སྔོན་བརྗོད།

《 དགའ་གཅེས་སློབ་གསོ》 ཞེས་པ་ནི་དགའ་བ་དང་སེམས་ཁུར་གྱི་གཏམས་པའི་བརྩམས་ཆོས་ཉམས་པ་མེད་པ་ཞིག་ཡིན་ཞིང་ཚང་མས་མི་ཚེའི་འཚར་ལོངས་ཁྲོད་དུ་ངེས་པར་བཀླག་དགོས་པའི་དཔེ་ཆར་རྩི་བ་རེད།རྩོམ་པ་པོས་ཡིད་དབང་འཕྲོག་པའི་བརྗོད་འབྲི་བྱས་པར་བརྒྱུད་དེ་མི་རྣམས་བུ་ཆུང་རེ་རེའི་འགྲམ་དུ་བཅར་ནས་དེའི་ཁྲོད་དུ་ཆེས་ཟབ་ཅིང་མཛེས་སྡུག་ལྡན་པའི་མྱོང་ཚོར་དང་ཕན་པའི་ཤེས་བྱ་ཐོབ་སྲིད་པ་རེད།

《 དགའ་གཅེས་སློབ་གསོ》་ཡི་རྩོམ་པ་པོ་ཨའེ་ཏེ་མེང་ཏུའོ་•ཏེ•ཡ་སྨི་ཆེ་སི(EdemondoDeAmicis,1846-1908)་ནི་དབྱི་ཐ་ལི་ལི་ཀུའུ་ལི་ཡའི་ས་ཁུལ་ཆེན་པོའི་དབྱིན་ཕའེ་ལི་ཡ་ཞིང་ཆེན་གྱི་མཚོ་ངོགས་ཀྱི་གྲོང་ཁྱེར་ཞིག་ཏུ་སྐྱེས་ཤིང་།ཁོང་དམག་ནང་ཞུགས་མྱངས་པས་མ་ཚད་དབྱི་ཐ་ལིའི་རང་བཙན་འཐབ་འཛིང་ཐེངས་གསུམ་པའི་ནང་དུ་ཞུགས་པ་རེད།དེའི་རྗེས་ཕུལ་བྱུང་བརྩམས་ཆོས་མང་པོ་བརྩམས་ཤིང་སྐད་གྲགས་ཆེས་ཆེ་བ་ནི་རྩོམ་སྒྲུང《དགའ་གཅེས་སློབ་གསོ》 ཡིན་ལ།དཔེ་ཆ་འདིས་རྩོམ་པ་པོ་རྩོམ་རིག་ལས་རིགས་ཀྱི་ཁྲོད་དུ་བླ་ལྷག་གོ་གནས་ཀྱི་རྨང་གཞི་བཏིང་བ་རེད།

《 དགའ་གཅེས་སློབ་གསོ》 ལ་མིང་གཞན་དབྱི་ཐ་ལིའི་སློབ་ཆུང་སློབ་མ་ཞིག་གི་ཉིན་ཐོ་ཡང་ཟེར་ཞིང་།དེབ་ཡོངས་སུ་ལོ་རིམ་བཞི་པའི་བུ་ཆུང་ཞིག་གི་ལྟ་བས་འཛམ་གླིང་ལ་ཞིབ་ལྟ་བྱས་ཏེ།རང་ཉིད་སློབ་གྲྭའི་ཕྱི་ནང་གི་མཐོང་ཐོས་མྱོང་གསུམ་བཤད་ཡོད་པ་རེད།བག་ཆགས་བཅོས་མིན་གྱི་ཡིག་འབྲུ་དང་ཡིག་ཕྲེང་ཚང་མའི་གསེང་དུ་མི་རྣམས་ཀྱིས་དགེ་རྒན་གྱི་དགའ་གཅེས་དང་སློབ་མའི་དགའ་གཅེས།ཕ་མའི་དགའ་གཅེས།བུ་ཕྲུག་གི་དགའ་གཅེས།སློབ་གྲོགས་ཀྱི་དགའ་གཅེས་བཅས་མྱོང་ཚོར་བྱུང་ཐུབ་ཅིང་དགའ་གཅེས་ཀྱི་སྤྱོད་བཟང་སེམས་ཀྱི་མཐིལ་ནས་སྐྱེ་རུ་བཅུག་པ་རེད།མི་སྣ་གཙོ་བོ་ཆུང་ལ་མི་དང་བྱ་བ་འདི་དག་གིས་ཤུགས་རྐྱེན་ཐེབས་པའི་འོག་ཏུ་འགན་འཁྲི་དང་འོས་འགན་ཁུར་དགོས་པ་ཤེས་ཤིང་།དགའ་གཅེས་དང་དྲང་བདེན་གྱི་སྤྱོད་བཟང་དེ་དག་དལ་བུར་ནམ་རྒྱུན་གྱི་འཚོ་བའི་ནང་དུ་བསྲེས་པ་རེད།

ན་ཆུང་བྱིས་པ་ཚོས་འཛམ་གླིང་བརྩམས་ཆོས་གྲགས་ཅན་གྱི་ཡིད་དབང་འཕྲོག་ཤུགས་ལ་དེ་བས་ཤེས་ཚོར་ཟབ་མོ་བྱུང་བའི་ཆེད་དུ།དཔེ་དེབ་འདིའི་རྩོམ་སྒྲིག་པས་ན་ཆུང་བྱིས་པའི་དཔེ་ཀློག་གི་གོམས་གཤིས་དང་དགའ་ཞེན་ལ་གཞིགས་ནས་མ་ཡིག་ལ་སྒྲིག་སྦྱོར་དང་ཉུང་འཕྲི་འོས་འཚམ་བྱས་ཡོད།དཔེ་ཆ་ཧྲིལ་པོའི་བརྗོད་བྱ་གསོན་ཉམས་དོད་པ་དང་།བར་བཅུག་རི་མོ་མཛེས་ཤིང་མ་ཡིག་གི་དྭངས་བཅུད་མི་ཡལ་བས་མ་ཚད།སྟབས་བདེ་ཞིང་གོ་སླ་བའི་རྒྱས་བཀྲོལ་བྱས་ནས་ཡི་གེ་དེ་བས་གསོན་ཉམས་ལྡན་ཞིང་ངོ་མཚར་ཆེ་བས་ན་ཆུང་བྱིས་པ་རྣམས་ཀྱིས་དང་ལེན་དང་གོ་སླ་བ་རེད།

