ཉིན་ཞག་རེ་རེའི་དུས་ཡུན་སྐད་ཅིག་བཞིན།།
ཚེ་ཡི་ཆུ་ཐིགས་ས་ལ་ཟགས་པའི་ཚེ།།
ལས་ཀྱིས་འཐོར་བའི་སེམས་ཀྱི་མེ་ཏོག་ཡང་།།
དྲན་པའི་བྱུང་བ་སྣ་ཚོགས་གྲངས་མེད་ཡིན།།
དགུན་གྱི་རྡུལ་འཚུབ་འཁྲིགས་ནས་བུ་ཡུག་གཏོར།།
སེམས་ཀྱི་ཁ་དོག་གྱུར་ནས་མིག་ཆུ་བཏབ།།
སྙིང་ཁར་བསྙལ་བའི་ལས་ཀྱི་ཁུར་བོ་ཡང་།།
རེ་ཞིག་མཐོ་ཞིང་རེ་ཞིག་དམའ་ནས་ཡོད།།
གཙང་བོས་བྱ་ཁྱུའི་མཁའ་ལམ་ཆོད་ནས་ཡོད།།
ཐ་མག་རྐང་གཅིག་མེ་ལ་བསྒྲོན་ནས་ཡོད།།
གཞོན་པའི་ལང་ཚོ་དུས་ཀྱི་སོ་ཁ་ན།།
ཁོང་འདར་རྒྱག་གིན་རྨི་ལམ་བསྒོམས་ནས་ཡོད།།
ཡིག་འབྲུའི་འབབ་ཚིགས།
མིག་ལ་བཏགས་པའི་ལན་ཆགས་ཀྱི་མེ་ཏོག།
ཞེ་འདང་ཁུར་བའི་རྣམ་ཤེས་ཀྱི་སྒྲོམ་གཞི།།
ལོ་ཟླ་སྨུག་པོའི་གས་སྲུབས་ཀྱི་སྣང་བ།།
འབྲོང་ཁྱུ་གཤར་སའི་རི་སྒང་གི་དབྱར་ཁ།།
སྣང་ངོར་སྦྲུམ་པའི་འཆར་ཡན་གྱི་དགུ་ཚིགས།།
ལམ་སྣེར་དོད་པའི་ཆགས་སྡང་གི་སྐྱ་ཐིག།
བང་སོའི་ངོས་ཀྱི་བློས་བསླངས་ཀྱི་ཚོར་འདུ།།
མེ་ལ་བསྒྲོན་པའི་ཤོག་བྱང་གི་སྐྱོ་གར།།
དགུན་ཟླ་རིང་མོའི་སྲིབ་འཁྱགས་ཀྱི་ཁ་བ་།།
ཤམ་ལྭ་གྱོན་པའི་དུས་ཚིགས་ཀྱི་ངོ་གདོང་།།
བྱིས་སྒྲུང་ལྟ་བུའི་རྨི་ལམ་གྱི་ཁ་དོག།
ཁངས་མ་ཆར་གྱི་ཆར་ཞོད་ལ་བྲིས་སོ།།
ཐག་པ་དྲུད་པའི་འཇའ་ཚོན་གྱི་སྐར་མདའ།།
ཚོར་བས་བཏུས་པའི་མེ་ཏོག་གི་གོས་དར།།
གྲིབ་མའི་ངོས་ཀྱི་ཕྱི་ནང་གི་གསལ་སྒྲིབ།།
ཡིག་འབྲུའི་རྒྱབ་ཀྱི་མེ་ཏོག་ལ་བཏབ་ཡོད།།
