེས་ཉེར་བརྒྱད་ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་མཱ་ཏི་ལེ་ནས་སི་ཕེན་གྱི་གྲོས་ཞུགས་ཁང་དང་དམངས་གྲོས་ཁང་གི་གྲོས་མི་གཙོ་བོར་གསུང་གླེང་མཛད།
ཞི་ཅིན་ཕིང་གིས་བསྟན་དོན། ཀྲུང་གོ་དང་སི་ཕེན་གཉིས་ནི་ཤར་ནུབ་ཤེས་རིག་གི་ཕུལ་བྱུང་འཐུས་ཚབ་ཡིན་ལ། རྒྱལ་ཁབ་གཉིས་བར་དུ་མཛའ་མཐུན་འགྲོ་འོང་གི་ལོ་རྒྱུས་རིང་པོ་ཡོད། ད་ལོ་ནི་ཀྲུང་གོས་བཅོས་སྒྱུར་སྒོ་འབྱེད་བྱས་ཏེ་ལོ་འཁོར་བཞི་བཅུ་ལོན་པའི་ལོ་ཡིན་ལ། སི་ཕེན་གྱིས་ད་ལྟ་ལག་བསྟར་བྱེད་བཞིན་པའི་རྩ་ཁྲིམས་ཁྱབ་བསྒྲགས་བྱས་ནས་ལོ་འཁོར་བཞི་བཅུ་ལོན་པའི་ལོ་ཡང་ཡིན། ལོ་ངོ་བཞི་བཅུའི་རིང་ལ། ཀྲུང་གོ་དང་སི་ཕེན་རྒྱལ་ཁབ་གཉིས་ཀྱིས་རྒྱལ་ཁབ་རང་གི་གནས་ཚུལ་དང་མཐུན་པའི་བགྲོད་ལམ་དུ་སྐྱོད་རྒྱུ་རྒྱུན་འཁྱོངས་བྱས་ཏེ། རྒྱལ་ཁབ་ཀྱི་དར་རྒྱས་དང་སྤྱི་ཚོགས་ཀྱི་གོང་འཕེལ་མངོན་འགྱུར་བྱས། ཀྲུང་གོས་ཕྱི་ཕྱོགས་སུ་སྒོ་འབྱེད་མཚམས་ནམ་ཡང་འཇོག་མི་སྲིད་པར་དེ་ལས་ལྡོག་སྟེ་སྒོ་ཆེ་ནས་ཆེ་རུ་འབྱེད་རྒྱུ་ཡིན། སི་ཕེན་གྱིས་ཀྱང་ཡར་བརྩོན་ལྷོད་མེད་དང་གསར་གཏོད་ཆད་མེད་བྱས་ཏེ། དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལམ་གསར་པར་སྐྱོད་བཞིན་ཡོད། ཀྲུང་གོ་དང་སི་ཕེན་གྱི་འབྲེལ་བ་འཕེལ་རྒྱས་ཀྱི་གོ་སྐབས་གསར་པར་འཕྲད་ཡོད་ཟེར།
ཞི་ཅིན་ཕིང་གིས་ནན་གྱིས་བསྟན་དོན། ཀྲུང་གོས་སི་ཕེན་བར་དུ་མཐོ་རིམ་འགྲོ་འོང་སྲུང་འཛིན་བྱེད་པ་དང་། ཕན་ཚུན་གྱི་སྲོག་ཤིང་ཁེ་ཕན་དང་དོ་སྣང་གལ་ཆེན་ལ་མུ་མཐུད་དུ་རྒྱུས་ལོན་དང་རྒྱབ་སྐྱོར་བྱས་ཏེ། ཕྱོགས་གཉིས་ཀྱི་འབྲེལ་བ་འཕེལ་རྒྱས་ཀྱི་ཁ་ཕྱོགས་ཡང་དག་དམ་འཛིན་བྱེད་འདོད་ཡོད། ཕྱོགས་གཉིས་ཀྱིས་འཕེལ་རྒྱས་འདུ་ཤེས་ཀྱི་བརྗེ་རེས་དང་འཐབ་ཇུས་སྦྲེལ་མཐུད་ལ་ཤུགས་བསྣན་ནས། རྒྱུད་གཅིག་ལམ་གཅིག་མཉམ་སྐྲུན་བྱེད་དགོས། མི་ཆོས་བརྗེ་རེས་རྒྱ་བསྐྱེད་ནས། རྒྱལ་སྤྱིའི་ལས་དོན་ཁྲོད་ཀྱིི་འབྲེལ་འདྲིས་དང་མཐུན་སྦྱོར་ཇེ་དམ་དུ་གཏོང་དགོས། སི་ཕེན་གྲོས་ཁང་གིས་ཀྲུང་གོ་དང་སི་ཕེན་བར་གྱི་ཆབ་སྲིད་ཡིད་ཆེས་ཇེ་ཟབ་ཏུ་གཏོང་བ་དང་། དམངས་ཁྲོད་འགྲོ་འོང་ལ་ཡར་སྐུལ་བྱེད་པ། མི་དམངས་ཀྱི་མཛའ་བརྩེ་ཇེ་ཟབ་ཏུ་སོགས་ཐད་ལ་ནུས་པ་གལ་ཆེན་བཏོན་ཆོག ཀྲུང་གོས་སི་ཕེན་གྱི་གྲོས་ཞུགས་ཁང་དང་དམངས་གྲོས་ཁང་བར་གྱི་མཛའ་མཐུན་འགྲོ་འོང་ལ་ཤུགས་སྣོན་པར་མཐོང་ཆེན་བྱེད་བཞིན་ཡོད། གྲོས་མི་རྣམ་པ་མུ་མཐུད་དུ་ཀྲུང་གོ་དང་སི་ཕེན་གྱི་མཛའ་མཐུན་ལས་དོན་ཁྲོད་ཟབ་ཞུགས་བྱས་ཏེ། རྒྱལ་ཁབ་གཉིས་ཀྱི་འབྲེལ་བའི་འཕེལ་རྒྱས་ལ་གཞོགས་འདེགས་བྱེད་རྒྱུ་ནི་རེ་བ་ཡིན་ཟེར། །