ན་ཆུང་བྱིས་པ་ཚོས་དཔེ་ཆ་འདི་ཀློག་པའི་སྐབས་སུ་དེའི་ནང་དུ་སློབ་གསོ་དང་གོ་བ་ཆ་ཤས་ཕོག་ཐུབ་པ་ཡིན་ན་དེ་ནི་སྒྲིག་མཁན་གྱི་རེ་འདུན་ཆེ་ཤོས་དེ་ཡིན་ནོ༎

ལེའུ་དང་པོ།ཟླ་བ་བཅུ་པ།

སློབ་འགོ་ཚུགས་པའི་ཉིན་དང་པོ།

སློབ་གྲྭ་ཚོགས་འགོ་ཚུགས་སོང་།ང་དེ་རིང་ནས་བཟུང་ཏུའུ་ལིན་སློབ་གྲྭར་ལོག་ནས་ལོ་རིམ་བཞི་པའི་སློབ་མ་ཞིག་བྱ་རྒྱུ་རེད།ལམ་བར་དུ་ངས་ད་དུང་གུང་གསེང་དུས་ཀྱི་རང་དབང་དང་དགའ་སྤྲོའི་འཚོ་བ་ཡིད་ལ་དྲན་བཞིན་ད་རུང་གྲོང་གསེབ་ཀྱི་ཞིང་རར་རྩེད་རྒྱུག་གང་དགའ་བྱེད་པ་དང་མཚུངས།

སློབ་གྲྭར་བརྒྱུད་པའི་ཁྲོམ་ལམ་ཐོག་ཏུ་གང་སར་སློབ་མ་དང་ཁྱིམ་བདག་མཐོང་ཞིང་།དཔེ་ཚོང་ཁང་དུ་ཕྲུ་གུ་ཚོས་དགའ་སྤྲོའི་ངང་ནས་ཟིན་དེབ་དང་དཔེ་ཁུག་སོགས་ཡོ་ཆས་ཉོ་བཞིན་མཆིས་ལ།ཕ་མ་དག་དགོད་འཛུམ་འཛུམ་གྱིས་འགྲམ་དུ་ལངས་ནས་སྒུག་ཅིང་ཕྲུ་གུའི་ཚོའི་འདོད་པ་བསྐོང་གང་ཐུབ་བྱས་པ་རེད།སྦྱོང་ཆས་གསར་པ་ཐོབ་མཁན་ཚོ་ནི་དགའ་བས་བསྲན་མི་ཐུབ་ཅིང་ཡིད་ལ་མི་འོང་བ་རྣམས་ནི་མགོ་བོ་ཐུར་དུ་གུག་ནས་སེམས་སྡུག་གི་ཡོད་པ་སྨོས་ཅི་དགོས།ལམ་རྒྱུད་ཀྱི་ཉེན་རྟོག་པ་ཡང་ཧ་ཅང་མང་ཞིང་།པི་པི་འབུད་ཅིང་ལག་བརྡ་བརྒྱབ་པ་དང་ཤུགས་བསྒྲིམས་ནས་འགྲིམ་འགྲུལ་སྒྲིག་ལམ་སྲུང་འཛིན་བྱེད་ཀྱིན་འདུགང་དང་ཨ་མ་ལག་པ་འཇུས་རེས་བྱས་ནས་འཚང་ཁ་ཆེ་བའི་མི་ཚོགས་ཁྲོད་ནས་སློབ་གྲྭའི་སྒོ་ཁར་བཙིར་པ་ཡིན།

ཨ་ཙི།སློབ་གྲྭ་མཛེས་སྡུག་ལྡན་པ་ཞིག་མཐོང་སྣང་ལ་ཤར་བྱུང་།ག་ས་གང་དུ་སློབ་གྲོགས་གསར་པར་བསུ་མ་བྱེད་པའི་སྦྱར་ཡིག་ཡོད་ལ།ད་དུང་ཞིབ་མོའི་བློ་ཡིས་བཞག་པའི་མེ་ཏོག་སོ་མ་དང་ཁོག་མའི་མཛེས་ལྗོངས་ཀྱང་འདུགམི་དར་མ་ཚང་མས་ལག་པ་གཅིག་གིས་ཕྲུ་གུ་ཁྲིད་ཅིང་ལག་གཅིག་གིས་བརྡ་ཤོག་འཁུར་བཞིན་བྲེལ་འཚུབ་ཀྱིས་སློབ་གྲྭས་སྔར་ལྷག་གིས་བཀོད་སྒྲིག་བྱེད་པར་སྒུག་བཞིན་འདུགདགེ་རྒན་ཚོ་ཡང་གདོང་ལ་འཛུམ་མདངས་ཀྱིས་ཁེངས་བཞིན་ངང་རྒྱུད་རིང་ཞིང་ཚམ་ཚོམ་མེད་པར་དྲི་བར་ལན་འདེབས་བཞིན་མཆིས།ཧ་ཧ།སློབ་གྲྭ་ནི་ངོ་མ་ཟློས་གར་ཁང་ཞིག་འདྲ་ལ།མི་ཚང་མས་འཁྲབ་བྱའི་མི་སྣ་རེ་རེ་འཁྲབ་བཞིན་ཡོད།

སློབ་གྲྭར་སོ་མར་ཞུགས་པའི་སློབ་མ་དེ་ཚོ་ཧ་ཅང་དགོད་བྲོ་བ་སྟེ་འགའ་ཞིག་ནི་དཔའ་ཁྲིག་ཁྲིག་རྐུབ་སྟེགས་ཀྱི་ཐོག་ལ་སྡོད་པ་དང་།འགའ་ཞིག་གིས་མཆུ་ཏོ་བརྐྱངས་ནས་སྐད་ཆ་མི་བཤད་ཅིང་།འགའ་ཞིག་མི་བདེ་ནས་ངུ་ཅོར་རྒྱག་པ་དང་།ཡང་མིན་ན་སྒོ་འགྲམ་གྱི་ཀ་བར་གླགས་ཡུས་བཤད་དེ་ཁ་ཏ་བསླབ་བྱ་ག་ཚད་བྱས་ཀྱང་ཕ་མ་དང་ཁ་བྲལ་འདོད་མེད་པ་རེད།ང་རང་ལྐོག་ཏུ་གད་མོ་ཤོར་བ་དང་སེམས་ནང་དུ་ང་རང་དེའི་དུས་ཀྱང་འདི་འདྲའི་ཁྱད་མཚར་བ་ཞིག་ཨེ་ཡིན་ནམ་སྙམ་བྱུང་།

