ཉིས་སྟོང་བཅུ་གཉིས་ལོ་ནས་བཟུང་།ཛམ་ཐང་གིས་ཨ་ཅེ་ལྷ་མོ་འཁྲབ་སྟོན་ལ་རོགས་སྐྱོར་བྱས་པ་ནས་འགོ་བརྩམས་ཏེ། རིམ་བཞིན་བོད་སྤོས་དང་བོད་ཇ།བོད་སྨན། ཐང་ག། རྡོ་བརྐོས། རྫ་བཟོ་སྒྱུ་རྩལ་སོགས་གཟུགས་མེད་ཤུལ་བཞག་རིག་གནས་འཕེལ་རྒྱས་སུ་གཏོང་བར་རོགས་འདེགས་བྱས་པ་རེད།ལོ་འདི་དག་གི་རིང་ལ། བསྡོམས་པས་གཟུགས་མེད་ཤུལ་བཞག་རིག་གནས་ཀྱི་རིགས་བཅོ་ལྔའི་ཁྲིད་སྦྱོང་རྟེན་གཞི་ཉེར་དྲུག་བཙུགས་ཡོད་པ་རེད།
ཛམ་ཐང་རྫོང་སྦང་ཐོག་རྡོ་བརྐོས་བཀའ་འགྱུར་ལ་རིག་དངོས་དང་སྒྱུ་རྩལ་ཞིབ་འཇུག་གི་རིན་ཐང་ཆེན་མོ་ལྡན་པ་རེད།དེར་བརྟེན་ཛམ་ཐང་རྫོང་གིས་རྡོ་བརྐོས་རིག་གནས་ཐོན་ཁུངས་ལ་བརྟེན་ནས་ཡུལ་སྐོར་འཕེལ་རྒྱས་བཏང་ཞིང་།ཡུན་རིང་དང་སྐྱོན་བྲལ་གྱི་དཔལ་འབྱོར་རྣམ་པ་འཛུགས་སྐྱོང་བྱས་ནས། གཞི་རྩའི་ཐོག་ནས་ས་གནས་དེ་གའི་དབུལ་ཕོངས་གནད་དོན་ཐག་གཅོད་བྱས་པ་རེད།
བཅོས་སྒྱུར་སྒོ་འབྱེད་ཀྱི་འདུ་ཤེས་ཟབ་མོ་དེ་མི་རྣམས་ཀྱི་སེམས་ལ་ཐིམ་པས།མ་འོངས་པར་ཛམ་ཐང་རྫོང་གིས་ད་དུང་མུ་མཐུད་དེ་རིག་གནས་ཐོན་ལས་ལ་དོ་སྣང་ཆེན་མོ་བྱས་ཤིང་།དབུལ་ཕོངས་མང་ཚོགས་ཀྱི་ཡོང་འཕར་ཕྱུག་འགྱུར་གྱི་ཐབས་ལམ་རྒྱ་ཆེར་གཏོང་རྒྱུ་དང་། གཙོ་བོར་རིག་གནས་དང་ཡུལ་སྐོར།རིག་གནས་དང་ལུས་རྩལ། རིག་གནས་དང་སྒྱུ་རྩལ། རིག་གནས་དང་འཁྲབ་སྟོན། རིག་གནས་དང་འཕྲིན་སྦྱོར་ཞེས་པའི་བྱ་སྤྱོད་འཆར་འགོད་ཆེན་མོ་ལྔ་ལག་བསྟར་ཡག་པོ་བྱས་ནས།དབུལ་ཕོངས་ས་ཁུལ་གྱི་འབྱོར་འབྲིང་ཕུགས་འདུན་མངོན་འགྱུར་བྱུང་དུ་འཇུག་རྒྱུ་རེད།
