ངས་ནི་མདང་ནུབ་སྒྱུ་མའི་རྨི་ལམ་དུ།།
འདི་ལྟར་གོ་བའི་གཞན་གྱི་སྐད་ཆ་ལ།།
ཁྱེད་རང་བྱ་ཁྱུ་བཞིན་དུ་སྤྲིན་པའི་སྟེང་།།
གྲིབ་མ་ལྷག་མ་མེད་པར་འཕུར་བ་ཐོས།།
འོན་ཀྱང་བདག་ལ་ཁྱེད་ཉིད་གསལ་བའི་ནང་།།
དཔྲལ་བའི་རི་མོ་དག་ནི་འོད་དང་བཅས།།
དབུ་སྐྲ་གསེར་མདོག་ཅན་ཡང་རླུང་གིས་སྤུར།།
འཛུམ་མདངས་ལྷུག་གེ་དེ་ཡང་ལྷང་ངེར་རིག།
ཐ་ན་དེ་རིང་ཉི་མའི་འོད་དེ་ཡིས།།
ཕྱོགས་གཡོན་གསལ་ཞིང་ཕྱོགས་གཡས་བསྒྲིབས་པའི་རྗེས།།
ཁྱེད་ཀྱི་དེ་བཞིན་ཉིད་དེ་གསལ་བ་ཡིས།།
སྐུ་ཉིད་མེ་ལོང་ཚུལ་དུ་ཉེ་བར་འོང་།།
དེ་ལྟར་ཡུན་གྱིས་ང་ཡི་དྲན་པའི་ནང་།།
མིག་ཆུ་སྦར་མོ་གང་རེ་གཏོར་བའི་གཞུག།
སེམས་ཀྱིས་བྱིལ་བྱིལ་རེ་འགའ་བཟོས་པའི་རྗེས།།
ང་ཡི་ལག་པའི་ནང་དུ་ཤོང་མ་ཐུབ།།
དྲན་པས་མ་ནོངས།
སྐབས་རེར་སྨུག་པ་ལན་རེར་ཆར་པ་དང་།།
འདི་ཀར་རྒྱུན་པར་སེམས་སུ་མི་འཚམས་པའི།།
དྲན་པ་གཅིག་ཐོག་གཅིག་ཏུ་བརྩེགས་པའི་འཕྲོར།།
ཐག་རིང་ཞིག་ལ་སེམས་འདི་ལྷག་ཏུ་ཆགས།།
འབྲེལ་མེད་མ་གསུང་བར་ཐག་ཙམ་ཞིག་སྟེ།།
བརྩེ་བ་འདི་ནི་ཤིན་ཏུ་མཐོང་བར་དཀའ།།
དཔེ་དང་རྒྱན་ལ་བཀོད་ནས་སྟོན་བཞག་ན།།
དབྱར་ཁའི་མེ་ཏོག་དབྱར་ཁས་སྒྲིབ་དང་མཚུངས།།
ལས་ཀྱིས་སོ་སོར་བུད་པར་ཆ་བཞག་ན།།
སླར་ཡང་བརྩེ་བའི་ཉིན་སྲིབ་ཅིག་ཏུ་ནི།།
ཕན་ཚུན་ཐུག་པའི་རེ་བ་འདུག་གམ་ཞེས།།
ང་ཡིས་ཞུ་བ་བགྱིས་ཏེ་ལས་ལ་དྲིས།།
དེ་ལྟར་བར་ཐག་ཅུང་ཟད་རིང་བ་ཡིས།།
ཞེ་འདང་མེ་ཏོག་འདི་ཡང་རྒུད་དམ་སྙམ།།
བརྩེ་བའི་ཐ་སྙད་འདི་ཡང་བོར་སྙམ་སྟེ།།
ཁྱོད་ཀྱིས་མཆི་མའི་ཚོམ་པ་མ་བསྐྲུན་རོགས།།
སྣང་ལ་མ་ངེས་པ།
ང་ནི་རི་ཁར་ལྡིང་བའི་བྱ་ཁྱུ་ཞིག།
ས་ཁྱོན་མངས་པོར་བསྐོར་ཞིང་བསྐོར་ཞིང་འོང་།།
ངལ་དུབ་མངས་པོ་གསོག་ཅིང་འོང་བའི་ཚེ།།
ཁྱེད་ཀྱི་གཤོག་པའི་ནང་དུ་ལྷུང་སྙམ་བྱེད།།
བདག་ནི་ནགས་སུ་བཞུད་པའི་སྟག་ཁྱུ་ཞིག།
བྲག་དང་ཤིང་ལ་སྦར་མོ་བརྡར་ཞིང་འོང་།།
སེམས་ཅན་གྲངས་མེད་དངངས་པ་རྩོམ་པའི་ཚེ།།
ཉིད་ཀྱི་སྐྲ་ལོའི་གསེང་དུ་ཐོགས་སྙམ་བྱེད།།
ང་ནི་སྤང་ཁའི་སྟེང་གི་ཕྱེ་ལེབ་ཅིག།
མེ་ཏོག་སྣ་ཚོགས་བརྒལ་ཞིང་བརྒལ་ཞིང་འོང་།།
བརྒལ་ཞིང་བརྒལ་མི་ཚར་བར་གོ་བའི་རྗེས།།
ཁྱེད་ཀྱི་མཛུབ་དཀྲིས་གསེང་དུ་ཐོགས་སྙམ་བྱེད།།
བདག་ནི་གྲོང་དུ་ཉུལ་བའི་སྟག་ཤར་ཞིག།
མཛེས་མའི་མེ་ཏོག་ལེན་གྱིན་ལེན་གྱིན་འོང་།།
དྲྭ་འཕྲིན་མང་པོས་འཚང་ཀ་རྒྱག་པའི་ཚེ།།
ཉིད་ཀྱི་དོ་ཡའི་ནང་དུ་འཛག་སྙམ་བྱེད།།