ལོ་གསུམ་འགྲོ་མྱོང་བའི་ཚོམས་ཆེན་བརྒྱུད་པའི་སྐབས་སུ།ང་ལ་ཡི་གེ་སློབ་མྱངས་པའི་བུད་མེད་དགེ་རྒན་ཞིག་གིས་ལག་པ་གཡུགས་ནས་ཨན་ལི་ཁའོ།ད་ལོ་ཁྱོད་ཁང་ཐོག་ལ་འགྲོ་དགོས་པ་རེད།རྗེས་མར་ཁྱོད་ང་ཚོའི་སློབ་ཁང་འགྲམ་དུ་བརྒྱུད་དགོས་པ་གཏན་ནས་མཐོང་རྒྱུ་མ་རེད་ཅེས་བཤད་བྱུང་།ངའི་སེམས་པ་སྐྱུར་ལྷང་ངེར་ཆགས་ཤིང་གླེན་དགོད་མ་ཆད་པར་མགོ་བོ་གཡུག་གཡུག་བྱེད་པ་ཡིན།འོ་རེད།ངས་ད་དུང་སློབ་གཙོ་ཡང་མཐོང་བྱུང་།

ཁོང་གི་སྐྲ་དཀར་པོ་དེ་བས་མང་དུ་སོང་བ་དང་།ལུས་འགྲམ་དུ་ལོ་རིམ་དང་པོའི་ཕྲུ་གུ་ཚོ་དང་ཁྱིམ་བདག་གིས་བསྐོར་ནས་འདུག

ངས་ཕར་ལྟ་ཚུར་ལྟ་བྱེད་པའི་དུས་སུ་མི་ཞིག་གིས་ངའི་ཕྲག་པར་རྡེག་ཙམ་བྱེད་བྱུང་།ངས་ཁ་ཕྱིར་འཁོར་ནས་བལྟས་དུས།ལོ་རིམ་གསུམ་པའི་སྐྲ་འཁྱིལ་དགེ་རྒན་རང་རེད་འདུགཁོང་གིས་ང་ལ་གཟབ་ནན་གྱིས་ཨན་ལི་ཁའོ།ཁ་གྱེས་རན་ཐལ།དགེ་རྒན་གྱིས་ཁྱོད་རང་དྲན་གྱི་ཡིན་ཞེས་བཤད་བྱུང་།ངོ་མ་ངས་སྔ་ནས་ཆ་རྒྱུས་ཡོད་པའི་མི་དང་ཁ་གྱེས་པ་ནི་སེམས་སྐྱོ་བའི་དོན་དག་ཅིག་ཡིན་པ་ཤེས་ཀྱང་།དེ་རིང་དེ་བས་སེམས་ཕམ་པའི་སྣང་བ་ཞིག་སྐྱེས་བྱུང་།ངས་སེམས་ནང་དུ་བརྩེ་བའི་དགེ་རྒན་ལགས།ངས་ནམ་ཡང་ཁྱེད་ཉིད་བརྗེད་མི་སྲིད་ཅེས་འདོན་པ་ཡིན།

ཆུ་ཚོད་བཅུ་པ་རེད་སོང་།ང་རང་ཡུན་རིང་རེ་སྒུག་བྱེད་པའི་སློབ་ཁང་གསར་པར་འགྲོ་ཐུབ་སོང་།ངས་རྩིས་ཤིག་རྒྱག་དུས་འཛིན་གྲྭ་གསར་པར་མི་ལྔ་བཅུ་ང་ལྔ་ཡོད་པ་དང་།ལོ་རིམ་གསུམ་པའི་སློབ་གྲོགས་རྙིང་པ་མི་བཅོ་ལྔ་ལས་མི་འདུག་ཅིང་ནམ་ཡང་སྦྱངས་འབྲས་ཨང་དང་པོ་བླངས་པའི་ཏའེ་ལའོ་ཞི་ཡང་དེའི་ཁྲོད་དུ་ཡོད་ཅིང་།དེ་མིན་ཚང་མ་ནི་ངོ་གདོང་གསར་པ་ཤ་སྟག་རེད།

དགེ་རྒན་གསར་པ་བསླེབས་བྱུང་།ཁོང་གི་སྐུ་གཟུགས་ཧ་ཅང་ཆེ་ཞིང་།སྐྲ་ལོ་རབ་ཏུ་དཀར་བ་དང་།ཐོད་པར་ད་དུང་གཉེར་རིས་ཟབ་མོ་ཞིག་འདུགདགེ་རྒན་འདིའི་སྐད་གསང་ཧ་ཅང་མཐོ་ཞིང་མིག་ཟུང་ལ་འོད་མདངས་བཀྲ་བས་མིའི་སེམས་ཀྱང་མངོན་གསལ་དུ་མཐོང་ཐུབ་པ་ལྟ་བུ་ཞིག་རེད།ང་རང་གིས་ཁོང་ནི་ཅུང་གཟབ་ནན་ལྡན་པ་ཞིག་ཡིན་སྣང་ཤར་ཞིང་དགོད་རྒྱུར་ཧ་ལམ་མི་དགའ་བ་འདྲ།ཨོ།ངས་བྱམས་བརྩེ་ལྡན་པའི་སྐྲ་འཁྱིལ་དགེ་རྒན་དྲན་བྱུང་།ཁོང་གི་འཛུམ་དགོད་ཀྱིས་ང་རང་ལ་དུས་ནམ་ཡང་ཡང་ཞིང་སྐྱིད་པའི་སྣང་བ་ཞིག་སྟེར་གྱིན་རེད།

སྐབས་འདིར་ངས་སློབ་གྲྭ་སྔ་ལྟར་བྲོ་བ་ལྡན་པ་ཞིག་ཡིན་སྣང་མི་ཤར།དྲན་ཚོད་ལ་ད་དུང་ཟླ་བ་དགུའི་རིང་གི་དུས་ཚོད་ཡོད་ཅིང་།བགྲང་མི་ཚར་པའི་ལས་བྱ་དང་།ཚན་པའི་ཚོད་རྒྱུགས།དཔྱད་བསྡུར་སོགས་ཇི་འདྲའི་སུན་སྣང་ལྡན་པ་ཞིག་རེད་ཨང་།སློབ་ཁང་ལས་བུད་རྗེས་ང་རང་བྱ་འཕུར་བ་ལྟར་ཨ་མའི་མདུན་དུ་རྒྱུགས་པ་ཡིན།ཨ་མས་ང་པང་དུ་བླངས་ནས་ཞལ་འཛུམ་ཏེ་ཨན་ལི་ཁའོ།རིག་པ་སྒྲིམས་ཤིགསློབ་དུས་གསར་པས་ཁྱོད་ཀྱི་འཚར་ལོངས་བྱུང་ཚུལ་ལ་བདེན་དཔང་གྱིས་ཤིག་ཨང་ཞེས་བཤད་བྱུང་།

