གནའ་སྔ་མོ་ཕུན་ཚོགས་གྲོང་གི་ཤར་ཕྱོགས་སུ་བྲག་ཕུག་ཅིག་ཏུ་བླ་མ་སྒོམ་པ་ཞིག་ཡོད་པ་ལ། ངོ་ཤེས་ཀྱིས་ར་ཞིག་བྱིན་རྒྱུའི་ཁ་ཆད་ཡོད་པ་ལྟར། གཟའ་སྐར་འཕྲོད་སྦྱོར་བཟང་བའི་ཉིན་མོ་ཞིག་ལ་བླ་མས་ཐག་པ་བཟུང་ནས་ར་ཁྲིད་སར་འགྲོ་བའི་ལམ་ནས་རྐུན་མ་གསུམ་དང་ཕྲད་པས། ཁོ་ཚོས་ཀྱག་ཀྱོག་གི་ལམ་རིང་དེ་གཏམ་གྱིས་གཟད་ཅེས་པའི་དཔེ་ལྟར་ཕན་ཚུན་ཁ་བརྡ་བྱས་ཚེ། བླ་མས་རང་ཉིད་འགྲོ་དོན་གྱི་གནས་ལུགས་ཀུན་ཁ་ཁོག་པས་མ་གསང་། གློ་རྒྱུ་མས་མ་བསྐུངས་པར་རྐུན་མ་གསུམ་ལ་བཤད་པ་རེད། དེ་ལྟར་ཡུད་ཙམ་བརྒྱུད་མཐར་སོ་སོ་ཁ་གྱེས་ཏེ་ཕྱིན། རྐུན་མ་གསུམ་གྱིས་བསམ་བློ་བཞི་གསུམ་བཅུ་གཉིས་བཏང་། བློ་རྩེ་ཉི་ཤུ་རྩ་ལྔ་བཀོད་དེ་ལམ་མཚམས་རེར་མི་རེ་བྱས་ཏེ་བསྡད་ནས། ཨ་ཁུ་དེ་ཐོན་ཡོང་ཚེ་ཁྱེད་ཀྱིས་ཁྱི་ཞིག་ཁྲིད་དེ་གང་ལ་འགྲོ་ཞེས་དྲི་བ་བཏོན་ནས། གཡོ་ཐབས་ཀྱིས་ར་འཕྲོག་པར་གྲོས་འཆམ་ནས་སོ་སོ་སྒུག་གནས་སུ་བསྡད། ཡུད་ཙམ་འདས་རྗེས་དྭངས་གསལ་ནམ་མཁའི་བུ་མོའི་མཛེས་སྡུག་གི་མཚམས་སྤྲིན་ལུས་ལ་གསོལ་བའི་ཚེ། བླ་མ་འཛུམ་དམུལ་དམུལ་གྱི་ངང་ར་ནག་པོ་ཞིག་ཁྲིད་དེ་རྐུན་མ་དང་པོ་བརྒྱུད་སྐབས། རྐུན་མས། ཨ་ཁུས་ར་མི་ཁྲིད་པར་ཁྱི་ཞིག་ཁྲིད་དེ་གང་དུ་ཕེབས་ལགས་ཞེས་དྲིས་པར། ཁོས་སྨྱོན་པ་ཞིག་ཡིན་པར་དགོངས་ནས་ཅང་མི་སྨྲ་བར་མདུན་དུ་བསྐྱོད། ཅང་མ་འགོར་བར་རྐུན་མ་ཅིག་ཤོས་དང་འཕྲད་སྐབས་སྔར་བཞིན་དྲི་བ་བཏོན་ཚེ། ཁོའི་སེམས་སུ་མི་གཉིས་ཀྱིས་དེ་ལྟར་སྨྲས་པར་ཡ་མཚན་ནས་མྱུར་དུ་ཁ་ཕྱིར་འཁོར་ཏེ་བལྟས་ཚེ། ར་དེ་ནི་གུག་གུག་རྭ་ཅོའི་གནས་ལུགས་དང་ཐར་ཐོར་རིལ་མའི་རང་བཞིན། སིལ་སིལ་ཨོག་ཚོམ་གཡོ་བའི་རྣམ་པ་སོགས་མཐོང་ནས་ཁེར་ལབ་ཀྱི་ཚུལ་དུ། མི་འདི་དག་དངོས་གནས་ཤེས་རྒྱ་དང་མཐོང་རྒྱ་དམར་པའི་ཕྱིར་རེད་ཅེས་མུ་མཐུད་དུ་ཕྱིན་སོང་བ་རེད། སོང་སོང་བ་ན་སླར་ཡང་རྐུན་མ་གསུམ་པ་དང་ཐུག་ནས་སྔར་ལྟར་དྲིས་བྱུང་བས། ཁོ་ཐེ་ཚོམ་དང་སོམ་ཉིའི་རྒྱ་རུ་ཚུད་དེ་ཐམས་ཅད་ཀྱིས་དེ་ལྟར་དྲིས་བྱུང་བས། དངོས་གནས་ཁྱི་ཞིག་ཡིན་ཚོད་འདུག་སྙམ་བཞིན་ར་བསྐྱུར་ནས་ཕྱི་ལྟ་ཙམ་ཡང་མེད་ར་བྲག་ཕུག་ཕྱོགས་སུ་བྲོས་སོང་། རྐུན་མ་རྣམས་ཀྱིས་ར་བསྐྱུར་ཏེ་བྲོས་པ་ཤེས་ཚེ་སྤྱང་དར་མ་ཤ་ལ་རྔམས་པ་ལྟར་ར་བསད་ཅིང་གྲོང་འདབས་ཀྱི་ནགས་ཚལ་དུ་སོང་ནས། ཆེས་བརྗེད་པར་དཀའ་པའི་མཚན་མོ་ཞིག་བསྐྱལ་ལོ།།