ངའི་དགེ་རྒན་གསར་པ།

དེ་རིང་ནི་སློབ་གྲྭ་ཚུགས་པའི་ཉིན་གཉིས་པ་རེད།ངས་དགེ་རྒན་གསར་པ་དེ་ཚང་མའི་མིག་སྣང་དུ་ཇེ་ཡག་ནས་ཇེ་གཅེས་སུ་འགྱུར་བཞིན་པ་མཐོང་བྱུང་།

ལྟོས་དང་།ཞོགས་པར་སློབ་ཁང་དུ་འགྲོ་མ་ཐག་ཁོང་ཁྲིད་སྟེགས་ཀྱི་མདུན་དུ་བཞུགས་ཚར་ཞིང་།དགོད་འཛུམ་འཛུམ་གྱིས་ང་ཚོ་ལ་ཞོགས་པ་བདེ་ལེགས་ཞེས་འབོད་པ་རེད།སྐབས་འགར་ངོ་མི་ཤེས་པའི་སློབ་གྲོགས་ཁ་ཤས་སྒོ་སྲུབས་ནས་མགོ་བསྲིངས་ཏེ་ཁོང་ལ་ཁ་ཡ་བྱེད་པ་རེད།ལྷག་པར་དུ་སློབ་མ་ཁ་ཤས་ཐད་ཀར་ནང་དུ་ཡོང་ནས་དགེ་རྒན་ལ་གུས་བཀུར་ཞུས་ནས་འཚམས་འདྲི་བྱེད་པ་དང་།ཡང་ན་གཅེས་ལང་གི་ཚུལ་གྱིས་དགེ་རྒན་ལ་མུ་མཐུད་དེ་ཁོ་ཚོར་སློབ་ཁྲིད་བྱ་དགོས་པའི་རེ་བ་ཞུས་ཤིང་དེའི་རྗེས་བྲལ་མི་ཕོད་པ་ལྟར་ཕྱིར་ལོག་པ་རེད།སློབ་མས་སེམས་ནང་བཞག་པའི་དགེ་རྒན་ནི་ངན་པ་ཞིག་མིན་ངེས་པས་ང་རང་ལྐོག་ཏུ་སྤྲོ་བ་ལངས་བྱུང་།

མིང་ཐོ་འབོད་པའི་རྗེས་སུ་དགེ་རྒན་གྱིས་ང་ཚོར་མིང་ཚིག་གསར་པ་དཔོད་འབྲི་བྱེད་དུ་བཅུགཁོང་གིས་དཔེ་ཆ་ཁུར་ནས་ཚུར་འགྲོ་ཕར་འགྲོ་བྱས་ཤིང་དུས་ཐོག་ང་ཚོའི་སྦྱོང་དེབ་ཐོག་ཤར་བའི་ཡིག་ནོར་དང་ཡི་གེ་འབྲི་དུས་འདུག་སྟངས་མི་ལེགས་པའི་སྐྱོན་ཆ་ཡོ་བསྲང་བྱས་པ་རེད།

གློ་བུར་དུ།དགེ་རྒན་འགྲམ་པ་དམར་པོ་ཆགས་པའི་སློབ་གྲོགས་ཤིག་གི་མདུན་དུ་འགྲོ་མཚམས་བཞག་ཅིང་མར་སྒུར་ནས་ལག་པས་ཁོའི་མགོ་བོར་བྱིལ་བྱིལ་བྱས་ཏེ་བརྩེ་སེམས་ཆེན་པོས་ཁྱོད་རང་ལ་མི་བདེ་བའི་ཚོར་བ་མ་བྱུང་ངམ་ཞེས་དྲིས་པ་རེད།

སྐབས་དེར་གྲལ་རྒྱབ་ཡོད་པའི་བསྟན་བཤིག་ཚ་པོ་ཞིག་གིས་བར་སྐབས་དེར་བསྟུན་ནས་རྩེད་ཆས་བླངས་ནས་རྐུབ་སྟེགས་ཀྱི་ཐོག་ཏུ་མཆོང་པ་རེད།སྐབས་དེར་ཏག་ཏག་དགེ་རྒན་དེ་མུར་ཁ་ཕར་འཁོར་སོང་།བུ་ཆུང་དེས་བྲེལ་འཚུབ་ཀྱིས་མགོ་བོ་སྒུར་ནས་ཆད་གཅོད་དང་ལེན་བྱ་རྒྱུ་སྒུག་ནས་བསྡད།བསམ་ཡུལ་ལས་འདས་པ་དགེ་རྒན་གྱིས་ཁོའི་ལྟག་རྒྱབ་ལ་རྡེག་ཙམ་བྱས་ནས་སྐད་དམའ་ངུས་རྗེས་མ་དེ་ལྟར་མ་བྱེད་ཅེས་མངག་གཏམ་བྱེད་པ་ལས་དེ་མིན་གང་ཡང་བཤད་མ་སོང་།

དཔོད་འབྲི་བྱས་རྗེས།དགེ་རྒན་གྱིས་ཁུ་སིམ་མེར་ང་ཚོར་བལྟས་ཤིང་།སྐད་གསང་མཐོན་པོས་བུ་ཕྲུག་ཚོ།ང་ཚོས་མཉམ་དུ་སྤྲོ་སྐྱིད་ལྡན་པའི་ལོ་གཅིག་འཚོ་དགོས་པ་རེད།ཁྱོད་ཚོས་སློབ་སྦྱོང་ཡག་པོ་བྱེད་ཅིང་སྒྲིག་ལམ་སྲུང་བ་དང་།སྦྱངས་འབྲས་བཟང་ཞིང་ཀུན་སྤྱོད་ལེགས་པའི་ཕུལ་བྱུང་སློབ་མ་ཞིག་བྱེད་དགོས།ངའི་ཕ་མ་ཚོ་ཞིང་ཁམས་ལ་ཕེབས་ཚར་བ་རེད།འཇིག་རྟེན་འདིར་ང་རང་གཅིག་པུ་ལས་ལྷག་མེད།ཁྱོད་ཚོ་ནི་ངའི་གཉེན་ཉེ་རེད།ངའི་ཕྲུ་གུ་ཚོ།ངས་རང་སེམས་ཀྱིས་ཁྱོད་ཚོ་དགའ་འདོད་ཡོད་ཅེས་བཤད་པ་རེད།དགེ་རྒན་གྱི་མིག་མཆི་མས་བརླན་སོང་།ང་ཚོའི་འཛིན་གྲྭ་ནི་ཁྱིམ་ཚང་ཆེན་པོ་ཞིག་ཡིན།ང་རང་ལ་ཁྱོད་ཚོའི་བདེ་སྡུག་ལོངས་སུ་སྤྱོད་དུ་འཇུག་རོགས་དང་།ག་དུས་ཡིན་ཡང་ངས་ཁྱོད་ཚོའི་ནང་གི་གང་ཡང་རུང་བ་ཞིག་ལ་ཆད་པ་གཅོད་འདོད་རྩ་བ་ནས་མེད།ད་ལྟར་ངས་ཁྱོད་ཚོར་ཁས་ལེན་དམ་བཅའ་བྱེད་དུ་འཇུག་རྒྱུ་མིན།ཁྱོད་ཚོའི་སེམས་ནང་དུ་ངའི་རེ་བ་དང་ལེན་ཞུས་ཚར་བ་ངས་ཐག་གིས་ཆོད།བཀའ་དྲིན་ཆེ།

ཚང་མའི་མདུན་དུ་དགེ་རྒན་གྱིས་གུས་འདུད་ཆེན་པོ་ཞིག་ཞུས་བས་སློབ་མ་ཚང་མས་མིག་རྡོག་ཆེར་བགྲད་པ་དང་།ཅུང་ཙམ་སྒུག་རྗེས་སློབ་ཁང་ནང་དུ་སྤྲོ་དགས་ཁྱབ་སོང་།ང་རང་དེ་རིང་ལྟ་བུའི་སེམས་འགུལ་ཐེབས་མ་མྱོང་ཞིང་།ངས་དགེ་རྒན་གསར་པ་འདི་ནི་ཧ་ཅང་ཐུན་མོང་མ་ཡིན་པ་ཞིག་ཡིན་སྣང་ཤར་བ་དང་།དགོད་རྒྱུ་དགའ་བའི་སྐྲ་འཁྱིལ་དགེ་རྒན་ལས་མི་དམན་ཞིང་ད་དུང་དེ་བས་ཞི་འཇམ་ལྡན་པ་ཞིག་ཡིན་ནའང་སྲིད།

སློབ་གྲྭ་གྲོལ་སོང་།ང་ཚོ་རེ་རེ་བཞིན་ཁུར་སིམ་མེར་སྡོད་གནས་ནས་ཁ་བྲལ་བ་ཡིན།རྐུབ་སྟེགས་ཐོག་ཏུ་མཆོང་པའི་སློབ་མ་བུ་ཆུང་དེ་དགེ་རྒན་གྱི་འགྲམ་དུ་ཕྱིན་ནས་ཁ་སྐྱེངས་པའི་ཚུལ་གྱིས་དགེ་རྒན་ལགས།ང་ལ་བཟོད་སྒོམ་གནང་རོགས་ཞེས་བཤད།དགེ་རྒན་གྱིས་ཁོའི་ཐོད་པར་འོ་ཞིག་བྱས་ནས་སྐྱོན་མེད།མགྱོགས་པོར་ཕྱིར་ལོག་ངའི་བུ་ཕྲུག་བཟང་པོ་ཞེས་བཤད་པ་རེད།

བསམ་ཡུལ་ལས་འདས་པའི་ཆག་སྒོ།

དེ་རིང་ཞོགས་པར།ཨ་ཕས་ང་རང་སློབ་གྲྭར་བསྐྱལ་ནས་སློབ་གྲྭའི་སྒོ་འགྲམ་དུ་བསླེབས་ཚེ།ང་ཚོས་ལམ་འགྲོ་བ་མི་མང་པོས་སྐད་ཅོར་བརྒྱབ་སྟེ་སློབ་གྲྭའི་ཕྱོགས་སུ་རྒྱུག་སོང་བར་མཐོང་།ཨ་ཕ་ཡ་མཚན་ཆེན་པོ་སྐྱེས་ཤིང་ཕྱོགས་གཅིག་ངའི་ལག་པ་འཇུས་ནས་གོམ་འགྲོས་ཇེ་མགྱོགས་སུ་བཏང་ཞིང་།ཕྱོགས་གཅིག་ནས་གློ་བུར་གྱི་དོན་རྐྱེན་ཞིག་བུད་པ་མ་ཡིན་ནམ་ཞེས་ཤབ་ཤུབ་བྱེད་བཞིན་འདུག

ང་ཚོ་བཙིར་རེས་བྱས་ནས་སློབ་གྲྭར་བསླེབས་ཚེ།ངལ་གསོ་ཁང་གི་ནང་དུ་ཚང་མ་སློབ་མ་དང་ཁྱིམ་བདག་རེད།སློབ་གཙོའི་གཞུང་ལས་ཁང་བསྐོར་ནས་ཐར་ས་མི་འདུག་ཅིང་མི་རྣམས་ཀྱིས་དེ་གར་གླེང་མོལ་བྱེད་བཞིན་ཡོད་ལ།ཁ་ཤས་ཀྱིས་སྐེ་རིང་དུ་བརྐྱངས་ནས་ནང་དུ་ལྟ་གང་ཐུབ་བྱེད་ཀྱི་འདུགམཚམས་རེར་མི་ཁ་ཤས་ཀྱིས་སྙིང་རྗེ་བའི་ཕྲུ་གུ།སྙིང་རྗེ་བའི་ལོ་ཕའེ་ཏི་ཞེས་ཤུགས་རིང་འབྱིན་བཞིན་མཆིས།

འགུལ་བཞིན་པའི་མི་མགོ་དེ་དག་ལས་བརྒལ་རྗེས།ངས་ཉེན་རྟོག་པའི་ཞྭ་མོ་མཐོ་པོ་དང་ད་དུང་སློབ་གཙོའི་འོད་རིལ་རིལ་གྱི་མགོ་བོ་དེ་དག་རབ་རིབ་ཀྱིས་མཐོང་བྱུང་།ཅུང་ཟད་སྒུག་རྗེས།འཕྱིང་ཞྭ་མཐོ་པོ་གྱོན་པའི་སྐུ་ཞབས་ཤིག་བསླེབས་བྱུང་།མི་རྣམས་ཀྱིས་ཁྱོད་ཀྱིས་ཅིག་བཤད་ང་ཡིས་ཅིག་གླེང་ནས།འགྲིག་སོང་།འགྲིག་སོང་།སྨན་པ་བསླེབས་སོང་ཞེས་བཤད་པ་རེད།

ཨ་ཕས་འགྲམ་དུ་ལངས་ཡོད་པའི་དགེ་རྒན་ལ་ཡང་སྙིང་ཅི་ཞིག་བྱུང་སོང་ཞེས་དྲིས།

ཕྲུ་གུ་ཆུང་ཆུང་ཞིག་གི་རྐང་པ་འཁོར་ལོས་མནན་ནས་རྨས་པ་རེད།

རྐང་པའི་རུས་པ་ཡང་བཅག་འདུགལས་ངན།དགེ་རྒན་ཞིག་གིས་ཡང་དེ་ལྟར་ལན་བཏབ།

མ་གཞིར་རྨས་ཕོག་པའི་བུ་ཆུང་དེ་ནི་ལོ་རིམ་གསུམཔའི་ལའོ་ཕའེ་ཏི་རེད།སྔ་དྲོར་སློབ་གྲྭར་འགྲོ་དུས་ལའོ་ཕའེ་ཏིས་ལོ་རིམ་དང་པོའི་སློབ་མ་ཞིག་ཨ་མའི་ལག་པ་ལས་བྲལ་ནས་གཅིག་པུ་གཞུང་ལམ་གྱི་དཀྱིལ་དུ་རྒྱུག་པ་དང་ཡིད་འཇོག་མ་བྱས་ནས་སར་འགྱེལ་བ་རེད།ཏག་ཏག་དེའི་དུས་སུ་ཐག་མི་རིང་བར་ན་ཤིང་རྟ་འཁོར་ལོ་ཞིག་སླེབས་པ་དང་ཁ་ལོ་བས་ཁ་བསྒག་ཁོམ་མེད་པར་བལྟས་བལྟས་རིག་རིག་ལ་ཕྲུ་གུའི་སྟེང་དུ་རྡུང་རན་པའི་སྐབས་དེར།དཔའ་ངར་ཆེ་བའི་ལའོ་ཕའེ་ཏི་མདའ་འཕེན་པ་ལྟར་འཕུར་རྒྱུག་བྱས་ནས་ཕྲུ་གུ་ལམ་འགྲམ་དུ་འབུད་ཐུབ་བྱུང་ཡང་།རང་ཉིད་བྲོས་བྱོལ་མ་ཁོམ་ནས་རྐང་པར་མནན་པ་རེད།

མི་རྣམས་ཀྱིས་ཨེ་མ་མ་ཞེས་བསྟོད་བསྔགས་བྱེད་པའི་ཚེ་བུད་མེད་ཅིག་སྨྱོན་པ་ལྟར་མི་ཚོགས་ནས་ལམ་ཞིག་འབྱེད་དེ་ཚོམས་ཆེན་དུ་རྒྱུག་སོང་།མོ་རང་ནི་ལའོ་ཕའེ་ཏིའི་ཨ་མ་རེད།དེ་མུར་ཡང་བུད་མེད་ཅིག་བྲེལ་འཚུབ་ཀྱིས་རྒྱུགས་ཡོང་ནས་ལའོ་ཕའེ་ཏིའི་ཨ་མ་འཐམས་ཏེ་སྐད་ཤུགས་ཆེན་པོས་ངུ་བ་དང་།མོ་ནི་སྲོག་སྐྱོབ་པའི་ཕྲུ་གུའི་ཨ་མ་རེད།སྐྱོ་སྡུག་ཆེ་བའི་ཨ་མ་གཉིས་ཕན་ཚུན་སྐྱོར་རེས་བྱས་ནས་གོམ་པ་རེ་རེ་བཞིན་སློབ་གཙོའི་གཞུང་ལས་ཁང་གི་ཕྱོགས་སུ་བསྐྱོད།

སྐབས་འདིར་ལའོ་ཕའེ་ཏི་སྨན་ཁང་དུ་བསུ་ས་ཡོང་བའི་ཤིང་རྟ་འཁོར་ལོ་སློབ་གྲྭའི་སྒོ་ཁར་བསྡད་སོང་།སློབ་གཙོས་ལའོ་ཕའེ་ཏི་པང་དུ་ཁུར་ནས་ཕྱིར་བསླེབས་བྱུང་།ལའོ་ཕའེ་ཏིའི་བཞིན་རས་ཐལ་མདོག་ཅན་གྱུར་ཅིང་མིག་ཟུང་དམ་དུ་བཙུམ་པ་དང་།ནུས་ཟད་ཀྱི་མགོ་བོ་ཆུང་ཆུང་སློབ་གཙོའི་ཕྲག་པར་བསྙེས་འདུགམི་ཚང་མས་སྐད་ཆ་མི་ཤོད་ཅིང་ལའོ་ཕའེ་ཏིའི་ཨ་མའི་ངུ་སྒྲ་གསལ་ལྷང་ངེར་ཐོས་པ་ལས་མཐའ་འཁོར་ཀུན་ཏུ་ཧ་ཅང་ཁུ་སིམ་མེར་འདུག

སློབ་གཙོས་དཔུང་ཟུང་གིས་ལའོ་ཕའེ་ཏི་རན་ཙམ་བཀྱག་ནས་ཚང་མ་ལ་དཔའ་བོ་ཆུང་ཆུང་འདི་གསལ་པོ་ཞིག་མཐོང་དུ་བཅུག་པ་རེད།དགེ་རྒན་དང་ཁྱིམ་བདག་ཡིན་ནའང་འདྲ།ཕྲུ་གུ་ཚོ་ཡིན་ནའང་འདྲ།ཚང་མས་ཁོ་ལ་འོ་མདའ་རྒྱུན་ཆད་མེད་པར་འཕེན་ཞིང་མགྲིན་གཅིག་ཏུ་ལའོ་ཕའེ་ཏི།ཁྱོད་ངོ་མ་དཔའ་ངར་ཆེ།

ལའོ་ཕའེ་ཏི།ཁྱོད་དཔེ་མི་སྲིད་པ་ཞིག་རེད།ཅེས་བཤད་པ་རེད།མི་འགའ་ཞིག་གིས་ད་དུང་ལུས་པོ་མར་སྒུར་ནས་ཁོའི་ལག་པ་དང་དཔུང་པར་འོ་ཡང་མོ་ཞིག་བྱས།

ལའོ་ཕའེ་ཏིས་མིག་དལ་གྱིས་ཕྱེ་ཞིང་ཟུངས་ཟད་པའི་སྒོ་ནས་ངའི་དཔེ་ཁུག་གང་དུ་ཡོད་དམ་ཞེས་བཤད།སྲོག་སྐྱོབ་པའི་ཕྲུ་གུའི་ཨ་མས་མིག་ཆུ་བསྲན་ནས་དཔེ་ཁུག་ཕར་སྤྲད་དེ་ཞི་འཇམ་གྱིས་སེམས་ཁྲལ་མ་བྱེད།བུ་ཕྲུགངས་ཉར་ཚགས་བྱེད་རོགས་བྱེད་ཡོད་ཅེས་བཤད།མཚམས་འདིར་ལའོ་ཕའེ་ཏིའི་ཨ་མའི་གདོང་ལ་ཡང་འཛུམ་རིས་ཅུང་ཟད་ཤར་བྱུང་།

མི་རྣམས་ཀྱིས་སློབ་གཙོ་དང་ལའོ་ཕའེ་ཏི་བསྐོར་ནས་མདུན་དུ་ཕྱིན་སོང་།སློབ་གཙོས་གཟབ་གཟབ་བྱས་ནས་ལའོ་ཕའེ་ཏི་ཤིང་རྟའི་འཁོར་ལོའི་ཐོག་བཞག་ཅིང་ཤིང་རྟ་འཁོར་ལོ་དལ་གྱིས་རྒྱང་རིང་དུ་སོང་བར་མིག་གིས་སྐྱེལ་མ་བྱས།ང་ཚོ་ཚང་མས་ཤིང་རྟའི་འཁོར་ལོ་མིག་གིས་མི་མཐོང་བའི་བར་དེར་སྒུག་རྗེས་གཞི་ནས་འཇམ་འཇགས་འཇགས་སློབ་ཁང་དུ་ལོག་པ་ཡིན།

ཀོ་ལ་པའོ་ལི་ཡའི་ཕྲུ་གུ།

ཕྱི་ཉིན་ཕྱི་དྲོར།དགེ་རྒན་གྱིས་ལའོ་ཕའེ་ཏི་དུས་ཡུན་རིང་ཙམ་མཁར་བ་ལ་བརྟེན་ནས་འགྲོ་དགོས་པའི་སྐོར་གླེང་པའི་ཚེ།སློབ་གཙོས་ངོ་མི་ཤེས་པའི་སློབ་མ་ཞིག་ཁྲིད་དེ་ང་ཚོའི་སློབ་ཁང་དུ་བསླེབས་བྱུང་།དགེ་རྒན་གྱི་རྣ་ཟུར་ཤབ་ཤུབ་འགའ་བྱས་ནས་ཕྱིན་སོང་།

ཕྲུ་གུ་དེར་དྭངས་ཤིང་གསལ་ལ་གྲུང་ཧྲིག་ཧྲིག་གི་མིག་ཅིག་ཡོད་པ་དང་།ཤ་མདོག་ཅུང་ཟད་ནག་ཅིང་དམར་ནག་མདོག་ཅན་གྱི་ལྕོག་ལེ་ཞིག་དང་འདྲ།ཁོའི་སྐྲ་ལོ་ཧ་ཅང་ནག་ལ་སྨིན་མ་ཡང་ཧ་ཅང་མཐུགཁོའི་ལུས་ལ་མིག་དབང་འཕྲོག་པའི་རྒྱབ་གོས་ནག་པོ་ཞིག་གྱོན་ཞིང་།སྐེད་པར་མོ་ན་ཁོ་རྒྱལ་ཁབ་ཀྱི་ཀོ་བའི་སྐེ་རགས་ཤིག་བཅིངས་འདུགཕྲུ་གུ་ཆུང་ཆུང་དེ་དགེ་རྒན་གྱི་རྒྱབ་ཏུ་ལངས་ཤིང་ཧ་ལམ་སེམས་འཚུབ་ཀྱི་ཡོད་པ་འདྲ་ཞིང་ལྐོག་ཏུ་སློབ་ཁང་ནང་གི་ཡོད་ཚད་ལ་ལྟ་བཞིན་འདུག

དགེ་རྒན་གྱིས་ཁོའི་ལག་པ་འཇུས་ནས་མཛའ་བརྩེ་ཆེན་པོས་བརྩེ་བའི་ཕྲུ་གུ་ཚོ།དེ་རིང་བཀྲ་ཤིས་པའི་ཉིན་མོ་ཞིག་རེད།གང་རེད་ཟེར་ན་ང་ཚོས་དབྱིན་ལེ་ལྔ་བརྒྱའི་ཕྱི་ནས་འོངས་བའི་གྲོགས་པོ་གསར་པ་ཞིག་ངོ་ཤེས་བྱ་རྒྱུ་རེད།ཁྱོད་ཚོ་ཤེས་སམ།གྲོགས་པོ་གསར་པ་འདིའི་ཕ་ཡུལ་ཀོ་ལ་པའོ་ལི་ཡ་ནི་ང་ཚོའི་དབྱི་ཐ་ལིའི་ཆེས་སྤོབས་པ་སྐྱེ་འོས་པའི་ས་གནས་ཤིག་ཡིན་ལ།དེར་ཕུལ་དུ་བྱུང་བའི་མི་སྐད་གྲགས་ཅན་ཡོད་ཅིང་།སྟོབས་ཤེད་འཛོམས་པའི་ངལ་རྩོལ་པ།དཔའ་ངར་ཅན་གྱི་དམག་མི་བཅས་ཡོད་པ་དང་།མཛེས་སྡུག་ལྡན་པའི་ཡུལ་ལྗོངས་སམ།རྒྱས་ཤིང་སྟུག་པའི་ནགས་ཚལ་ལམ།ཀྲོང་ངེར་འགྱིང་པའི་རི་བོ་སོགས་ཡོད་པ་རེད།ཁྱོད་ཚོས་ཁོ་ལ་མཛའ་བརྩེའི་སྤྱོད་ཚུལ་བཟུང་ནས་ཁོ་རང་ཕ་ཡུལ་ས་ཐག་རིང་པོ་ནས་ཡོང་བའི་ཁེར་སྡུག་དང་མི་འཚམ་པ་བརྗེད་དུ་འཇུག་དགོས།ང་ཚོའི་དབྱི་ཐ་ལིའི་ས་གཞིའི་ཐོག་ཏུ་ཡིན་ཕྱིན་གང་དུ་སོང་ཡང་ཁྱིམ་ཚང་གི་བདེ་དྲོད་ཡོད་པས་མ་ཚད་སྤུན་མཆེད་ལྟ་བུའི་སེམས་ཁུར་ཡོད་པར་བྱ་དགོས་ཞེས་བཤད་པ་རེད།

སྐད་ཆ་དེ་དག་བཤད་ཚར་རྗེས་དགེ་རྒན་དབྱི་ཐ་ལིའི་ས་བཀྲ་དཔྱངས་ཡོད་སར་སོང་ནས་ལག་པས་ཀོ་ལ་པའོ་ལི་ཡ་ཡོད་སའི་ས་གནས་བསྟན་ནས་ང་ཚོར་གསལ་པོར་མཐོང་དུ་བཅུག་རྗེས་སྐད་གསང་མཐོན་པོས་ཨའེ་ལའེ་སི་ཐའོ་ཏའེ་ལའོ་ཞི།ཁྱོད་རང་ཁྲིད་སྟེགས་ཀྱི་ཐོག་ལ་ཡོང་རོགས་ཞེས་བཤད།ཏའེ་ལའོ་ཞི་ནི་ང་ཚོའི་འཛིན་གྲྭའི་ཕུལ་བྱུང་སློབ་མ་ཡིན་ལ་དུས་ནམ་ཡང་ཨང་དང་པོ་ཡིན།ད་ལྟ་ཁོ་རང་སླར་ཡང་འཛིན་གཙོ་རུ་བདམས་པ་རེད།ཁྱོད་ནི་འཛིན་གཙོ་ཡིན་པས་ཁྱོད་ཀྱིས་འཛིན་གྲྭའི་སློབ་གྲོགས་ཡོངས་ཀྱི་ཚབ་བྱས་ནས་གྲོགས་པོ་གསར་པར་འཁྱུད་དེ་སྤྲོ་སེམས་འཕེལ་བའི་དགའ་བསུ་ཞུས་ཤིགདགེ་རྒན་གྱིས་འཛུམ་དམུལ་དམུལ་སྒོ་ནས་འདི་ནི་ཕེ་ཨའེ་མུའུ་ཐེའི་བུ་ཕྲུག་གིས་ཀོ་ལ་པའོ་ལི་ཡའི་བུ་ཕྲུག་ལ་སྦྱིན་པའི་དྲང་བདེན་གྱི་འཐམ་འཁྱུད་ཅིག་རེད་ཅེས་བཤད།

ཏའེ་ལའོ་ཞིས་སློབ་གྲོགས་གསར་པ་དམ་དུ་འཁྱུད་དེ་སྐད་ཆེན་པོས་ཁྱོད་ལ་དགའ་བསུ་ཞུས་ཞེས་བཤད།ཀོ་ལ་པའོ་ལི་ཡའི་ཕྲུ་གུས་ཀྱང་ངོ་ཚ་འདོར་ནས་བརྩེ་བས་ཏའེ་ལའོ་ཞིའི་འགྲམ་པ་གཉིས་ཀར་འོ་བྱས་པ་རེད།ང་ཚོ་དགོད་ཅིང་ཡར་ལངས་པ་དང་།སློབ་ཁང་ནང་དུ་དགའ་སྤྲོའི་ཐལ་སྒྲས་ཁྱབ་སོང་།འུར་མ་རྒྱགསློབ་གྲོགས་ཚོས་འུར་མ་རྒྱག་རོགས།སློབ་ཁང་ནང་དུ་ཐལ་མོ་རྡེབ་ཆོག་གི་མ་རེད།དགེ་རྒན་གྱིས་དེ་མ་ཐག་བཀག་འགོག་བྱས་ཀྱང་།ང་ཚོས་དགེ་རྒན་སེམས་ཧ་ཅང་དགའ་བ་དང་།ཀོ་ལ་པའོ་ལི་ཡའི་ཕྲུ་གུ་དེ་ཡང་དེ་ལྟར་སེམས་པ་ཧ་ཅང་དགའ་བ་མཐོང་ཐུབ་ཀྱི་འདུག

ཅུང་ཟད་སྒུག་རྗེས།དགེ་རྒན་གྱིས་སློབ་གྲོགས་གསར་པར་འདུག་གནས་བཀོད་སྒྲིག་བྱས་པས་མ་ཚད།སླར་ཡང་ཚང་མ་ལ་ལན་གཅིག་གཟིགས་ནས་གཟབ་ནན་གྱིས་སློབ་གྲོགས་ཚོས་ད་གིན་ངས་བཤད་པའི་སྐད་ཆ་སེམས་སུ་བཞག་ནས་ཀོ་ལ་པའོ་ལི་ཡའི་ཕྲུ་གུར་འདི་ན་ནི་རང་ཁྱིམ་ལྟ་བུའི་ཚོར་བ་དང་།ཁྱོད་ཚོ་ཀོ་ལ་པའོ་ལི་ཡར་བསླེབས་དུས་ཀྱང་རང་ཁྱིམ་བཞིན་རང་དབང་ཡོད་པ་ལྟ་བུ་རེད།དམིགས་ཡུལ་འདི་འགྲུབ་པའི་ཆེད་དུ་ང་ཚོའི་རྒྱལ་ཁབ་ཀྱིས་ལོ་ངོ་ལྔ་བཅུའི་འཐབ་འཛིང་བརྒྱུད་ཅིང་སྤུན་ཟླ་ཁྲི་གསུམ་གཡུལ་སར་རང་སྲོག་བློས་གཏོང་བྱས་ཡོད་པ་ཤེས་དགོས་ཀྱི་རེད།ཁྱོད་ཚོ་མི་སུ་ཡིན་ཡང་ཕན་ཚུན་བརྩི་བཀུར་དང་གཅེས་སྐྱོང་བྱ་རྒྱུར་ཤེས་དགོས།གལ་སྲིད་ཉིན་ཞིག་ལ་ཁྱོད་ཚོའི་ཁྲོད་དུ་སུ་ཞིག་ས་གནས་དེ་གའི་མི་མིན་པའི་རྐྱེན་གྱིས་ཁོར་གནོད་འཚེ་གཏོང་བ་ཡིན་ན།ཁྱོད་ལ་མགོ་བོ་བཏེགས་ནས་ལྷབ་ལྷུབ་ཏུ་གཡོ་བཞིན་པའི་ཚོན་གསུམ་རྒྱལ་དར་ལ་ལྟ་བའི་ཐོབ་ཐང་མེད་པ་རེད་ཅེས་ནན་མངག་གནང་།

སློབ་ཚན་གྲོལ་རྗེས།སློབ་གྲོགས་ཚང་མས་སློབ་གྲོགས་གསར་པ་བཙལ་ནས་སྐད་ཆ་བཤད་པ་དང་།འཛིན་གྲྭའི་ངོ་མཚར་ཆེ་བའི་དོན་དག་རྣམས་ཁོ་ལ་རྒྱུན་ཆད་མེད་པར་བཤད་པས་མ་ཚད།ད་དུང་ཁོ་ལ་ལྕགས་སྨྱུག་དང་རིས་བྱང་སོགས་ཀྱི་ལག་སྐྱེས་སྤྲད་པ་རེད།གྲལ་མཐར་བསྡད་པའི་སློབ་མ་བུ་ཞིག་གིས་ད་དུང་ཁོ་ལ་སུའེ་ཙེར་གྱི་སྦྲག་འཛིན་སྤུས་ལེགས་ཤིག་ཀྱང་བྱིན་ཞིང་ངོ་མ་ཡིད་སྨོན་འཆོར་འོས་པ་ཞིག་རེད་ཨང་།